LAA 110 - Kathara Bible (BSI)

Proho eina Ana Hākakhui Awunga

¹ Prohona iwui ameili hānga: “Nawui yangkasheli nawui pheinai masāranglakha eina tangda, iwui yāshong pamlu.”

² Zionwui eina Prohona nawui pangshapwui khānthing chihorai. Nawui yangkashebingwui alungli munglu!

³ Kathara phungreitungli, nawui ashangva̱li thānthanghon nawui mibingna khalem eina chigatra. Ngathorwui naopam eina ikra̱ katā thāda, nawui yaron-ngalābina nali rāra.

⁴ Prohona ngashithaira, kala awui ning mangacheimara; “Nala Melchizedekwui thili kazang pāngmon akha ngasāchingra.”

⁵ Prohona nawui yāshong lei; a malungvātthang awungabingli akha̱ sāngasakra.

⁶ Miyurwui alungli ana bichar sāra, athumli mingun chipemra; okathui vāpeida akhavābingli ana akha̱ sāngasakra.

⁷ Shongfapheiwui kongrāra̱ ana mangra; chiwui vang ana akui mangeikāra.