LAA 101 - Kathara Bible (BSI)

Awungawui Tuingashit

¹ Khayākashi eina mashunwui laa ina sāra, O Proho, nali ina laa sāra.

² Shātmakakā apong chili ina zatra, Iyavo, na katharan iwuili rārakhala? Iwui shimli iwuklungwui ningsākhangazip eina ina zatra.

³ Makaphāna kaji otli imikna mayangsangmara. Ning ngacheithui kahaibingli ina yangkharinga; china ili mangavapmara.

⁴ Wuklung khamakhao iwui eina tāthuihaora; makaphā kaho ina mayangsangmara.

⁵ Khongnainaoli ngathumda khamashāt, ali ina shimān ngasakra. Hiksor kahai kala langkaso mili ina mamayāmara.

⁶ Ina ngalei chili khalei shitkasangbingli ngahānkhangai eina yangmira, chithāda athumna ili ngasopamra; shātmakakā apongli kazatana ili otram ngatha̱ra.

⁷ Mikhanam ot kasābing iwui shimli mapampaimara; kakapik tui khamatuiana iwui ngalemli maleipaimara.

⁸ Ngalei chili khalei makhayābing saikora chi, ngathor kachida ina shimān ngasakra, Prohowui keinungwui eina makaphā kasā saikorali katathaora.