KHALATLUI 12 - Kathara Bible (BSI)

Khorum khavai Apam

¹ “Navā ngarāwui Proho Varena mikahai ngalei chili nathumna okthuilakha eina tangda ningngasharda mayon khavai ain kala shiyan-chikanbing chi hina.

² Kachangkhat eina nathumna kashamshokki kaji yurbingna otram khangatha̱ athumwui varebing, kajuiya phungreili kala phungrābing, kala khamateka thingpheilila khalei apam saikora sākazamiserra;

³ nathumna athumwui hanphutbing pheikhaira, kala athumwui pakra̱ shaokhailaga athumwui Asherim meili riktāmira, kala athumna semkakhui meoma̱ saikora shaokhaimihailaga athumwui aming apam chiwui eina sāshimānhaolu.

⁴ “Proho nathumwui Vareli chithāda masāmara.

⁵ Kha, aming leikhavai kala awui pamkhavai kali-kalikharano, shang katongawui eina apam chi phākhuida Proho nathumwui Varena kapangkakhui chi phākhuiki kajina,

⁶ kala kachikachiliranu nathumna nathumwui rikkatā kachigat kala pha̱kaphayā, nathumwui tithe kala kachigat khami, nathumwui khangashit kachigat, lemmet kachigat, seinao, yaonao pharākharela, chili khuivāmiserra;

⁷ kala chili Proho nathumwui Varewui mangāli shaida nathumna mathānra; kasāsā kachiva̱li Proho nathumwui Varena somida nathumla, shimkhur katonga ringphāra.

⁸ Aruihon nathumna kachichāwui ningli theikakhui chiwui athishurda sākhangangai kasā thāda chile masāluimara;

⁹ kaja nathumli Proho nathumwui Varena miki kaji ngalei chili mavāpamranga, kala shimlui chi masamphangranga.

¹⁰ Kha nathumna Jordan kānlaga, Proho nathumwui Varena khami ngalei chili akapam tharan kala ana yangkashibingwui eina chingri ngasakta ning tāphup eina kapān tharan,

¹¹ awui ming leikhavai Proho nawui Varena kapangkakhui apam chili, ina kaso kahai saikora chi khuivāra: nathumwui rikkatā kachigatbing kala nathumwui pha̱kaphayābing, nathumwui tithe kala nathumna khuikharā khangatatei kachigatbing kala Proholi nathumwui khangashit kasāwui kachigat chila chili khuivāra.

¹² Chili nathum, nanaomayarabing, nanaongalāva̱bing, nathumwui rao mayarnao kala sha̱naobing kala nathumwui keinungli khalei shimlui mayarkasanga Levinaobing zangda Proho nathumwui Varewui mangāli ringphangarumra.

¹³ Nathumna kathathei apam kachida rikkatā kachigat saikora mapha̱phayāphāphā khavai ning ngasharlu;

¹⁴ kha nathum shangwui alungli Prohona kapangkhui kahai apam chili, nathumna rikkatā kachigat mira, kala ina kaso kahai saikora nathumna sāra.

¹⁵ “Chithālala, nathumwui keinunglungli nathumna sā sāthatta Proho Varena nathumli sokhami mikahai athishurda shaikhangangai eina tangda shaipaira, kathara kala makathara chila chaosā, lah seichuisā kashai thāda shaipaira.

¹⁶ Asheemāng chi nathumna mashaipaimara, chiya tara̱ heikatha̱ thāda ngaleili heitha̱haolu.

¹⁷ Tithe eina kachigat zāt, drakhāthei, thao, sha̱kei pharākhare, nathumna khangashit sākahai khangashit kachigat, lemmet kachigat, nana khuikharā kachigat kachichā keinunglungli mashaipaimara;

¹⁸ kha Proho nathumwui Varena kapangkhuiki kaji apam chili nathumwui Proho Varewui mangāli shaira, na, nanaomayara eina nanaongalāva̱, rao sha̱nao eina mayarnaobingla kala nathumwui keinungli khalei shimlui mayarkasanga Levibingla zangda Proho Varewui mangāli otsak khuikakā saikorali ringphāngarumra.

¹⁹ Nathumwui keinungli ngasopamlakha eina tangda Levinaobingli mahorhaipaimara kaji theilu.

²⁰ “Ngashit kahai athishurda Proho nathumwui Varena nathumwui leiret reisang khangasak tharan, nathumna sā shaingaihaoda ‘I sā shaira’ da hāngra, nathumna shaikhangai eina tangda shaipaira.

²¹ Kalikha Proho Varena awui ming haikhavai kapangkhui kahai apam chi nathumwui eina tānāhaiakha, Prohona nathumli mikahai seila, yaola, ina hāngkahai thāda sāthatpaira, taithatlaga ningkachāng eina tangda kachichāwui keinunglungli shaipaira.

²² Chao, lah seichuisā kashai thāda kathara mila, makathara mila shaipaisera.

²³ Theilu, kaja nathum ashee mashaipaimana; kaja ashee hiya manglāna; chieina nathumna asāli manglā eina ngasoda mashaipaimana.

²⁴ Nathum chi mashaipaimana, tara̱ heikatha̱ thāda ngaleili heitha̱haolu.

²⁵ Nathum ashee mashaipaimana; nathumna Prohowui mangāli khamashung otsak saakha, nathum kala nathumwui ara̱-azāwui vāngla phākhavaina.

²⁶ Kha kathara nathumwui eina chigatkharān otbing kala nathumwui khangashit kachigatbing, Prohona kapangkhui kahaipam chili khuivāra;

²⁷ kala nawui rikkatā kachigat chi nathumwui Prohowui hanphutungli asāla, asheela pha̱phayāki kajina; nawui pha̱kaphayā ashee chi Proho nathumwui Varewui hanphutungli chairorki kajina, kha asāva nathumna shaipai.

²⁸ Ina kagaso tui saikora hi rinsitta sākhavai ningngasharlu; Proho nathumwui Varewui mangāli khamashung khangrong ot saakha nathum kala nanaongarāwui vangla kaphā ngasāchingra.

Meoma̱li Khokharum Kakhām

²⁹ “Proho nathumwui Varena yur kateibingli nathumwui mangāli katatshok kahai chitharan kala nathumna athumwui ngalei chili vākasom tharan,

³⁰ athumli shurda nathumla khalenli mamanhaialu; athumli nathumwui mangāli shimitmi kahaiwui thili, athumwui varebingwui ponglila, yurbing hina kathāda athumwui varebingli otram ngatha̱khala?— ila chithāda sāsika da mangahānalu.

³¹ Proho nathumwui Vareli chithāda masāpaimana; kaja Proho nathumwui Varena ningkakachai saikora athumna athumwui varebingli sai; kaja athumna athumwui naomayara kala naongalāva̱ eina tangda athumwui varebingli pha̱da meili riktai.”

³² “Ina nathumli kagaso kachiva̱ nathumna ningngasharda mayontitra; nathumna hi suitādala lah mataidala masāpaimana.