JOSHUA 24 - Kathara Bible (BSI)

Shechemli Leilakha Joshuana Mibingli Kahāng

¹ Chiwui thili Joshuana Israel shang saikora Shechemli kazipkhui, kala ararbing, akuibing, bicharsamebing kala Israelwui otva̱bing, saikorali hokhui kala athumna Prohowui mangāli rākazipa.

² Chieina Joshuana mi saikorali hānga, “Israelwui Proho Varena hithāda hānga; ‘Achālakha navāngarā, Abraham eina Nahorwui avāva̱ Terahna Euphrates kānda pamsai; kala athumna khangatei varebingli khorumsai.

³ Chieina ina nathumwui navā Abrahamli kong makānda athankhuida Canaan ngalei kuimareida thānvai, kala awui ara̱-azā kachungkha mi. Ina ali Isaac mi;

⁴ kala Isaacli ina Jacob eina Esau mi. Kala ina Esauli Seirwui kaphungram awui shimlui sākhavai mi, kha Jacob eina awui naongarā Egyptli tahaowa.

⁵ Chiwui thili ina Moses eina Aaronli Egyptli chihovāda ina saki kaji sālaga chiwui alungli kazātkashi kazāngasaka, kala khaleilaga ina athumli khuishoka.

⁶ Chiwui thili ina navāngarāli Egyptwui eina khuishoka, kala nathumna shamadruli rāshunga; kala Egyptnaobingna siguigari kala sigui katonga mibingna navāngarāli Red Sea eina tangda kharomrai.

⁷ Kala athumna Proholi khangakao eina, ana athum eina Egyptnaobingwui ngachaili ngamiting ngasakhaowa, kala tara̱na athumli ngaphumthathaowa; kala ina Egypt mibingli khi sākhala kaji nathum mik eina thei; kala nathum lamhāngli atam kasāngkha pama.

⁸ Chiwui thili ina nathumli Amorbing Jordan lākhavāk pamkasābingwui ngaleili khuivai; athumna nathumli ngararlala ina athumli nathumwui pāngli mi, kala athumwui ngalei chi nathumli samphang ngasaka, kala ina athumli nathumwui miktāli shimān ngasaka.

⁹ Chiwui thili Moabwui awunga, Zipporwui naomayara Balakna Israelli thuingarara; ana Beorwui naomayara Balaamli hokhuida nathumli khonshi khavai sai,

¹⁰ kha ina Balaamli manganāsangmimana; chiwui vang ana nathumli somihaowa; hithāda ina nathumli awui pāng eina kanshokmi.

¹¹ Kala nathumna Jordan kānda Jericholi vai, kala Jerichowui mina nathumli rāngarara, kala nathumna Amornaobing, Periznaobing, Canaannaobing, Hitnaobing, Girgashnaobing, Hivnaobing kala Jebusnaobing saikoralila ngararda athumli ina nathumwui pāngli sangmi.

¹² ina nathumwui mangāli khui chihorāda china Amorwui awunga khanili kashamshoka; hi nathumwui raighai, lah malā eina maningmana.

¹³ Nathumna lui mavākasang ngalei, nathumna masemkakā keinungbing ina mida nathumna chili sompama kala nathumna malingkasang drakhā yāmgui kala olive yāmguiwui athei nathumna shai.’

¹⁴ “Chiwui vang eina ara Proholi ngacheelu, ning tharda, kala ning katong eina ali otram ngatha̱lu; navāngarāna Kong makānda pamlakha kala Egyptli leilakha khokharum varebing chi horhaolu, kala Proholi otram ngatha̱lu.

¹⁵ Kala kalikha nathumna Proholi otram mangatha̱ngaiakha, navāngarāna kong makānda ramreili leilakha khorumkasā varebing chika, Amor ngaleili nathumna pamlakha khorumkasā varebingli khuira̱khala kaji aja kapangkhuilu; kha I kala iwui shimkhurva Proholi otram ngatha̱ra.”

¹⁶ Chieina mibingna ngahānkai, “Ithumna Proholi horhailaga khangatei varebingli otram ngatha̱ra kaji ithumwui eina katāva̱li lei;

¹⁷ kaja ithumli kala ishāvā ngarāli Egypt ngaleili narkahai raopamwui eina khuikashoka chi Proho laka, ana ithumwui miktāli hakkhamahā khudambing sai, kala ithumwui kazatzat shongfa saikorali mayonmi, kala ithumna makānkhavā miyur saikorawui eina mayonmi;

¹⁸ kala Prohona Amor ngaleili kapama mi saikorali ithumwui mangāli kashamshokmi; chiwui vang eina ithum Proholi otram ngatha̱ra, kaja a ithumwui Varena.”

¹⁹ Kha Joshuana mibingli hānga, “Nathum Proholi otram mangatha̱rarmara, kaja ava kathara Varena; ava mikpaishikatha Varena; ana nathumwui khayon lah morei mapheomimara.

²⁰ Kalikhada nathumna Proholi horhaida khangatei varebingli khorumthuihaiakha, ana nathumwui vang kaphā samihaisālala, ana nathumwui eina ngareithuihaida kazātkashi khuirāda shimān ngasakluira.”

²¹ Cheina mibingna Joshuali hānga, “Maningmana; kha ithum Proholi otram ngatha̱ra.”

²² Chiwui thili Joshuana athumli hānga, “Nathumna Proholi kapangkhuida otram ngatha̱ra kaji hi nathum khalattana shākhina.” Chieina athumna “Ithumna shākhina” da ngahānkai.

²³ Ana hānga, “Chithakha nathumwui alungli khalei ayarwui varebing chi horhaolu, kala nathumwui wuklung Israelwui Proho Vareli ngareiunglu.”

²⁴ Kala mibingna Joshuali hānga, “Ithum Proho Vareli otram ngatha̱ra, kala ithum awui kahāng nganāra.”

²⁵ Chieina Joshuana chithang Shechemli athumli tuingashit akha salaga athumwui vang ain kala shiyan-chikan semmi.

²⁶ Kala Joshuana tuibing chi Varewui ain lairikli kapisanghai; kala ana ngalunggui kahakva akha khuida Prohowui katharapamli khalei shirimthingpheili shoma.

²⁷ Kala Joshuana mi saikorali hānga, “Yanglu, ngalunggui hi ithumwui shākhina; kala Prohona ithumli matui kahai tui saikora hina shākahaina; chiwui vang eina hina nathumwui shākhi ngasāra, maningakha nathumna nathumwui Vareli minamda sapaishina.”

²⁸ Chieina Joshuana mibingli kachichā ramli shiunhaowa.

Joshua eina Eleazar Kathi

²⁹ Ots saikora hiwui thili Nunwui naomayara, Prohowui rao Joshua, kum shākha tharā kākashung eina thihaowa.

³⁰ Kala athumna ali awui pamkhavai Timnath-serah, awui shimlui, Gaash kaphungwui atungshong khalei Ephraimwui kaphungram chili chifahaowa.

³¹ Kala Joshuawui atamli kala a thikahaiwui thili ringkhavā ararbing, kala Prohona Israel mibingwui vang sāmi kahai katheibing ringlakha eina tangda Israelwui mibingna Proholi otram ngatha̱sai.

³² Josephwui ara̱kui Israelwui mibingna Egyptwui eina khuikashok chi Shechemwui ngalei akai akha Shechemwui avāva̱ Hamorwui naomayarabingwui eina Jacobna lupāsā shākha mida lokakhui chili chifahaowa; chi Josephwui ara̱-azāwui shimlui ngasahaowa.

³³ Kala Aaronwui naomayara Eleazar thihaowa; kala athumna ali, anaomayara Phinehaswui keinung, kaja Ephraimwui kaphungramwui eina khami keinung Gibe-ahli chifahaowa.