LAA 111 - Kathara Bible (BSI)

Proho li Masotkhami

¹ Proholi sochikatlu. Ining tongda Proholi ina ningkashi mira, ningkhangatara ashangli ngasoda yarui kazipli.

² Prohowui otsak hakmahālaka, chili ningyāngkhaung saikorana theishingkhuingai.

³ Awui otsak khayākakā kala ngamkakāmānga, kala awui khamashung khangarong katang mavaimana.

⁴ Ana awui tekhamatei ot phaningung ngasakhaira; Prohova lumashan leishi kathāna.

⁵ Ali khangacheebingli ana kashakazā ngarānmi; awui tuingashitli mamalailakmana.

⁶ Awui mili awui pangshap otsak chithei; miyurbingwui shimlui athumli khuikhangasak chieina.

⁷ Apāngwui otsakbing tāzakhai kala ningtonga; awui hāngkachithei saikora khuisangkapaimānga,

⁸ saikora chi katang makhavaiwui vang sākahaina, ningtongda mashungrik eina sākhavaina.

⁹ Ana awui mili ngatangkakhui chihorai; ana awui tuingashit katang makhavaiwui vang kasohaira. Awui ming kathara kala khangacheeana.

¹⁰ Thangmeiwui haophok khavai chi Proholi khangachee hina. hotkhanā saikorana kaphā theishingkakhui leira. Awui masot katang mavaimana.