LAA 11 - Kathara Bible (BSI)

Proho li Ning Kashai

¹ Proholi ina ngayinkhui; nana khisak eina “Vānao thāda phungreili yāmvāulu, da ili hāngpairakhala;

² kaja yanglu, makhayābingna malā huna, athumna malā khara̱li malāthing sanghaira, tangkhamangli khangarongabingwui malungli kāpsangmi khavai;

³ shimphungabing chi sakhaihaiakha khamashungbingna khi sāurakhala”?

⁴ Prohona awui kathara khorumshimli lei. Prohowui wungpamkhong kazingramli lei; ana apam saikorali khalei mibingli yanga, kala athumna khisālikhala kaji thei,

⁵ Prohona khamashunga kala makhayālila tamyanga, kala amanglāna khangashaoli malungkachānga chili yangkharinga.

⁶ Makhayābingli ana meitha eina meiwon rotā ngasakra. Sākhamatai siphan athumwui tengkotwui yar ngasāra;

⁷ Kaja Proho khamashung-khangarongana, khamashung-khangarong otsakli ana leishi; mashungrik kahaiyana awui zakmai theira.