LAA 103 - Kathara Bible (BSI)

Varewui Leikashi

¹ Proholi solu, O imanglā; iwuklungli khalei tongdana kathara amingli solu,

² O imanglā, Proholi solu, awui sākhami saikora mamalaihaialu,

³ nawui khayon saikora pheokhame, nawui kakazā saikorala raikhame,

⁴ Chomwui eina namanglā ngatangkhuime, makhangachei leikashili lukhamashan eina nali ngarormi,

⁵ na ringlakha eina tangda khamathān eina ningyāng ungngasaka, nawui yarthot khalāng thāda pangngasaka.

⁶ Rekkharek kahaiabingwui vang Prohona mashun athut hāngsangmi.

⁷ Awui apong Mosesli chitheimi, awui otsak Israelli theikhui ngasaka.

⁸ Proho lumashan leishi katha̱ana, malung mathuizarmana makhangachei leikashina pemtinghai.

⁹ Ana makhararchingmara, malungla mavātchingmara.

¹⁰ Ithumna morei kasā athishurda khayon kasānilala chiwui athishurda tāzak athut makhuimana.

¹¹ Kaja kazingna okathuili juimeikharda khalei thāda, ali khangacheebingli awui makhangachei leikashi hakmahālaka;

¹² zingshona eina zingtunwui katā thāda ana ithumwui eina ithumwui khayonkhamāng tālak eina khuithuimihai.

¹³ Avāva̱na anaomayarali lukhamashan thāda, ali khangacheebingli Prohona lumashana.

¹⁴ Kaja ana ithumli khi eina sākhuikhala kaji ana thei, ithum chifana kaji ana phaningunga.

¹⁵ Miwui mirinva khawo kathāna; luili khawon awon kathāna;

¹⁶ chiwuitungli masina phankaza̱ eina shimānhaowa, kali leikhala kaji matheiluimana.

¹⁷ Kha Prohowui makhangachei leikashi, katang makhavaiwui eina katang makhavai chi ali khangacheebingwuitungli lei, kala awui khamashung khangarong chi naongarābingwui naongarātungli lei;

¹⁸ awui tuingashit khamayonabing, kala awui ningkhami athishurda kasābingli leishi.

¹⁹ Prohona awui wungpamkhong kazingramli sākāhaira, kala awui wungramna saikorawuitungli mungsera.

²⁰ Proholi solu, O awui kazingrao nathum, awui kakaso kasā kapanga nathum, awui khon chili khanganābing!

²¹ Awui mi hupta Proholi solu, awui kaphaning sāda otram khangathabing!

²² Proholi solu, awui ot saikora, awui khamung apam saikorali. Proholi solu, O imanglā!