JOSHUA 21 - Kathara Bible (BSI)

Levinaowui Keinungbing

¹ Chiwui thili Levi shimkhurwui akhavābingna pāngmon Eleazar kala Nunwui naomayara Joshua kala Israel mibingwui shangwui kala shimkhurwui akhavābingli rai;

² kala athumna Canaan ngaleiwui Shilohli pamlakha athumli rāhānga, “Ithumli pamkhavai keinungbing, kala ithumwui sha̱keiwui vang seihomphung miphalungra da Prohona Mosesli hānghai dalei.”

³ Chieina Prohona kaso kahai chi Israelwui mibingna Levinaobingli athumwui shimluiwui eina keinungbing kala seihomphungbing hi mihaowa.

⁴ Kalā yanglaga, Kohatshi shimkhurli ungtāhaowa. Chieina pāngmon Aaronwui ara̱-azāna Judah, Simeon, kala Benjamin shangwui eina kalā eina keinung tharāda kathum samphanga.

⁵ Kala Kohathshi kaikhana kalā yanglaga Ephraim, Dan kala Manasseh shang tangkhaiwui eina keinung tharā samphanga.

⁶ Kalā yanglaga Gershonbingna Issachar, Asher, Naphtali shangbing kala Bashanli khalei Manasseh shang tangkhaiwui eina keinung tharāda kathum samphanga.

⁷ Meraribingna athumwui shimkhurwui athishurda Reuben, Gad kala Zebulun shangbingwui eina keinung tharāda khani samphanga.

⁸ Keinungbing kala seihomphungbing hi Prohona Mosesli hāngkahai athishurda Israelwui mibingna kalā yanglaga Levibingli mikahaina.

⁹ Judah shangwui eina, kala Simeon shangwui eina athumna aming panlaga azingwui keinungbing hi mi,

¹⁰ chiya kalā yanglaga samphangkhare sāthuda Aaronwui naotun Levi shangwui Kohath shimkhurwui ngasāhaowa.

¹¹ Athumli Kiriath-arba (Arbana Anakwui avāva̱ ngasahaoda), chiya Hebron, Judahwui kaphungramli khalei chi kuimareida seihomphungwui vang mihaowa.

¹² Kha keinungwui tampākbing eina kha̱bing chiya Jephunnehwui naomayara Calebli awui shimlui sāda mihaowa.

¹³ Kala Aaron pāngmonwui ara̱-azāli athumna mi sākathatana yāmngayin khavai keinung Hebron, Libnah eina chiwui seihomphung ngaleibing,

¹⁴ Jattir eina chiwui seihomphung, Eshtemoa eina chiwui seihomphung,

¹⁵ Holon eina chiwui seihomphung, Debir eina chiwui seihomphung,

¹⁶ Ain eina chiwui seihomphung, Juttah eina chiwui seihomphung, Beth-shemesh eina chiwui seihomphung da keinung chiko hi shang khaniwui eina khuishokmi;

¹⁷ chiwui thili Benjamin shangwui eina, Gibeon eina chiwui seihomphung, Geba kala chiwui seihomphung,

¹⁸ Anathoth eina chiwui seihomphung, kala Almon eina chiwui seihomphung da keinung matina.

¹⁹ Pāngmon Aaronwui ara̱-azā pāngmonbingwui keinung saikora tharāda kathum kala athumwui seihomphungbing hina.

²⁰ Katei Levibingwui ngachaili Kohath shimkhurbingli Ephraim shangwui eina keinung khuishokmi.

²¹ Athumli mikahaibing chi mi sakathatana yāmngayin khavai Ephraim kaphungramli khalei keinung Shechem, kala chiwui seihomphung, Gezer eina chiwui seihomphung,

²² Kibza-im eina chiwui seihomphung, Beth-horon eina chiwui seihomphung da keinung matina;

²³ kala Dan shangwui eina, Elteke eina chiwui seihomphung, Gibbethon eina chiwui seihomphung,

²⁴ Aijalon eina chiwui seihomphung, Gath-rimmon eina chiwui seihomphung da keinung matina;

²⁵ kala Manasseh shang tangkhaiwui eina Taanach eina chiwui seihomphung kala Gath-rimmon eina chiwui seihomphung da keinung khaniya,

²⁶ katai shimkhur Kohathbingwui keinung kala athumwui seihomphung saikora tharāna.

²⁷ Kala Levibingwui shimkhur Gershonbingli Manasseh shang tangkhaiwui eina keinung khuishokmi, Bashanli khalei mi sakathatana yāmngayin khavai keinung Golan eina chiwui seihomphung kala Be-eshterah eina chiwui seihomphung da keinung khanina;

²⁸ kala Issachar shangwui eina Kishion kala chiwui seihomphung, Daberath eina chiwui seihomphung,

²⁹ Jarmuth eina chiwui seihomphung, En-gannim eina chiwui seihomphung da keinung matina;

³⁰ kala Asher shangwui eina, Mishal eina chiwui seihomphung, Abdon eina chiwui seihomphung,

³¹ Helkath eina chiwui seihomphung, kala Rehob eina chiwui seihomphung da keinung matina;

³² kala Naphtali shangwui eina, Galileeli khalei mi sakathatana yāmngayin khavai Kadesh eina chiwui seihomphung, Hammothdor eina chiwui seihomphung, kala Kartan eina chiwui seihomphung da keinung kathumna;

³³ Gershon shimkhur saikorawui keinung kala seihomphung tharāda kathumna.

³⁴ Kala Levishi kateibing Merari shimkhurbingli Zebulun shangwui eina, Jokne-am eina chiwui seihomphung, Kartah eina chiwui seihomphung,

³⁵ Dimnah eina chiwui seihomphung, Nahalal eina chiwui seihomphung da keinung mati khuishokmi;

³⁶ kala Reuben shangwui eina, Bezer eina chiwui seihomphung, Jahaz eina chiwui seihomphung,

³⁷ Kedemoth eina chiwui seihomphung kala Mepha-ath eina chiwui seihomphung da keinung matina;

³⁸ kala Gad shangwui eina Gileadli khalei mi sakathatana yāmngayin khavai keinung Ramoth eina chiwui seihomphung, Mahanaim eina chiwui seihomphung,

³⁹ Heshbon eina chiwui seihomphung, Jazer eina chiwui seihomphung da saikora keinung matina.

⁴⁰ Merariwui shimkhurbingwui keinungwui vang, chiya, Levibingwui shimkhur taihaida khaleibing, athumli yarkahai keinung saikora tharāda khanina.

⁴¹ Israel mibingwui ngalei alungli Levibingna samkaphang keinungbing kala seihomphung eina ngasoda saikora keinung hangmatida chishatna.

⁴² Keinungbing kachiva̱li kachichāwui ayar kuikhamareili seihomphung leisera; keinung saikora chithāserpapama.

⁴³ Hithāda sāda Prohona athumwui avāva̱ ngarāli ngashit kahai athishurda ngalei saikora Israelnaoli mihaowa, kala chi athumwui shimlui ngasāda pamhaowa.

⁴⁴ Kala Prohona athumwui avāva̱ ngarāli ngashit kahai athishurda athumli apam kachiva̱li ngasāmkhui ngasaka; yangkashe saikorawui eina akhanala athumli manganingkhamluimana; kaja yangkashebing saikora Prohona athumwui pāngli horsangmi.

⁴⁵ Prohona Israel shimkhurli kaphā ngashit kahai saikora maungkashung maleimana; saikora ungshungsera.