KHALATLUI 27 - Kathara Bible (BSI)

Varewui Ningkhami Lungphekli Kakapi

¹ Moses kala Israelwui khararnaobingna yaruili kasoda hānga, “Aja ina kagaso ningkhami hi mayonserlu.

² Kala nathumna Jordan kānlaga Proho nathumwui Varena nathumli khami ngalei chili akārkasang tharan, lungkhor kahakhakva khorlaga nāpkhavai eina nāplu;

³ Proho nathumwui Vare, navā ngarāwui Proho Varena nathumli ngashit kahai thāda, nathumli mikahai seina̱ eina khuira̱ khalong ngalei chili nathumna vākazang tharan, ainwui tuibing chi chiwuitungli nathumna kapisangra.

⁴ Kala aja ina kaso kahai athishurda nathumna Jordan kakān tharan, Eball Kaphungli lungkhor hi nathumna nāpkhavai eina nāpki kajina.

⁵ Kala nathumna apam chili Proho nathumwui Varewui vang ngalung eina hanphut akha sākhuira, nathumna chili mari ot eina masāpaimara.

⁶ Nathumna mashānkakhui lunggui eina Proho nathumwui Varewui vang hanphut sākhuira, kala nathumna chili Proho nathumwui Vareli rikkatā kachigat sāra;

⁷ kala nathumna ningyatchigatla pha̱phayāda chi shailaga Proho nathumwui Varewui mangāli ringphara.

⁸ Kala nathumna lunggui chiwuitungli ainwui tui saikora hi tharlak eina kapisanghailu.”

⁹ Kala Moses eina Levi pāngmonbingna Israelnaobing saikorali hānga, “Akhon mashokla nganālu, O Israel: nathum aja zimiksho Proho nathumwui Varewui mi ngasāhaira.

¹⁰ Chiwui vang eina aja ina kagaso hi Proho nathumwui Varewui shiyan kala awui ningkhami mayonda awui kahāng nganālu.”

Kahāng Makhanganābingli Khonkashi

¹¹ Kala chithang ngalāngda Mosesna mibingli hāngchithei,

¹² “Nathumna Jordan kong kānkakā tharan, Simeon, Levi, Judah, Issachar, Joseph kala Benjaminnaobing hina Gerizim Kaphungli mibingwui vang somi khavai nganingra.

¹³ Kala Reuben, Gad, Asher, Zebulun, Dan kala Naphtali hibing hina khonshi khavai Eball Kaphungli nganingra.

¹⁴ Kala Israel mibing katongali Levinaobingna panglāk eina vaora:

¹⁵ “‘Yekkakhui meoma̱ranu, lah heikakhui meoma̱ranu Prohowui mangāli ningkakachai otna, them kathemawui pāng eina sākakhui ot kala ngathumda kahai mi chili khonkashi ngasāranu’ da kahāng eina, mi saikorana ‘Amen’ jira.

¹⁶ “‘Ava̱ avāli ngakaikashe mi chili khonkashi ngasaranu’ da kahāng eina, mi saikorana, ‘Amen’ jira.

¹⁷ “‘Khongnainaowui shimthari, luithari kaphur mi chili khonkashi ngasaranu’ da khavao eina, mi saikorana ‘Amen’ jira.

¹⁸ “‘Khangapeo mili shongfa thānkhangui mi chili khonkashi ngasāranu’ da kahāng eina, mi saikorana, ‘Amen’ jira.

¹⁹ “‘Kha̱mili, marānaoli kala ra̱meinaowui mashun hāngmakheimi kahaipa chili khonkashi ngasāranu’ da kahāng eina, mi saikorana ‘Amen’ jira.

²⁰ “‘Avāva̱wui preiva̱li ngasopida avāva̱li maishi khangasaka mi chili khonkashi ngasaranu’ da kahāng eina, mi saikorana ‘Amen’ jira.

²¹ “‘Shakeili ngasokape mi chili khonkashi ngasaranu’ da kahāng eina, mi saikorana ‘Amen’ jira.

²² “‘Avāva̱wui naoranu, ava̱va̱wui naoranu, azarva̱li ngasokape mi chili khonkashi ngasāranu’ da kahāng eina, mi saikorana ‘Amen’ jira.

²³ “‘Aniva̱li ngasokape mi chili khonkashi ngasaranu’ da kahāng eina, mi saikorana ‘Amen’ jira.

²⁴ “‘Khongnainaoli ngathumda shaokathata mi chili khonkashi ngasaranu’ da kahāng eina, mi saikorana ‘Amen’ jira.

²⁵ “‘Khayon makhalei mili shaothat khavai pheizā kasā mi chili khonkashi ngasaranu’ da kahāng eina, mi saikorana ‘Amen’ jira.

²⁶ “‘Ain hiwui athishurda, makasā mi chili khonkashi ngasaranu’ da kahāng eina, mi saikorana ‘Amen’ jira.