KHALATLUI 17 - Kathara Bible (BSI)

¹ “Nathumna seilapai, yaolapai achuk makapei kala khangakhai-khangarai eina Proho nathumwui Vareli mapha̱paimana; kaja chi awui mangāli ningkakachai otna.

² “Proho nathumwui Varena khami kachikathā keinung akhali, nathumwui ngachaili sha̱naolapai, mayarnaolapai, Proho nathumwui Varewui mikyanli makaphā ot sāda awui tuingashit kaida,

³ kala vare khangateibingli vāda otram angatha̱da khorumthuihaiakha, lah zimiklilapai, kachānglilapai, kala ina makhamayā kazingramli khalei khangatateililapai khorumakha,

⁴ chikathā pao chi nathumli hāngda nathumna kashā tharan meisā eina ngathingkhuilu; kala hikathā ningkakachai ot hi Israelwui alungli sāhaira kaji mashungakha,

⁵ nathumna chikathā makaphā kasapā kala kasāpava̱ chili ngaveili khuivāda nathumna lunggui eina horthathaolu.

⁶ Shākhi khani lah kathum leiakha thikhangayiya a chili shaothatra, kha shākhi khami akhamāngwui eina masāthatpaimara.

⁷ Shākhi sāmebing china ali shaothat khavai pāng parrikapra, chiwui thili katei mibingna zangnaora. Chithāda sāda nathumwui alungli makaphā otsak khalei tharngasakki kajina.

⁸ “Nathumwui keinung alungli mi akha eina akha shaothat khangarok, akha eina akha shimlui khangapai nilala, akha eina akha ngama̱-ngashao khangarok nilala, tui shokhaida nathumwui vang saknāhaiakha, Proho nathumwui Varena kapangkhuiki kaji apam chili khuikāda,

⁹ Levi pāngmonbing kala rida phungkasā bichar samebingli angasanlu; nathumna athumli ngasanda athumna nathumli tuiret chi hāngmira.

¹⁰ Chieina Proho nathumwui Varena kapangkhuiki kaji apam chili athumna hāngkhami athishurda nathum ning ngasharda makailakla sālu;

¹¹ athumna tuiret khami thāda, kala athumna sālu kaji athishurda nathumna sāki kajina; athumna hāngkahai chiwui eina kateokhala khayeiung khayeivā masāpaimana.

¹² Proho nathumwui Varewui mangāli otram ngatha̱da khalei pāngmonwui tui nilala bicharsamewui kahāng nilala manganāla ningkap eina kasāpa chili shaothatlu; chieina nathumna Israelwui alungli makaphā otsak samathā ngasaki kajina.

¹³ Kala mi saikorana shālaga ngacheeda mi kachiva̱na kachichāwui ningyat eina masāphaphālengluimara.

Awungawui pongli Tamkachithei

¹⁴ “Proho nathumwui Varena nathumli khami ngalei chili nathumna akapān tharan, nathumwui kuikhamareili khalei, ‘Yur kateiwui thāda ithumla ithumwui awunga leira’ jiakha,

¹⁵ Proho nathumwui Varena kapangkakhuipa chili awunga sāngasakra. Nathum ngachaiwui eina achinā akhali nathumwui awunga sangpaira; kha nachinā makhaninga yur kateili masangpaimana.

¹⁶ Awunga china awui vangmāng sigui kachungkha makeipaimara kala sigui keikhavai Egyptli mi machihopaimara kaja Prohona, ‘Nathum chishong mavāluilakalu’ da nathumli hānghaira.

¹⁷ Awui ning mangachei khavai preiva̱la kachungkha makhuipaimara, sinā kala lupāsā a khalattawui vang kachungkha makazippaimara.

¹⁸ “Ali awunga sangda ana awui wungpamkhongli kapam tharan Leviwui pāngmonbingna ain lairik kahai chi a khalattawui vang ana ainbing hi kapilaga lairikli haira;

¹⁹ kala chi awuili haida, awui mirin peida ana pākhavaina, chithāda sāda ana ain kala shiyan-chikan saikora hi awui Proho Vareli khayākashi tamkhui khavaina;

²⁰ kaja achinā ngarāli a reimeiya da maphaning khavai kala ningkhamiwui eina uishong yāshong mangareithui khavaina. Chithāda sāda a kala anaongarā awui wungram Israellungli okpeimeira.”