LAA 109 - Kathara Bible (BSI)

Kachikatha Akhana Kachot Atamli Maringkaphā Hāngkaphat

¹ Kasaikha mapamihaialu, O ina masot khame Vare!

² Kaja makaphā kala kachipat khamorbing ili mamayāla makāda lei, kakapik male eina ili mamayāla matuili.

³ Athumna ili yangkakharing tuimāng matuiya kala angalang maleila ili ngarara.

⁴ Ina leishida seihala sākhamiwui vang, athumna ili phentha̱ya.

⁵ Chithāda athumna ili kaphāwui vang makaphā hanmi, iwui leikashiwui vang yangkakharing hanmi.

⁶ Awuitungli makaphā makhayā mi akha phākhuilu, ali kaphena akhana bichar sākhavai khuirāranu.

⁷ Ali bichar kasā tharan, ali yonngasaklu, awui seihā kasā moreina da shānkhuiranu!

⁸ Awui atam kasha̱khamāngmaranu; awui otpam katei akhana khuithuihaoranu.

⁹ Anao ngarā avāva̱ makhalei ngasāranu, apreiva̱̱ ra̱meipamranu!

¹⁰ Anao ngarāna kuimareida pozāzatranu; ja̱tā kahai athumwui shim eina kashamshokhaoranu!

¹¹ Kashināmbingna awui khalalei saikora ngapaikhuiranu; makathei mina ana shairanra̱ tāda vāsang kahai heithei ngaponzāranu!

¹² Ali khipānakha malumashanaranu, lah avāva̱ makhalei awui naobingli malumashanaranu!

¹³ Awui ara̱-azā katathaoranu; thot kakhaneli aming shimithaoranu!

¹⁴ Avāva̱ ngarāwui khayon Prohowui mangāli phaningungranu, kala avāva̱wui moreila mashimitmiaranu!

¹⁵ Saikora chi Prohowui mangāli leichingranu; kala ali phaningkhaung okathuiwui eina malaichaohaoranu!

¹⁶ Kaja ana lumashan khavai maphaningungmana, kha kachāma kala khavāta kala ning kachotabingli thikhavai kharomzata.

¹⁷ Ana khonshingailaka, khonkashi awuitungli tāranu! Ana sokhami maningchāngmana; sokhami awui eina katāva̱ thuihaoranu!

¹⁸ Khonkashi kachon thāda akhalatta ngavaiya, china aphasāli tara̱ thāda, ara̱kuili thao thāda yizangranu!

¹⁹ Ana khangavai kachon thāda, thangkachida neikazat shānneira̱ tharanu!

²⁰ Iwuitungli makaphā khamatuibing chili Prohona sāman chithāda miranu!

²¹ Kha O Vare iwui Proho, iwui mathun eina namingwui vang kasāmilu; khikhalajila nawui makhangachei leikashi phālaka, ili kanshokmilu!

²² Kaja iya khangazana khavātana, iwui wuklungli ining khanangnāhaira.

²³ Zingyinlamwui khaya̱ thāda I thuihaira; khaohyur thāda ili kathantāhaira.

²⁴ Khumkapam eina ikhuksaola nganukhaira, phasāla kaothekhaira.

²⁵ I hi ili kaphenabingna mana̱shinganao khavai ngasāhaira; ili athumna kathei tharan athum kui khayita.

²⁶ O Proho, iwui Vare, ili khangachonmilu! Nawui makhangachei leikashina kahuimilu!

²⁷ Napāngna kasānada athumli theingasakmilu, O Proho, hi nana kasāna!

²⁸ Athumna khonshiranu; kha nana somilu! Ili khangararbing maishiranu, narao mathānranu!

²⁹ Ili kaphenabing maishāt eina sāri sāranu! chonkhaluilungli khalei thāda maishātna athum khalatta khaluiranu!

³⁰ Ikhamor eina Proholi ningkashi tui kachungkha hāngra, yaruilungli ali ina masot chikatra.

³¹ Kaja ana khavātabingwui yāshong nganingmi, sāthat khavai kasābingwui eina ngatangkhuimi khavai.