JOSHUA 2 - Kathara Bible (BSI)

Jericho Vāra̱yang khavai Mi Chihokhavā

¹ Nunwui naomayara Joshuana ngathumda Shittimwui eina vāra̱yang khavai mi khani chihoda hānga, “Ngalei chi, matailak eina Jericho chi ayangkhuilu.” Chieina anina vāda Rahab kaho khayorva̱wui shimli vāzanga, kala chili ngasāmkhui.

² Kala Jericho awungali hithāda hānghaowa, “Yanglu, Israelwui mi kachikathā ngalei hi yangkhui khavai aja ngayā hili rāhaira.”

³ Chieina Jerichowui awungana Rahabwuili mi chihovāda hānga, “Nawui shimli rākazanga mi chi khuishoklu, kaja athumna ngalei saikora hi phāshok khavai kharāna.”

⁴ Kha sha̱nao china mi khani chi thumhaida hānga, “Mashunga, mibing iwuili rai; kha athum kaji eina kharākhala da ina matheimana;

⁵ kala kazing yinguda ngavei shunguki kaji tharan mibing chi thuihaowa; mi chi kachishong thuihaokhala kaji I matheimana; thākta kharomlu, kaja nathumna athumli ngaphankhuishapra.”

⁶ Kha ana anile shimtungli khuikāhairasai, kala ana anili tāwon akung eina masankazazakhamhai.

⁷ Chieina mibing china athumli Jordanvāk kharomvāda kongphei eina tangda vāshunga; kala kakharomabing china thuikhaleoda, ngavei shunghaowa.

⁸ Ani mapiranglakha sha̱nao china shimtungli kāda hānga,

⁹ “Prohona ngalei hi nathumli mihaira kaji ina thei kala nathumwui pongli khangachee chi ara ithumwuili rāhaira, chiwui vang eina ngalei hiwui mibing nathumwui mangāli nganukhaira.

¹⁰ Kaja nathum Egyptwui eina kashok tharan nathumwui mangāli Prohona kathāda Red Sea tara̱ thengngasak, kala Jordan kānvāda khalei Amorwui awunga khanili nathumna kathāda sāmi, kala Sihon eina Ogli nathumna sashimānchaohaokhala kaji ithum shāhaira.

¹¹ Chi shākhaleoda ithum ngacheelakhaowa; kala mayarnao khipākha ningkhanganung maleithuwa; kaja Proho nathumwui Vare chiya kazingramwui kala okathuiwui Varelaka.

¹² Chieina ara, ina nanili lumashanda sāmi kahai thāda naninala ishāvāwui shimkhurli khamathā sāmira kaji Prohowui ming singda khangashit sālu, kala ili makhangapata khudam milu,

¹³ kala ishāvā, ishāva̱, ipāngarā, igatuiva̱ngarā kala athumwui shimkhur saikorali ringngasakta ithumli kathiwui eina kanshokmilu.”

¹⁴ Chieina anina ali hānga, “Iniwui manglā nawui vāngna! Kalikha nana ithumwui khangashit hi mahatakha Prohona ngalei hi ithumli khami tharan nashilila lumashanda ningtonglak eina sāmira.”

¹⁵ Chiwui thili ana anili khara̱ eina charfali chihotāhaowa, kaja ana kapam shim chi keinung phākholi sāshānda kapam shimna.

¹⁶ Kala ana anili hānga, “Kaphungli kaulu maningkha kakharomabing chi samphangpaishina kala athum malatungranglakha eina tangda zimiksho kathumthang chili ngathumpamlu; chiwui thili nathumwui shong unghaolu.”

¹⁷ Anina ali hānga, “Nana inili khangashit sākhangasak hili iniwui khayon khikha maleimara.

¹⁸ Yanglu, ithumna ngalei hili kharā tharan hungping kahai khara̱ hi inili chihotā khavai charfa chili khalaphaiphalungra; kala nawui shimli nashava̱ nashāvā, napāngarā kala nashi shimkhurwui mi saikora hokhuida kazipsāphalungra;

¹⁹ kalikha mi akhana shimwui eina thuihaida keinungli zatsākha, akhalatta kathina; ithumwui khayon maningmana; kha nali ngasoda nawui shimli leikasā akhali pāng parakha, awui kathi chi ithumwui khayon sāra.

²⁰ Kha kalikha ithumwui otsak hi nana hānghaiakha, ngashit kahai kakai hili iniwui khayon maleimana.”

²¹ Kala sha̱nao china hānga, “Naniwui hāngkahai athishurda, chitharanu.” Chiwui thili ani zathaowa; kala sha̱naopava̱ china hungping kahai khara̱ chi charfa chili hokthānghai.

²² Anina thuihaida kakharomabingna malatungranglakha eina tangda phungreili kathumthang apama, kaja kakharomabingna shongfa saikorali phālaga khikha masamphangmana.

²³ Anina phungrei chiwui eina hantaluishitta chi kānlaga Nunwui naomayara Joshuawuili vai; kala anina ali kashok-kazang saikora hānga.

²⁴ “Kachangkhat Prohona ngalei saikora chi ithumwui pāngli sangmihaira; kala chili lāngda chili kapāna mibing saikora ithumwui pongli shāda ngacheelak eina leili.”