KHALATLUI 23 - Kathara Bible (BSI)

Yaruiwui eina Khangareng

¹ “Shangkhā vātkahai kala mayarnaowui khayā rimtā kahaia chi Prohowui kazipshimli mazangpaimana.

² Shāmnaona Prohowui kazipshimli mazangpaimana, awui ara̱-azāla thot katharā eina tangda mazangpaimana.

³ “Ammonnaobinglapai, Moabinglapai Prohowui kazipshimli mazangpaimana; athum khipākha thot tharā kashungranu mirin peida mazangpaimana;

⁴ khikhalajila nathum Egyptwui eina kashok atamli athumna kashakazāla tara̱la mamimana, kala Mesopotamiali khalei Pethorwui eina Beorwui nao Balaamli pheisā milaga nathumli khonshi ngasaka.

⁵ Chithālala Proho nathumwui Varena Balaamwui tui makhuimana, kha Proho nathumwui Varena khonkashi chi nathumwui vang sokhami onngasaka, kaja Proho nathumwui Varena nathumli leishilāka.

⁶ Athumli mashit khavai maleimana, lanla kahao khavai maleimana.

⁷ “Nathum Edomnaobingli machinpaimana, kaja athum nachināsera; nathumna Egyptnaobingli machinpaimana, kaja nathum aramli khami sāda pamsai.

⁸ Naothot kakathumli kapharā athumwui naobingna Prohowui kazipshimli zangpaira.

⁹ “Nathumna yangkashebingli rai ngararda, rāmrahli leilakha makaphā ot chi masā khavai ngarangphalungra.

¹⁰ Nathumwui ngachaili kachikathāna ngayāshong pha̱ra̱ unghaida matharakha, ana rāmrahwui ayarli shokpamsāra, a rāmrahlungli mazangpaimana;

¹¹ kha zingyinlam, a khalatta tara̱ eina ra̱vaira, kala zimik katun eina ana rāmrahlungli zangpaira.

¹² “Nathumwui ngachir ngarang khavai apam rāmrah ayārli sāra, kala nathum ayār chili vāra;

¹³ kala nathumna thing akharip, khutlai eina ngasoda ngathānphungra kala nathumna ayār khavā tharan chieina ngalei kotlaga yātphumki kajina.

¹⁴ Khikhalajila Proho nathumwui Varena nathumwui rāmrahlungli yaozatta kanmi khavai kala yangkashebingli nathumwui pāngli horsangmi khavai khaleiwui vang, rāmrah tharmathengda haiphalungra; nathumwui alungli ana makathar ot theilaga thuihaipaishina.

Ain Khangatateibing

¹⁵ “Athumwui raonaona nathumli rayāmsangakha awui akhavāli mahanmiluipaimana;

¹⁶ ana nathumli pamrumra, ana ningchāngmeikapta kapangkakhuia nathumwui keinung akhali pamranu, nathum ali marekharekalu.

¹⁷ “Israelwui naongalāva̱bingwui einalapai, naomayarabingwui einalapai, Israelwui alungli khayor otsak hikathā maleipaimara.

¹⁸ Nathum khayorva̱ akhawui aman, lah fa akhawui aman, Proho nathumwui Varewui kathara shimli khikha khangashit kasāwui pheisā mikhavai makhuirāpaimana, kaja khanini hi Proho nathumwui Varewui mangāli ningkakachai otna.

¹⁹ “Nathum pheisālapai, kashakazālapai, ot khangatateilapai, kachishut chitharan nachinā ngarāli atār makhuipaimana.

²⁰ Yur kateile atār zangda chishutpai, kha nachināli atār zangda machishutalu, chieina nathumna vākhuiki kaji ngalei chili nathumwui otsak kachiva̱li Proho nathumwui Varena nathumli somira

²¹ “Nathumwui Proho Vareli nathumna khangashit kasā tharan, nathumna chi ngaironda mamipaimana; kaja kachangkhatta Proho nathumwui Varena chi ngaraira, kala china nawui morei ngasāra.

²² Kha nana ngashit kahai maleiakha, nawui vang morei maleimana.

²³ Nathumwui khamor eina hangtā kahai chi sākhavai ning ngasharlu, kaja nathumwui Proho Vareli naningsasak mayāda nakhamor eina hangtāda ngashit kahaina.

²⁴ “Nathumna khongnaiwui drakhā yāmguili khavā tharan nana shaikhangai eina tangda shaipai, kha nakhaoli masangungpaimana.

²⁵ Nathumna khongnaiwui luili khavā tharan, māmazān napāng eina mazokkhuipai, kha nathumna khongnaiwui luili chāngkui singlaga mahātkhuipaimana.