KHALATLUI 4 - Kathara Bible (BSI)

Kahāng Nganā khavai Mosesna Israelli Kapo

¹ “Chieina ara, O Israel, ina tamchithei kahai ain kala shiyan-chikanbing chi ningkachang eina mayonlu, kala chibing chi sālu; chithakha nathum ringra, kala navā ngarāwui Proho Varena mikahai apam chili nathumna vāda samphangra.

² Ina kagaso tui chili nathumna mangarumsangalu, khuikashokla makhuishokalu; chithāda ina nathumli kagaso, Proho nathumwui Varewui ningkhami chi mayonlu.

³ Baal-peorli Prohona khisākhala kaji nathumwui mik eina theihaira; kaja nathum ngachaiwui eina Peorwui Baalli kashurabingli Proho nathumwui Varena shimān ngasakserhaira;

⁴ kha Proho nathumwui Vareli ngashiktit kaje nathumna aja eina tangda ringdalei.

⁵ “Yanglu, nathumna vāzangda samphangki kaji ram chili nathumna shurphalungki kaji ain kala shiyan-chikan, Proho iwui Varena ili kagaso athishurda ina nathumli tamchitheihaira.

⁶ Saikora chi mayonlu kala sāchinglu; chi nathumwui thangkhamei kala theishingkakhui awor ngasāra, kaja yur khangateina shiyan-chikan hi shālaga, ‘Thangkhameiya kala theishingkakhuiya kahaka yurlaka’ da hāngra.

⁷ “Kaja ithumna khangakao tharan, Proho ithumwui Varena nganaikhami thāda nganaikhame khiyurwui vare leikhala?

⁸ Kala nathumli ina aja hāngchithei kahai khangaronga ain hikathā khiyurwui ain kala shiyan-chikan leikhala?

Horebli Kashok Phaningkhaung

⁹ “Ning ngasharmalu, ningli phumtithailu; nathum mik eina theikahai chila malaihaipaishina, kala mirin peida yansāngthuihaipaishina; nathumwui naongarā kala ara̱-azālila chi hāngchitheilu—

¹⁰ Horebli Proho nathumwui Varewui mangāli chithang nathumna nganingda leilakha, Prohona ili, ‘Mibing chi ili kazipkhuimiserlu; kaja ina iwui tui hi athumli shāser ngasakra, chieina athumna okathuili ringlakha eina tangda ili khangachee tamkhuida athumna athumwui naongarāli tamchitheira.’ da hānga.

¹¹ “Kala tangmangting eina kazika muiyāli ngasoda phungrei chi mei kazingram kāzokza̱da chuilakha, nathumna nganaida phungreili rānganinga.

¹² Chiwui thili Prohona meilungwui eina nathumli hāngshoka; khamatuikhon chi nathumna shai, kha azakva matheimana; akhonmāng kashāna.

¹³ Kala nathumna sāki kaji awui tuingashit ningkhami tharā chi ana hāngmi; kala ana lungphek khanili chi kapisangmi.

¹⁴ Kala atam chili Prohona ain kala shiyan-chikan chi tamchithei khavai ili kasoi, chithāda nathumna vāzangda samphangki kaji ngalei chili nathumna chi mayonki kajina.

Meoma̱li Makhorum khavai Hāngkhamachin

¹⁵ “Chiwui vang eina nathum khalatta ning ngasharlu, kaja Horebli Prohona nathumli meilungwui eina chān ngazekthang nathumna azak matheimana;

¹⁶ ning ngasharlu; kaja nathum khalatta mangui khavai, mayarnao ngamāndala, sha̱nao ngamāndala,

¹⁷ okathuili khalei sā ngamāndala, kachikathā khamasaili angachāng kāda yongkazat vānao ngamāndala,

¹⁸ okathuili kachikathā ngawokazata, kathuka tara̱lungli khalei khaih ngamāndala meoma̱ masākhuialu.

¹⁹ Kala ning ngasharlu, kaja kazingramli yangkāda nathumna zimik, kachāng, sirābing, kala kazingramli khalei yur saikorali theida nathumna chili khorumlaga otram ngatha̱paishina; okathuili khalei saikora chi Varena mikahai chili nathum khorumthuihaipaishina.

²⁰ Kha nathumli Prohona awui mi sākhavai, hukkachihā meiwui eina, Egyptwui eina thānshokmida aja rāshungda khaleina.

²¹ Chili lāngda nathumwui vang eina Prohona ilila malungvātta, ana I Jordan makānpaimara da ngashita, kaja Proho nathumwui Varena nathumli shimlui sākhavai khami ngalei khamathā chili I mazangmara.

²² Kaja I ngalei hili thisangphalunghaora, I Jordan makānmara; kha nathumna kankāda khamathā lam chi samphangra.

²³ Nathum khalatta ningngasharlu, maningakha Proho nathumwui Varena ngashitmi kahai chi malaihaipaishina, kala Prohona makhamayā meoma̱ sakhuipaishina.

²⁴ Khikhalajila Proho nathumwui Vare hiya kachuiya meina kala mikpaishikatha Varena.

²⁵ “Nathumna ngalei chili pamda, naola kala ara̱-azāla kachungkha pharākhuida sāngda pānkahai tharan, azak khangatatei meoma̱ sākhuilaga sanguihaiakha, kala Proho nawui Varewui mangāli makaphā otmāng sāda Vareli malungvāt ngasakakha,

²⁶ nathumwui shākhi sākhavai aja ina kazing ngaleiwui mingzaida nathumli kahāngna, kaja nathumna Jordan kānda apamki kaji ngalei chili nathum masāngla shimān ngakanhaora; nathum chili sāngda maokthuimara kha shimānchaohaora.

²⁷ Kala Prohona nathumli miyurbingwui alungli chaiyāngmihaida, Prohona nathumli kashamkhavā miyurbingwui alungli nathum teolak kahai yur sathuihaora.

²⁸ Kala chili nathum, mipāng eina sākakhuia, mikla makathei, khanāla makashā, anganamla makhanganama thing ngalung varebing chili khorumra.

²⁹ Kha chiwui eina nathumna Proho nathumwui Vareli wuklung kala ning tongtingda ali phāluiakha, nathumna ali samphangra.

³⁰ Nathumna kachotkachāng samkaphang tharan, kala ot saikora hi nathumli naoda rākashung atam chitharan nathumna Proho Vareli latungda awui khon nganāra,

³¹ kaja Proho nathumwui Vare chiya lumashankatha Varena; ana nathumli horkahai masāmara, lah masāshimānmara, lah navā ngarāli tuingashit sākahai chi ana mamalaimara.

³² “Kaja arui ngahānlu, thuikahai atam kala na mapharāranglakhawui alungli Varena okathuili mi semthang eina thuida, kala kazingram akatang akhawui eina khangatei akatangli, hikathā kahaka ot mashokhaira, lah mashāhaira? da ngahānlu.

³³ Nathumna kashā thāda yur khangatei khipāshina varewui tui meilungwui eina matuida shālaga ringda leili?

³⁴ Maningakha akhalattawui vang yur akhali khangatei yur akhawui eina chāng yangda, matakhak kahai masākharar khudam eina, tekhamatei eina, kala rai eina, kapanga pāng eina pāngthei katingshokta, lah kahaka khangachee otsak eina, nathumwui miktāli Egyptli nathumwui vang Proho nathumwui Varena ot saikora sākhami thāda kachikathā vare akhana sāmiyanghairala?

³⁵ Nathumli hi chitheihaira, kaja Proho hi Varelaka kaji nathumna theihaira; a maningla khangatei maleiluimana.

³⁶ Kazingramwui eina ana nathumli awui khon shāngasaka; kaja ana nathumli machin khavaina; kala okathuili awui kahaka mei theingasaka, kala meilungli nathumna awui akhon shai.

³⁷ Kala navā ngarāli ana leikashiwui vang athumwui thili athumwui ara̱-azāli kapangkhuida, kala a zangchaolaga awui kahaka pangshap eina nathumli Egyptwui eina thānshokmi,

³⁸ nathumli thānzang khavai, nathumwui mangāli hakkhamei kala pangkhamei yurbingli kashammihai, kala athumwui ngalei nathumwui shimlui sākhavai aja nathum hili khaleina;

³⁹ chiwui vang eina hi aja theilu, kala ningli shāptithailu; kaja kazing atunglila, ngaleiwui azinglila Proho hi Varelaka, khangatei maleiluimana.

⁴⁰ Chiwui vang eina ina aja nathumli kagaso hiwui athishurda Prohowui shiyan kala awui ningkhamibing chi mayonlu; chithakha nathum, kala nanaongarābingla ringphāmeira, kaja Proho nathumwui Varena metchang kahai ram chili sāngmeida okthuira.”

Ngayin khavai Keinungbing

⁴¹ Chiwui thili Mosesna Jordan kānda zingshoshong keinung kathum phaishokmi;

⁴² kaja kachikathāna awui khongnaili rida yangkashi maleila sateihaida mi sāthathaiakha, mi shaokathatana manglā kankhavai, ana keinung hibingli ngayingkhui khavai chili ayāmsangra:

⁴³ Reubenshiwui vang Bezer lamhāng, kala Gadshiwui Gileadli khalei Ramoth, kala Manassehshiwui vang Bashanli khalei Golan, keinung kathum hina.

Ain Phaningungching khavai

⁴⁴ Israel naoshinaobingwui mangāli Mosesna ain khami chi hina,

⁴⁵ kaja Egyptwui eina kashok tharan, Mosesna Israelnaobingli hāngkachithei ain kala shiyan-chikanwui apong, kala mashun tuibing chi hina,

⁴⁶ Beth-peorli kāroda khalei Jordan tampāk kankāda Amorwui awunga Sihonwui ngaleili leilakha kahāngna, Sihon hiya Heshbonli pamkasā Mosesna thānda Israelnaobingna Egyptwui eina kashok tharan maikashi mikahaipā china.

⁴⁷ Awui lam kala Bashan awunga Ogwui lamla, Jordan kānda zingshoshong mungkasā Amornaowui awunga khaniniwui lam athumna khui;

⁴⁸ chiya Arnonwui tampākpheili khalei Aroer eina thuilaga Sirion (chiya Harmon) vāshunga;

⁴⁹ kala Jordan zingshoshong khalei Arabah Ngayi katonga vāshungda Pisgah phungrei pheili thari sākhui.