LAA 104 - Kathara Bible (BSI)

Kasemali Masotkhami

¹ Proholi solu, O imanglā! O Proho, iwui Vare, na reikhamataiana! Khayā eina wungngam nawui sārina,

² kahorna kachon thāda na khalatta ngavai, kachonshim thāda kazing chi nana hārhai,

³ tara̱tungli nawui shimwui khāngen haida, muiyāli nawui siguigari sāngasaka, masiwui angachāngtungli tongkazata,

⁴ masili nawui paophunga sāngasaka; mei kala meiwonna nawui otram ngatha̱mi.

⁵ Okathuili nana awui shimphungali rungshinghai, chithāda manganuklakmara.

⁶ Kathuka china kachon sāda nana khaluimi; phungreitungli tara̱na nganingkai,

⁷ Nana kakharar eina athumna yāma; nawui khangashumkhon kashā eina athum yāmhaowa.

⁸ Kaphungna juikai, tampākna nemzanga, nana sāmi kahai kachichāwui pamli.

⁹ Athumna makānshok khavai nana thari akha eina sākhammihai, chieina athumna okathui machipemlui khavaina.

¹⁰ Nana tampākli ura̱ shokngasaka; kala kaphung ngachaili kong longngasaka.

¹¹ Ramsābingna khamang tara̱ samphanga; ram gadhābingna chi mangda ra̱kachang chirkhui.

¹² Chibingna khamasaiwui vānaobing pamkhavai samphang ngasaka; athumna thingphānglungli laa sai.

¹³ Nawui kajuiyapam eina nana phungreili tara̱ chaimi; nana sakahaiwui athei shaida okathuina ningyang unga.

¹⁴ Sha̱keiwui vang nana khawo thuingasaka, mina lingsang khavai arong leingasaka, mili khangachona sayurwui vang azāt shokngasaka; chithāda ana ngaleiwui eina zākhavai shokngasak khavaina,

¹⁵ kala mina ning mathān khavai drakhāra̱, mai horkhavai thao, miwui ning pangsang khavai kashakazāla mi.

¹⁶ Prohowui thingrongbingli mavātla tara̱ chaimi, ana lingsang kahai Lebanonwui cedarthingli.

¹⁷ Chiwui alungli vānaobingna athumwui athip sai; vārokna matangrongli shim sai.

¹⁸ Phungrei kajujui siraowui vangna; lunghārbing badgerbing ngayin khavaina.

¹⁹ Zurkān theikhavai kachāng sāmi; zimikna awui katun atam thei.

²⁰ Nana tangkhamang sai, kala chi ngayāna, ngahongwui sāyur saikorana atam chili ngara̱zatphoka.

²¹ Kazingkha̱naona sāshaiwui vang khanganga, Varewui eina athumwui kashakazā samphangkhavai.

²² Zimik kashok eina hanungda athumwui akhurli ungpihaowa.

²³ Mina awui otpamli vāda kazing mayingranglakha eina tangda awui ot sāpama.

²⁴ O Proho, nawui otsak shānla makakhui! Saikora hi nawui worthem eina sākakhuina; okathuili nawui manglākapaina pemtinghai.

²⁵ Vāklaida shamadru haklak eina kala mashālak eina lei, chili shānla makakhui manglākapai lei, kharei kateo kharingyur.

²⁶ Chili jahasna zata, kala nana semkahai Leviathanna chili ngareowa.

²⁷ Athum saikorana nali yangkai, mikharān atamli athumwui kashakazā mikhavai.

²⁸ Nana khami tharan athumna kazipkhui, napāng khuikashok tharan, chi khamathāna otna pemtinghai.

²⁹ Nana namai ngathum kahai tharan, athum malung ringhaowa, nana athumwui khaksui khuithui kahai tharan, athum thihaida chifali hanunghaowa.

³⁰ Nana nawui Manglā chihokharā tharan, athumli semkhui; kala nana okathuiwui amai dharngasaklui.

³¹ Prohowui tekhamatei mashimānda leichingranu, Prohona awui otsakli mathānranu,

³² ana okathuili yangda chi nganuka, kaphungli sāza̱da meikhut shoka!

³³ I ringlakha eina tangda Proholi ina laa sāra, I leilakha eina tangda iwui Vareli ina masot chigatra.

³⁴ Ina Proholi khamachuk ningyāngungranu, kaja ina Proholi mathāna.

³⁵ Morei kaphungbing okathuiwui eina shimānhaoranu, kala makhayābing maleiluiranu! Proholi solu, O imanglā! Proholi solu!