JOSHUA 5 - Kathara Bible (BSI)

¹ Prohona Israelwui mibing Jordan mamakānkupranglakha eina tangda chiwui tara̱ theng ngasaka kaji shālaga, Jordan kānda zingtunshong khalei Amorbingwui awunga saikora kala shamadrupheili khalei Canaannaobingwui awunga saikora ngacheelakhaowa, kala Israelnaobingli khangacheena athumli manglā akhala mazangthuwa.

Gilgalli Ahui Rimkashok

² Atam chitharan Prohona Joshuali hānga, “Kazana lungghainao sākhuilu kala Israel mibingli kakhane sāda ahui rimshokmihaolu.”

³ Chieina Joshuana kazana lungghai eina ghainao sākhuida Israelwui mibingli Gibeath-haaraloth apamli ahui rimshokmi.

⁴ Kala Joshuana athumli ahui rimshokhamiwui kakhalat hina: Egyptwui eina kashoka mayarnaobing saikora, raimi saikora, Egyptwui eina shok kahaiwui thili lamhāngli thihaowa.

⁵ Egyptwui eina kashoka mi saikora ahui rimshokhaisa-ilala, shok kahaiwui thili shongfa lamhānglungli kapharā mi saikora ahui marimshokrangsai.

⁶ Kaja Egyptwui eina kashoka mibing, raimi saikora mathingakanranglakha eina tangda Israelwui mibing kum hangmati lamhānglungli zata; khikhalajila athumna Prohowui tui makhuisangmana; athumli seina̱ eina khuira̱ khalonga ngalei mirada avāva̱ ngarāli Prohona ngashithaikasā chi athumli mathei ngasakmara da Prohona ngashithaowa.

⁷ Ana athumwui mahut anaongarā shokngasaka, chieina athumwui naongarābingli Joshuana ahui rimshokhamina; kaja athumna shongfali zatlakha marimshokrangkasāwui vāng marimkashokla zangkasāna.

⁸ Mi saikorawui ahui rimshok kahaiwui thili, athumwui khamā marairanglakha eina tangda athumna pamkasā rāmrah chili ngasāma.

⁹ Kala Prohona Joshuali hānga, “Ina Egyptli maikashi mikahai chi aja nathumwui eina khuithuimihaira.” Chieina apam chili Gilgal hora.

¹⁰ Israelwui mibingna Gilgalli pamlakha kachāng chiwui tharāda khamatethang ngazin Jerichowui tampākli makānkhami phanit mayona.

¹¹ Kala akhama kathā makānkhami phanitwui thichangli athumna ngalei chili kashok theishiraiwui khawok makazang khamui eina nguikakhui māngatai zai.

¹² Kala ngalei chili kashoka kashakazā zākaphok eina, akhama kathā eina manna mangavāluimana, kha chikum Canaan ngaleili kashoka theishirai shai.

Joshua kala Raikhai Kasing Mi

¹³ Joshuana Jericho ngalemli vākashung tharan, ana yangkakā eina mi akha raighai sutshokta chi singlaga nganingsai kala Joshuana ali vāda angahāna, “Na ithumwui mika, ithumwui yangkashekhala?”

¹⁴ Chieina ana hānga, “Maningmana; kha I Prohowui raimi akhavā sāda kharāna.” Chieina Joshuana ngakhumshāmhaida khoruma kala ali hānga, “Ameina naraoli khi sālu jikhala?”

¹⁵ Kala Prohowui raimi akhava china Joshuali hānga, “Napheiwui eina pheihop khuishokhaolu; kaja nana khanganing apam chi katharana.” Kala Joshuana chithāda sai.