LAA 108 - Kathara Bible (BSI)

Yangkashebingli Khangasungli Ngachonmi khavai Seihā

¹ Ining khangachei maleimana, O Vare, iningli khangachei maleimana! Ina nimshimri laa sāra! Thuilu, imanglā!

² Ngakarthuilu, O tingteilā kala lyre! Ina zimikli mathotkhuira!

³ O, Proho, mibingwui alungli, ina nali ningkashi mira, yurbingwui alungli ina nali masotlaa sāra.

⁴ Kaja nawui makhangachei leikashi kazingram atungshong hakmahālaka, nawui ningkatong muiyā kāzoka.

⁵ O Varivara, kazing atungli reingasaklu! Nawui tekhamatei okathui saikorali leiranu.

⁶ Chithāda nawui leikasheli kanmiranu, nawui yāpang eina ngachonmilu, kala ili ngahānkāmilu.

⁷ Katharapamli Varena ngashita: “Khamathān eina ina Shechem ngakaira, Succothwui Tampāk ngayarshokmira.

⁸ Gilead iwuina; Manasseh iwuina; Ephraim iwui kuihonna; Judah iwui khānthingna.

⁹ Moab iwui pangmazikhongna; Edomwuitungli iwui pheihop haiya; Philistiawuitungli ina mathānda vaowa.”

¹⁰ Raipan sākahai keinungli khipāna ili thānungra? Edomli khipāna ili thanvāra?

¹¹ O Varivara, nana ithumli horkahai maningmala? O Vare, nana ithumwui raimili mangasovāmana.

¹² Ithumli yangkashebingwui eina ngachonmilu, kaja mina ngachonkhami aremana!

¹³ Vareli ngasoda ithum pinglak eina sāra; ithumwui yangkashebingli naitāki kaji chi ana.