KHALATLUI 26 - Kathara Bible (BSI)

Heiun Kachigat

¹ “Proho nathumwui Varena nathumwui shimlui ngarānmi kahai ngalei chili nathumna vāzangda kala vākhuida akasom tharan,

² Proho nathumwui Varena nathumli mikahai ngalei chiwui athei-arai matheikhare chi nathumna hātkakhui tharan, Proho nathumwui Varewui aming leikhavai ana kapangkakhuia apam chili luk eina khuivālu, kala awui ming chili leingasaklu.

³ Kala atam chitharan phungkasā pāngmon chili nathumna vāda, ‘Prohona ishāvā ngarāli mirada ngashit kahai ngalei hili ina rāsomhaira kaji hi nawui Proho Varewui mangāli ina hāngkaphatna’ da hānglu.

⁴ Chieina pāngmon china luk chi napāngwui eina khuilaga Proho nathumwui Varewui hanphut ngalemli haira.

⁵ “Kala Proho nathumwui Varewui mangāli nathumna hithāda ngahānkāra, ‘Ishāvā ngarāva ramkazat Aramnaona, kala athum kateokhamāngna Egypt ngaleili tāda yaozatsai; kala chili yur akha ngasāda hakmahālakhaowa, panglākhaowa kala chunglakhaowa.

⁶ Ithumli Egyptwui mibingna sāshilak eina sai, kala kachotkachāng kachungkha mi, kala kharita ot phungda rao sāngasaka.

⁷ Chitharan ithumna ishāvā ngarāwui Proho Vareli khangakao eina ithumwui kapokhon Prohona khuisangmi, ithumwui kachotla, kakhanangla rekakharekla ana theimi;

⁸ kala Prohona ithumli Egyptwui eina awui pāngthei kharei kala pāngthei katingmida, khangachee khangachā, khudambing eina ngasoda matakhak kahai theikhui khavai sāchitheida thānshoka;

⁹ kala ana apam hili thanrāmida seina̱ eina khuira̱ khalonga ngalei hi ithumli miya.

¹⁰ Kala yanglu, O Proho nana ili khami ngalei hiwui athei matheikhare chi ara ina nali khuikharāna.’ Chiwui thili nathumwui Proho Vare mangāli haizanglaga Proho nathumwui Vareli nana khorumra;

¹¹ kala nali, nashi shimkhurli, Levinaobingli kala ngasokazat kha̱minaobingli Proho nathumwui Varena khamathā khami chiwui vang ringphārumra.

¹² “Kakathuma kum heiun saikorawui tithe mikahai thili, kaja tithe khami kum sāhaoda, Levinaobing, kha̱minaobing, avāva̱ makhalei nao, ra̱meinao athumli mira, kaja athumna chi zālaga okthuiki kajina,

¹³ Proho nathumwui Varewui mangāli hithāda hānglu, ‘Nana kagaso athishurda, chili lāngda iwui shimkhurwui chigatkhangayi kathara yar chi Levinaobingli, kha̱minaobingli, avāva̱ makhaleibingli kala ra̱meinaobingli ina khuimihaira! Ina nawui kagaso akhala makasā maleimana, khamalaila mamalaimana;

¹⁴ Ina chapkhangachā atamli tithe masāza̱mana, I makathar atamliranu kakhuila makhuimana; kathinaolila machigatlakmana; ina iwui Proho Varewui kahāng nganāda kaso kahai makailakla sai.

¹⁵ Nawui katharapam kazingramwui eina khayangtāmilu; Israel mibingli kala ishāvā ngarāli ngashitmi kahai athishurda ithumli mikahai, seina̱ eina khuira̱ khalong ngalei hili kasomilu.’

Proho wui Mibing

¹⁶ “Aja zimiksho Proho nathumwui Varena nathumli ain kala shiyan-chikanbing chi mayon khavai nathumli kagasona; chiwui vang eina ningla manglāla tongtingda nathum ning ngasharda mayonlu.

¹⁷ Nathumna aja Proho chi nathumwui Varena kala awui athi shurra, awui ain, ningkhami kala shiyan-chikan, mayonra kala awui kahāng nganāra da Prohowui mangāli hāngphathaira;

¹⁸ kala Prohonala, ngashit kahai athishurda, nathum awui mibingna da aja hāngmihaira; kala awui kagaso saikora mayonlu jihaira;

¹⁹ kaja ana sākahai yur saikorawuitungli nathumli chipamra, masotla, ming khamayāngla, khayāla nathumli juimeikap ngasakra kala ana hāngkahai thāda nathuma Prohowui kathara miyur ngasāra.”