KHALATLUI 29 - Kathara Bible (BSI)

Moab Ngaleili Proho na Israelli Tuingashit Kasā

¹ Horeb phungreili tuingashit sākahai chili lāngda, Moab ngaleili leilakha Israelwui mibingli khangashit sākhavai tui hi Prohona Mosesli kagasona.

² Kala Mosesna Israel saikorali hokhuida athumli hānga: “Egypt ngaleili leilakha Prohona nathumwui mangāli Pharaohli kala awui raobingli kala awui ngalei saikorali kasāsā chi nathumna theiserhaira,

³ kachotkachāng, machut sākachithei, kala matakhak kahai ot kachungkha kasā chi nathumna thei;

⁴ kha aja eina tangda nathumwui ningli theikhui khavai, lah mik eina theikhui khavai kala khanā eina shākhui khavai Prohona nathumli mamiranga.

⁵ ina nathumli lamhāngli kum hangmati thānzathaira; nathumwui khangavai kashankachon makāklakmana, kala nathumna katong pheihopla makākmana;

⁶ nathumna zātla mazāranga, kala drakhāra̱ranu, zamsheiranu mamangranga, kaja, I Proho nathumwui Vare china kaji theikhui khavai kasāna.

⁷ Kala apam hili nathumna ungkashung tharan, Heshbonwui awunga Sihon eina Bashanwui awunga Ogna ithumli rāngarara, kha ithumna yuihaowa;

⁸ athumwui lam chi ithumna khui, kala Reubennaobing, Gadnaobing kala Manassehbingwui shangbingli ngayarmi.

⁹ Chiwui vang eina nathumna kasāsā saikorali ringphameida okthui khavai tuingashit hi ning ngasharda mayonlu.

¹⁰ “Nathum aja nathumwui wungva̱bingla, khararnaobingla, kala otva̱bingla, Israelnao saikora Prohowui mangāli nganingserda leili,

¹¹ nathumwui naongarā, napreiva̱ ngarā, kala nathumwui rāmrahli ngasopamda khalei kha̱minaobing, thing phākhame kala tara̱ tākhamebingla zangda leili,

¹² aja Proho nathumwui Varena nathumli tuingashit sākhavai, Proho nathumwui Varewui khangashit chili zangkhavai nathumna hili nganingda lei;

¹³ nathum kala navā ngarā Abraham, Isaac kala Jacobli khangashit thāda ana aja Proho nathumwui Vare chi ngasā khavai kala nathumna awui mi ngasā khavai kasāna.

¹⁴ Arui Proho nathumwui Varewui mangāli nganingda khalei nathummāngli tuingashit khuiki kaji maningmana,

¹⁵ kha aja ali ngarumda ithum kala hili leida khaleibingwui vangla kala khanaowa thotbingwui vangla zangsera.

¹⁶ “Ithumna Egypt ngaleili kathāda leisa kala yur kateiwui alungli kathāda unglaga shokkhala kaji nathumna theihaira;

¹⁷ kala nathumna athumwui yangkakharinga otbing, thing-ngalung, lupāsā kala sināwui meoma̱la athumwui alungli leikasā theihaira.

¹⁸ Sha̱naoranu, mayarnaoranu, shimkhurranu, shangranu ning ngasharlu, maningakha aja Proho nathumwui Vareli horhailaga yur kateiwui varebingli makhorum khavai ning ngasharlu; maningakha nathumwui ngachaili, kathiri kaphunga angayung kala kakhā athei khamathei thingrong kathā zanghaipaishina.

¹⁹ Tuingashit hi shālaga a khalatta ningli sotmasaoda kachikathāna, ‘Ngakaishida zatsālala ili kanmira’ da hāngpai. Kha hina khanimpamlila kathengpamlila kalākashi samphang ngasakra.

²⁰ Prohona ili mapheomimara, kha Prohowui malungkhavāt kala yuishikathei chi awuitungli mei kachui thāra, kala lairik hili kapi kahai khonkashi saikora hi awuitungli tāda okathuili Prohona awui ming sashimitmihaora.

²¹ Kala kumshātwui vang chikathā mili Israel shang katongawui eina kha̱kshoklaga, ainwui lairik hiwui alungli kapi kahai tuingashitwui khonkashi athishurda hi ali phungngasakra.

²² Kala shokrārāda khalei thot, nathumwui thili shokki kaji nathumwui naongarā kala ngalei katāva̱wui eina kharā yur kateibingna ngalei chiwui kachotkachāng kala Prohona kazātyur kachungkha kazā khangasak chi rākathei tharan hāngra—

²³ ngalei katonga hi machina kapem leikokva sahaida khikha malingkasanga, khikha makaphora, khawo makharshokapai, Prohona Sodom eina Gomarrah kala Admah eina Zeboiimli malungkhavāt eina shimān khangasak thāhaira—

²⁴ mha, yur saikorana, ‘Khiwui vang Prohona ngalei hili khisāthuda hithāda sāhaokhala? Hiyakha malungkhavāt hi khi maramwui vangkhala?’ da athumna hāngra.

²⁵ Chieina mibingna hāngra, ‘Egypt ngaleiwui eina thānkashok atamli, athumwui avāva̱ ngarāwui Proho Varena ngashitmi kahai chi athumna horkahaiwui vangna;

²⁶ kala athumna vāda khangatei varebingli otram ngatha̱da khoruma, athumna makathei kala ana makhamayā varebingli khokharumwui vangna;

²⁷ chiwui vang eina Prohona ngalei hiwuitungli malungvāthaida, lairikli kapi kahai khonkashi saikora chi hili tākhangasakna;

²⁸ kala malungvātnahaida Prohona athumli ngalei hiwui eina angayung phurshokhaida, hithāda ngalei khangatei akhali horsangmi kahaina.’

²⁹ “Thumkahai otsak chi ithum Proho Varewuina, kha ithumli phongmi kahai chiya katang mavaila ithum kala ithum naongarāwuina, kaja ain hiwui tui saikora ithumna mayon khavaina.