LAA 105 - Kathara Bible (BSI)

Vare eina Awui Mibing

¹ O Proholi ningkashi milu, amingli ngakaolu, awui otsak yurbingli theingasaklu!

² Ali laa sālu, ali sokachikat laa sālu, awui matakhak kahai otsak saikora hāngmilu.

³ Awui katharamingli tekmateiranu, Proholi kaphābingwui ning mathānranu!

⁴ Proho kala awui pangshap chi phālu, awui nganaikhami phāchinglu.

⁵ Ana matakhak kahai ot sāmi kahai, awui tekhamatei, kala mashun tui hāngmi kahai chi phaningunglu.

⁶ O awui rao, Abrahamwui ara̱-azā, ana kapangkhui kahai Jacobwui naomayarabing!

⁷ A ithumwui Proho Varena; awui bichar okathui saikorali lei.

⁸ Awui tuingashit ana phaningungchinga, awui kaso kahahai tui thot thingthingwui vang,

⁹ ana Abrahamli tuingashit kasā, Isaacli ana mingzaida khangashit sākahai,

¹⁰ Jacobli shiyan akha sāda hāngmiluishit kaji, Israelli makashimān tuingashit sāda,

¹¹ “Nawui shimlui sākhavai yar sāda, ina nali Canaan mira” da hānga.

¹² Athum mi mashing teolakha, michākli mazangphayola, chili ramkazata sāda,

¹³ yur akhawui eina akhali yaozata, wungram akhawui eina khangatei akhali,

¹⁴ ana athumli khipānakhala marekharek ngasakmana; awungabingli athumwui vang hāngmachina,

¹⁵ “Ina thao neomi kahaibingli masāza̱paimara, iwui marānbingli zakkashi masāpaimara.” da hānga.

¹⁶ Ana apam chili zāt kasak rākhangasak tharan, kala kashakazā masamkaphang tharan,

¹⁷ ana athumli rida mi akha chihoi, raonao akha thāda yorkasanga, Josephli.

¹⁸ Aphei zurthingna ngahaka, akahungli mari hungkham ngachāmi;

¹⁹ ana hāngkahai chi maungshungranglakha eina tangda, Prohowui tuina ali chāng yanga.

²⁰ Awungana chihovāda ali shokngasaka, mibingli khamungana ali ningkhān ngasakmi;

²¹ awui shimli ali akhavā sāngasaka, kala awui khalei saikorawui khamunga sāngasaka,

²² awui wungnaobingli awui ningkachāng tamchithei ngasaka, khararnaobingli awor tamchithei khavai.

²³ Chiwui thili Israelna Egyptli vai; Jacobna Hamwui ngalei vai.

²⁴ Kala Prohona awui mibingli kachungkha mayāsang ngasaka, kala athumli yangkashebingli pangmei ngasaka.

²⁵ Awui mibingli yangkharing khavai, mibingli ning ngacheimihaida raobingli themlāk eina chipat ngasaka.

²⁶ Ana awui rao Moses, kala ana kapang kahai Aaronli chihovai.

²⁷ Athumwui mangāli anina machutkakhui sāchithei, kala Ham ngaleili masākharar kachungkha sai.

²⁸ Ana tangkhamang chihovāda apam chi tangmang ngasaka; athumna awui tuili ngakaishi.

²⁹ Ana athumwui tara̱ ashee onmihaida athumwui khai thingasakserhaowa.

³⁰ Athumwui ram khaifana pema, awungabingwui shim eina tangdalila.

³¹ Ana kahāng eina hachāng asur eina rai; kala athumwui ngalei koktui hāpa̱na pemhaowa.

³² Zingrotwui vang athumli ana theih tāngasaka, kala athumwui ngalei peida rikhān ngasheiya.

³³ Ana athumwui drakhārong, khaorārong sāshimānmi, kala aramwui thingrongbing sātekmi.

³⁴ Ana kahāng eina khaoh shoka, khaohnaobing mashānrarmana;

³⁵ china athumwui thingnā-ra̱hā shaitupmihaowa, kala aram ngaleiwui athei-arai shaimiserhaowa.

³⁶ Athumwui ngaleili ana athumwui naochizai saikora shaothata, athum saikorawui yaronshaplakhawui naochizaibing.

³⁷ Chiwui thili sinā lupā eina ngasoda Israelli ana thānshoka; kala awui shang ngachaili khipāshikha phei mangaphokmana.

³⁸ Athum thuikahai tharan Egyptna mathāna, kaja athumli khangachee chiwuitungli tāhairasai.

³⁹ Khayinkham khavai ana muiyā phayaimi, kala ngayāshong horkhavai mei mi.

⁴⁰ Athumna poda ana kongkui vānao khuirāmi, kala khavāt maleila kazingram eina kashakazā mi.

⁴¹ Ana lunghār shomida tara̱ wurshoka; siwukli kong thāda longa.

⁴² Kaja ana awui kathara khangashit, kala awui rao Abrahamli phaningunga.

⁴³ Chiwui vang ana awui mili mathānthup thānshokmi, awui kapangkakhuibingli laasak ngasha̱da.

⁴⁴ Kala ana yurbingwui ngalei athumli mi; kala mina vāsang kahai chiwui athei athumna hāta,

⁴⁵ khanao eina tangda athumna awui ain kala shiyan chikan mayon khavaina. Proholi solu!