KHALATLUI 3 - Kathara Bible (BSI)

Israelna Bashan Kakhui

¹ “Chiwui thili ithumna ngareikhuida Bashanvāk vai, kala awunga Ogna awui mi saikora thānlaga ngarar khavai Edre-ili rāngaroka.

² Kha Prohona ili hānga, ‘Ali mangacheelu; ala, awui mibingla awui ngaleila, ina nathumwui pāngli horsangmihaira; nathumna ali Heshbonli kapama Amorwui awunga Sihonli kasā thāda sāmira.’

³ “Chieina Proho ithumwui Varena Bashanwui awunga Ogla, kala awui mi saikora ithumwui pāngli sangmi; kala ithumna akhala mataimimana.

⁴ Kala ithumna Bashanli Ogwui wungram, Argobwui apam saikora—keinung akhanida makakhui maleimana: keinung hangtharuk khuiya.

⁵ Keinung saikora hi raipan juilak eina ngaveitit kahai, ngaveila veiruithing sāsangkazazak kahaimānga; chili lāngda makhangavei kha̱wung kachungkhala khui.

⁶ Kala ithumna Heshbon awunga Sihonli kasā thāda keinung kachiva̱ peichaoda sākazammiserhaowa; mayarnao, sha̱nao kala naoshinaobingla sāthatserhaowa.

⁷ Kha keinungbingwui sha̱kei kala otyur saikora ithumna ngaponkhui.

⁸ Chithāda atam chitharan, Jordan makānda khalei Arnon tampāk eina thuilaga Harmon Kaphung shangshungda, Amorbingwui awunga khaniwui ngalei ithumna ngapaikhui.

⁹ (Sidonnaobingna Harmonli Sirion hosai, kala Amornaobingna Senir hoi),

¹⁰ kaphungli khalei keinung saikora, Gileadli khaleila, Bashanli khaleila, Salecah kala Edre-i shangshungda, Bashan awunga Ogwui wungram katonga ngapaikhui.

¹¹ (Kaja Rephaimbingwui eina taikashok Bashanwui awunga Ogmang leisai; yanglu, awui pet mari eina sāda maripet chiwui asān khuining chiko, kala aret khuining matina, aruila Amonbingwui Rabbah keinungli lei).

Jordanwui Zingshoshong Pānkahai Shangbing

¹² “Atam chitharan ithumna lam hi kakhui eina, ina Reubenshang eina Gadshangli apam mida chiwui leiret chi Arnon tampāk ayārli khalei Aroer eina thuilaga, Gilead phungrei ngalei ngakaipak, kala chiwui alungli khalalei keinung zangserlaga miya.

¹³ Kala Gileadwui katai eina Bashan saikora Og awungawui wungram katonga, chiya Argobwui wungram saikora ina Manasseh shang tangkhaili mi. (Bashanwui ngalei katonga chili Rephaimwui ngalei hoi.

¹⁴ Manasseh shangwui Jairna Argobwui wungram saikora, chiya Bashan, Geshur kala Ma-acathwui thari vāshungda khui, kala kha̱ chili khalattawui ming phokta aja rāshungda Havvoth-jair hoi).

¹⁵ Machirli ina Gilead mi,

¹⁶ kala Reubennaobing eina Gadshangli ina Gilead leiretwui eina thuilaga Arnon tampāk vāshungda mi, tampāk alungthung thari sāda, Jabbok kong vāshungda, Ammonnaobingwui tharina.

¹⁷ Kala Arabahla Jordanna thari sai, Chinnereth eina thuilaga Arabahwui shamadru vāshungda; Salt Sea, kala Pisgah amai ungshungda china zingshoshongwui tharina.

¹⁸ “Kala atam chitharan ina nathumli kasoda hānga, ‘Ngalei hi Proho nathumwui Varena nathumwui ngasā khavai mihaira; nathumwui raimi kapinga saikorana raisāri shaksāda nachināngarā Israelnaobingwui mangāvāk vāra.

¹⁹ Kha napreiva̱̱ ngarā, naongarā, kala sha̱kei (kachungkha lei kaji ina thei) ina nathumli mikahaiya keinungbing hili haisāra;

²⁰ Prohona nachināli mangasāmkhui ngasakranglakha eina tangda, kala athumnala Proho nawui Varena athumli Jordan kānda mida khalei ram chi khuikahai tharan, ina mikahai kachichāwui lamli latungda sompaira.’

²¹ Kala atam chitharan ina Joshuali kasoi, ‘Proho nathumwui Varena awunga khaninili sāchithei kahai chi namik eina theihaira, chieina aruila nathumna vāki kaji wungrambing saikorali Prohona chithāda samiluira.

²² Nathum athumli mangacheepaimana; khikhalajila nathumwui vang ngararkhame chi Proho nawui Varena.’

Mosesli Canaan Mazang Khangasak

²³ “Kala atam chitharan ina Proholi ngakaoda hānga,

²⁴ ‘O Proho Vare, nawui sāshap-vāshap kala reikhamatai naraobingli sachitheithathar kajina; kaja kazingli, lah okathuili nawui sākashap thāda khi varebing leikhala?

²⁵ Jordan kānda khalei khamathā ram, mathalāk kahai phungreiram kala Lebanon kaho chi ila athei khavai kha-vāngasakmilu.’ da ina seihā sāda poi,

²⁶ Kha nathumwui vang eina Prohona ili malungvāthaida makhuisangmithuwa; kala Prohona ili hithāda hānga, ‘Na chi shaphaira; hiwui pongli hili lāngda ili mahāngluilu.

²⁷ Pisgahwui phungreitonli kālaga zingtunshong, atungshong, azingshong, kala zingshoshong kuimareida namik eina yangda ngashānkhuilu; kaja na Jordan hi makānmara.

²⁸ Kha Joshuali otsin chisinda ali katomlu kala pingngasaklu; kaja mibing hili ana thānvāda nana kathei apam chi ana athumli khuingasakra.’

²⁹ Chiwui vang ithumna Beth-peorli kāroda tampāk chili pamkahaina.