JOSHUA 6 - Kathara Bible (BSI)

Jericho Yuikakhui

¹ Chitharan Israelwui mibingli ngacheehaida Jericho ngavei phākho ayarshongwui eina kala alungshongwui eina shungtithaowa; khipākhala kashok-kazang maleimana.

² Chieina Prohona Joshuali hānga, “Yanglu, ina Jericho kala chiwui awunga kala rai kapingabing eina ngasoda napāngli sangmihaira.

³ Nana keinung chili kuimareida nawui raimi saikorali ngasoda thangkhali kuikha khuira. Hithāda tharukthang kuira.

⁴ Kala pāngmon shinina yaovāngajiwui talla̱ shini khuiphungda oko chili rizatra, kala kashinethang nathum kala pāngmonbingna talla̱ khonglaga keinung chi shini shida kuira.

⁵ Kala athumna yaovāngajiwui talla̱ kasāngkha kakhong tharan, nathum talla̱khon chi shākhaleoda, mi saikora panglāk eina vaora; chieina keinungwui ngavei chi ja̱khuptahaora, kala mi kachiva̱na angatar eina muivāra.”

⁶ Chieina Nunwui naomayara Joshuana pāngmonbingli hokhuida hānga, “Tuingashitwui oko chi ngava̱kālu kala pāngmon shinina yaovāngajiwui talla̱ shini khuiphungda Prohowui oko mangāli zatngasaklu.”

⁷ Kala ana mibingli hānga, “Mangāshong zatvālu; keinung kuimareilu, kala raimibingli Prohowui oko mangāli zatngasaklu.”

⁸ Chieina Joshuana athumli kakaso athishurda pāngmon shini china yaovāngajiwui talla̱ shini khuiphungda Prohowui oko mangāli talla̱ khonga kala Prohowui oko khangava̱bing china athumwui thishura.

⁹ Kala raimibing china talla̱ kakhonga pāngmonbingli rizata, kala talla̱ mangasāmlakla kakhong eina khanukshong khangākabing china okowui thili zata.

¹⁰ Kha Joshuana mibingli hānga, “Ina nathumli vaolu da makasoranglakha eina tangda, nathum mangavaopaimara lah nathum khamorwui eina akhon akhala mashokpaimara; ina kasothang nathumna ngavaonaora.”

¹¹ Chieina ana oko chi ngava̱ ngasakta keinung chi akha shida kuingasaka kala athumna rāmrahli latungda chithang ngayā rāmrahli ungpisanga.

¹² Joshuana ngathorthak ngakarthui, kala pāngmonbing china Prohowui oko chi ngava̱khui.

¹³ Kala yaovāngajiwui talla̱ shini kasinga pāngmon shini china Prohowui oko mangāli rida khongzata kala raimibingna athumwui mangāli zata; kala talla̱ mangasāmlakla khongzat mamānda Prohowui oko khanukli rai khangākabingna zata.

¹⁴ Kala kakhanethangla athumna keinung chi akha shida kuilaga ngasām khavai rāmrahli latunga. Chithāda athumna tharukthang sai.

¹⁵ Kashinethang athumna ngathorthak ngakarthuida kharethang kasā tākam eina keinung chi shini shida akuiya: athumna shini shida kakui chithang mānga.

¹⁶ Kala kashine kakuile, pāngmonbingna talla̱ khongkaphok eina Joshuana mibingli hānga, “Ngavaolu; kaja Prohona keinung hi nathumli mihaira.

¹⁷ Keinung kala chiwui alungli ot khalei saikora sakazam khavaiwui vang Prohowui mingli chigathaora; khayorva̱ Rahab eina awui shimli leikasā mibingmang khākmara, kaja ithumna kachiho mi khanili ana thumiya.

¹⁸ Kha nathuma, sākashimānli zangkahai otbing chili mangamaralu, chi maningakha sashiman kahai otbing chi nathumna kakhui tharan Israelwui rāmrahli kashimān shokta rotkhamarāt rāra.

¹⁹ Kha lupāsā, sinā, kala pithrai eina mariwui tengkot hikathāthā Prohowui vāng khamataiana; hibing hiya Prohowui lan kazip khavaili ungsangra.”

²⁰ Chieina mibingna vaoshoka kala talla̱ khonga. Talla̱khon shāngasha̱da mibing china panglāk eina vaoshoka. Kala ngavei chi ja̱khup tahaida mibingna keinung chili zanga kala mi kachiva̱na angatar eina muivāda keinung chi khuihaowa.

²¹ Chiwui thili athumna keinungli khalei saikora, sha̱nao mayarnao, khararnaosan, sei, yao kala gadhā mateila saikora raighai eina sāthatserhaowa.

²² Chieina ra̱yang khavai kachiho mi khani chili Joshuana hānga, “Khayorva̱ chiwui shimli vālu, kala chiwui eina khayorva̱, kala awui shimkhurbing, nanina ngashit kahai athishurda akhuishoklu.”

²³ Chieina ara̱yang khavai khavā yaronao khani china Rahab, avāva̱ eina ava̱va̱, chinaongarā kala awui shimkhurbing mi saikorali akhuishoka. Awui theisā saikorali khuishokta Israelwui rāmrah ayarli haihai.

²⁴ Kala athumna keinung kala chiwui alungli khalei ot saikora mei eina thottahaowa; kha lupāsā, sinā, pithrai eina mariwui khorkhongbing khuilaga Prohowui shimli khuiunga.

²⁵ Kha khayorva̱ Rahab, kala avāva̱wui shimkhur kala awui chinaongarā saikorawui manglā Joshuana kanmi; kala aja eina tangda ana Israelli ngasopama; kaja Joshuana Jericho keinung ra̱yang khava kachiho mi khani chili ana ngathumkhamiwui vangna.

²⁶ Chitharan Joshuana Jericholi khonshida hānga, “Jericho ungsakākhaluiya a chi Prohowui khonkashi ngasāranu. Shimphunga sāphokthang awui naochizai shimānra, ngavei sakāthang awui naopaisho shimānra.”

²⁷ Hithāda Prohona Joshuali ngasomi; chieina ngalei katongali awui ming zatlakhaowa.