JOSHUA 23 - Kathara Bible (BSI)

Joshuawui Kapāng Tui

¹ Atam kasangkhawui thili Prohona Israelli kuimareida khalei yangkashebingwui eina ngasāmkhui khangasak tharan Joshuala rarhaida saryuihaowa,

² Joshuana Israel saikorali, athumwui ararbing, kala akuibing, athumwui bicharsamebing kala otva̱bingli hokhuida hānga, “I ara rarhaida saryuihaira,

³ kala Proho nathumwui Varena yur khangateibingli nathumwui vang sāmi kahai saikora nathumna theihaira, kaja nathumwui vang ngararmi kahai chi Proho nathumwui Varena.

⁴ Yanglu, ina Israel shangbingwui shimlui sākhavai, taihaida khalei ngaleibing eina ina shimit kahai miyurbingwui ngalei Jordan eina thuida zingtunshong Great Sea eina tangda zangnarlaga nathumli mihaira.

⁵ Nathumwui Vare Prohona athumli nathumwui mangāli namshokmida nathumwui miktāli kashamshokhaora kala nathumwui Vare Prohona ngashit kahai athishurda athumwui ngalei nathumwui ngasāra.

⁶ Chiwui vang eina Moseswui ain lairikli kapi kahai saikora mayontitta yuiung-yuivā masaalu,

⁷ chithākha nathumwui ngachaili yur khangateiwui mi leida khalei chili mamanātmara, lah athumwui varebingwui mingla masingmara, lah athumwui ming singda shākhi masāmara, lah otram mangatha̱mara, lah nathum khalatta mashunzangda athumli makhorumara,

⁸ kha nathumna aja sāda khalei thāda Proho nathumwui Vareli ngavaptitlu.

⁹ Kaja Prohona nathumwui mangāli kahaka kala kapanga yurbing kachungkha kashamshokmihaira; kala nathumwui vanga, nathumli aja eina tangda khipānakha mangasungrarmana.

¹⁰ Ana nathumli ngashit kahai chithāda nathumwui mi akhana mi thingkhali ngararshapra, kaja Proho nathumwui Varena nathumwui vang ngararkhami einana.

¹¹ Chiwui vang eina Proho nathumwui Vareli leishi khavai nathum khalatta nganātitkhuilu.

¹² Kaja nathumna ngareithuihaida nathumwui alungli shākhaida khalei yur khangatei chili ngarumhaiakha, kala ngalā ngakhotta, nathumna athumwui kala athumna nathumwui sha̱naobingli ngakumakha,

¹³ theiphalungra kaja Proho nathumwui Varena yurbing chili nathumwui eina makashamshokmiluimara; kha athum chi nathumwui vang mankhavai khalen, arapli ngaphit khavai, kala mikli kashāt kazang kathā ngasāhaora, kala Proho nathumwui Varena mikahai khamathā ngalei hiwui eina nathum mashimānranglakha eina tangda chithāra.

¹⁴ “Kala ara I akhur vāki jiura, kala nathumna nathumwui wuklungli kala ningli thei, kaja Proho nathumwui Varena nathumli kaphā ot saikora ngashit kahai akhala maungkashung maleimana; nathumwui vang saikora ungshungserhaira, akhala maungkashung maleimana.

¹⁵ Kha Proho nathumwui Varena kaphā ot saikora nathumli ngashitmida ungshung khangasak thāda, chieina Proho nathumwui Varena nathumli khami khamathā ngalei hiwui eina nathum mashimānchaoranglakha eina tangda, Prohona nathumwuitungli makaphā saikora khuirāra,

¹⁶ kalikhada nathumna Proho nathumwui Varena mikahai tuingashit, kala ana nathumli kaso kahaili ngakaishida khangatei varebingli otram ngatha̱da, kala khorumakha, Prohona nathumli malungvātta nathumli mikahai kaphā ngalei hiwui eina nathum thaklāk eina shimānhaora.”