KHALATLUI 34 - Kathara Bible (BSI)

Moseswui Kathi

¹ Kala Mosesna Moab tampākwui eina Jericholi kāroda khalei Nebowui Pisgah Kaphungli kai. Kala Prohona ali ngalei saikora chithei; Gilead eina thuilaga Dan tāshunga,

² Naphtali ngalei hupva, Ephraim eina Manassehwui lam kala zingtun shamadru vāshungda Judahwui lamna;

³ Negeb, kala tampāk, chi khaneirongwui keinung Jerichowui tampāk, Zoar vāshungda.

⁴ Kala Prohona ali hānga, “Abrahamli, Isaac kala Jacobli, ‘ina nara̱ ngarāli mira’ da ngashit kahai ngalei chi hina. Ina nali namik eina yangkhui ngasakhaira, kha na chili kazang masamphangmara.”

⁵ Chiwui vang Prohona hāngkahai athishurda Prohowui rao Moses Moab ngalei chili thihaowa.

⁶ Kala Prohona Beth-peorli kāroda khalei Moab ngaleiwui tampākli ali chifahaowa, kha aja eina tangda awui chifa khavaipam khipākhana matheimana.

⁷ Moses kathi tharan a kum shākha maga̱ rarhairasai; amik mangazanmana, lah awui pangshapla masuitālakmana.

⁸ Kala Israelwui mibingna Moabwui tampākli Moseswui vang thumrāthang chapngachai; chiwui thili awui vang chapkhangachā chi tanghaowa.

⁹ Mosesna pāng khāngkāda somi kahaiwui vang, Nunwui naomayara Joshua thangkhameina pemhaowa; kaja Mosesna awuitungli pāng parmi, chieina Israelwui mibingna awui kahāng nganai kala Prohona Mosesli kaso kahai athishurda sai.

¹⁰ Kala Israelli Prohona mai eina mai yangkhangasuna Moses kathā marān mashoklakranga.

¹¹ Kala Prohona Mosesli Egypt ngaleiwui Pharaoh kala awui rao saikora kala awui ngalei saikorali chihovāda mina masākharar matakhak kahai saikora kasā,

¹² kala hakkhamahā pangshap, khangachee-khangachā saikora Israel saikorawui miktāli Mosesna kasā hithāda, ā kathā khipānakha masalākranga.