KHALATLUI 24 - Kathara Bible (BSI)

Kapāng kala Ngakumkhalui

¹ “Mi akhana ngalā khuilaga ali khangakum tharan, kalikhada ana preiva̱ chiwuitungli mamayākhangai khaleiwui vang, ana apāngli kapāngwui lairik kapisangmilaga awui shimwui eina kashamhaida, preiva̱ china awui shimwui eina shokhaiakha,

² kala preiva̱ china unghailaga mi khangateiwui preiva̱ vasāluida,

³ gahara khanaopa chinala ali maningchāngmada apāngli kapāngwui lairik kapisanglaga awui shimwui eina kashamshokhaiakha, lah ali apreiva̱ sara̱da kakhuia gahara kakhane chi thihaiakha,

⁴ preiva̱ chi sākhamāng kahaiwui thili; awui gahara khare china ali apreiva̱ sākhavai makhuiluipaimana, kaja chi Prohowui mangāli ningkakachai otna, kala nathumna hikathā eina Proho nathumwui Varena nathumli shimluikat mikahai ngalei chili khayon masāsangalu.

Khangatei Ainbing

⁵ “Mi akhana ngalā shakzādhadharakha, a rai mavāpaimana, kasaka otlila mazang ngasaklu; ana ngakum kahai apreiva̱li ngasoda ringphāda kumkha shimli ngasāmkhuiranu.

⁶ “Mi khipānakha leimanwui vang eina mā shirei khavai lah khamato ngalung chi makhuithuipaimana; kaja ana leimanwui vang mirin shimānmi kahai kathāna.

⁷ “Kachikathā mina Israelnao achinā akhali leekhuida, ana ali raonao thāda saakha lah ali yorzaakha, khalepa chi thiphalungra. Chithāda nathumwui ngachaili makaphā chi sāmathara.

⁸ “Ning ngasharlu, phārrei kazātli ning ngasharlak eina sākhavai, ina Levi pāngmonbingli kaso kahai thāda, athumna nathumli chiza̱ khami athishurda sālu, chithāda sāda nathumna ning ngasharda sāra.

⁹ Egyptwui eina kānshokta nathumna shongfali zatlakha Mariamli Proho nathumwui Varena khi sākhala kaji chi phaningunglu.

¹⁰ “Nathumwui khongnaili kachikathāna kachishut khalei tharan, khangashit chi khuikhavai awui shimli mavākālu.

¹¹ Nana kayāngli nganingra, kala nana chishut kahai mipa china khangashit chi nali khuishokmira.

¹² Kala a kachāma miakha, awui hamkahai ot chi nawuili mahaipialu;

¹³ zimik katun eina, nana awui hamkahai ot chi hanmihaida ana nali somira kala a piphuphaora; kala hi nathumwui Proho Varewui mangāli nawui vang khamashung otna.

¹⁴ “Nachināranu, khamiranu lah kachāma khangazanaranu nathum ngaleiwui keinungbingli khalei mili nathumna ngalang phāsanglaga marekharekalu;

¹⁵ nathum awui thangthangwui ngalangman zimik matunranglakha milu; (kaja a chāmhaoda, ana chimāngli ningshaiya); chi maningakha ana nali maringkaphā chi Proholi ngakaoda, chi nawui morei sapaishina.

¹⁶ “Naongarāwui vang avāva̱ ngarāli mashaothatpaimana, kala avāva̱ ngarāwui vang naongarāli mashaothatpaimana; mi kachiva̱li kachichāwui moreiwui vang chithitra.

¹⁷ “Nathumna kha̱miliranu lah avāva̱ makhaleiyaranu, athumwui mashun chi mamatui khayeimihaialu, lah ra̱meinaowui kachon leiham masāpaimana.

¹⁸ Kha nathum phaningunglu kaja Egypt ngaleili nathum raonao sasai kala Proho nathumwui Varena nathumli chiwui eina ngatangkakhuina, chiwui vang ina nathumli hi saluda kagasona.

¹⁹ “Nathumna mā kahāt tharan luilungli māvām malaihailala chi khuikhavai mahanvāluialu; chi kha̱minao, avāva̱ makhalei, kala ra̱meinaowui vang ngasāra; chieina Proho nathumwui Varena nathumwui pāngot saikorali somira.

²⁰ Nathumna olive thingrongli athei phākhui kahaiwui thili, nathumna vāluida makhuikhangakān aphāngbing chili maphāvaluialu; chi kha̱minao, avāva̱ makhalei, kala ra̱meinaowui vang ngasāra.

²¹ Nathumna drakhā yāmguiwui drakhāthei kaphā chitharan, chiwui thili atham mavāphāluialu; chi khaminao, avāva̱ makhalei, kala ra̱meinaowui vang ngasāra.

²² Nathum phaningunglu kaja nathum Egypt ngaleili raonao sāsai; chiwui vang ina nathumli hi saluda kagasona.