KHALATLUI 21 - Kathara Bible (BSI)Sāthat kahai Makatheiwui Apong 1 “Proho nathumwui Varena nathumli khami ngalei chili kachikathā mi akha khararli sāthathaisāda ali khipāna sākathatkhala kaji matheiakha, 2 nathumwui khararnaobing kala bichar samebingna chiwui ngalemli khalei keinung saikora, kathipamwui eina katā-khanai tamyangra; 3 kala nganaimeikap kaje keinung chiwui kathānabingna seilānao lāngkon masinglakrang kaji akha khuira. 4 Kala chiwui khararnaobing china tara̱ khalonga tampāk lamshālui akhali khuivada seilānao chiwui kahung tampāk chili sātekmihaora. 5 Kala Leviwui naongarā pāngmonbingna mangāli shokra, kaja Proho nathumwui Vareli otram ngatha̱mi khavai kala awui ming eina somi khavai athumli kapangkhui kahaiya, athumna khangapai kala khangashao saikora bichar sāda athumwui khak eina ngachamira. 6 Kala mi thisang khahaiwui nganaimeikap kaji keinung chiwui khararnaobingna tampāk chili akahung shireitekta sāthat kahai seilānao chiwuitungli pāng mazikrora; 7 kala athumna shākhi sāda ‘Ashee tākahai hi ithumwui pāngna maningmana, ithumwui mikna katheila matheimana’ da hāngra. 8 Kala, ‘O Proho, pheomilu, nana ngatangkhui kahai Israel mibingwuitungli khayon makhalei ashee hiwui khayon matā ngasakmilu, kha ashee hiwui morei kapheomilu’ da pora. 9 Chithāda khayon maleila sākathatwui khayon chi nathumwuitungli matā khangasak chi Prohowui mangāli khangarong ot kasāna. Raili Tukkhui kahaiya Sha̱nao 10 “Nathumna yangkashebingli rai ngararlaga, Proho nathumwui Varena nathumwui pāngli horsangmida, athumli tukkakhui tharan, 11 tukkhui kahai athumwui ngachaili ngalā khamathāva zangsāda nathumna ningchanghaida na khalattawui napreiva̱ sāda ali ngakumngaiakha, 12 ngalāva chi nawui shimli khuiungda awui kui simihaolu, pangringkorla chichāpmihaolu. 13 Kala ngalāva̱ china ali tukkakhuiwui kashankachon chi khuishokhailaga nawui shimli kachāng akhawui vang ana ava̱ avāli phaningungda chapngachāranu; chiwui thili nana ali ngasoda nani prei-gahar ngasāhaora. 14 Kha, nana ali maleishiluimada pānghaoga jiakha, awui thuikhangaili thuiranu; kha nana ali mayorzāpaimana, nana ali sāmashāthaoda chiwui vang ali raonao thāda masāpaimana. Khangatei Ainbing 15 “Kalikha mi akhana preiva̱ khani leilaga akhali leishi, akhali maningchāng-ilala, anina nao pharāmithathuida ana maleikashiva̱na mayarnao pharārihaikha, 16 ana awui naomayarabingli shimlui khayar tharan, ana maningkachānga preiva̱ chiwui pharākhare naomayara leilakha awui leishikhameiya preiva̱wui naoli khararanada masāpaimana; 17 kha ana maleikashe preiva̱na pharākhare nao chi yaronshaplakhawui nao sāthuda, awui khalei saikora khanishida chungmeida ali mira.” Mahengkasanga Naomayarawui pongli 18 “Mi akhana ngakaishitingting kaji kala ngakaikashe mayarnao nganaoda, avāva̱ kala ava̱va̱wui khak makashā, rākla makhuisangakha, 19 ali avā eina ava̱va̱na kha̱wui ngavei ngalemli khararnaobingwui mangāli shimenvāmida, 20 anina kha̱ chiwui khararnaobing chili hāngra, ‘Iniwui nao hi ngakaishitingting kahai kala ngakaikashe, iniwui tuila makhuilakmana; morkahāk khamaripli akachang sai.’ 21 Chithakha keinung chiwui mibing china ali ngalung eina horthathaora; kala nathumwui eina makaphā ot chi sāmathāhaida, Israel katongana theilaga ngacheera. 22 “Kachikathā mi akhana kathi danti samphangkhangayi mithit kashong sāhaida, nathumna ali shaothata thingtungli phāshi saakha, 23 awui angun chi ngayā pongda mahaipipaimara, kha chithang chifa ngalāngki kajina; kaja phāshi sākahai mi hiya Varena khonshi kahaiya otna; chiwui vang eina Proho nathumwui Varena mikahai ngalei chi masākhamāng ngasakphalungmara.” |
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.
Bible Society of India