LAA 10 - Kathara Bible (BSI)

Mashunwui vang Seiha Kasā

¹ Khisāda katāva̱li anganinghaokhala, O Proho? Kakhanang atam tharan khisāda ngathumhaokhala?

² Makhayā mi china langsoda khangazanali kharoma; athumna sākakhui themsak chili athum khalatta tāzangranu

³ Kaja makaphā china wukli ningkachāng chieina lāngsoi, kala kakharāma mi china tongzā khavai Proholi mamayāla khonshi.

⁴ Makaphā china awui langkasowui vang Vareli maphāmana, awui kaphaning saikorali “Vare maleimana” kaji mānga.

⁵ Atam kachida awui apong mataisanga; nawui bichar china awui theikashapli juimeikhāra; awui yangkashe saikorali mana̱shi.

⁶ Ana awui ningli phaninga, “Ili mangatha̱ ngasakrarlakmara; mithot peida I yangkashe masamphanglakmara.”

⁷ Akhamorli khonkashi, kakapik kala rekakharekna pema; awui maleli makaphā kasā kala khayonkhamāng mānga.

⁸ Ana kha̱ kha̱li rimpama; khangathum pamli khayon makhalei mili shaothata. Awui mikna makathukbingli ra̱yanga.

⁹ Kazingkha̱na awui ngathum khavaipamli ngathumda rimkapam thāda, ana khangazanali tukkhui khavai ngathumpama, ana awui khalenli kashamsanglaga ana khangazanali tukkhui.

¹⁰ Khangazanabingli akha̱ sāmihaira, athum kongluiya; awui pangshapwui azingli athum pisanga.

¹¹ Awui ningli, “Varena malaihaira, a ngathumhaira, ana kachilikha matheiluimara” da phaninga.

¹² Ngakarthuilu, O Proho, O Vare, napāng khāngkālu; kachotabingli mamalaihaialu.

¹³ Kachiwui vang eina makhayā mi china Vareli mamayāla awui ningli, “Nana danti mamimarada” phaningkhala?

¹⁴ Nana thei; mha, kakhanang kala malungkakang nana theisera, napāngli nana kakhuisingmisi kaja; makathukana akhalatta nali misangli; Nava avāva̱ makhaleibingwui ngachonkhamena.

¹⁵ Makhayā kala zakkashi kasā chiwui pāngthei nana sātekmilu; awui makaphā chi makānranglakha eina tangda nana phākhuimilu.

¹⁶ Mashimānda Proho hi awungana; yurbingna awui ngaleiwui eina shimānserra.

¹⁷ O Proho, malungkhanimawui ningkachāng chi nana shāmira; athumwui wuklung nana pingngasakra, nana nāshungmira,

¹⁸ avāva̱ makhalei nao, kala rekharek kahaibingwuitungli mashun sāmikhavai, chieina okathuili khalei mina sāshida masāluimara.