JOSHUA 19 - Kathara Bible (BSI)

Simeonli Khayar Leiret

¹ Ka̱lā kakhane chi Simeonwui vang shokta, Simeonwui shangli athumwui shimkhurwui athishurda yara, kala shimlui chi Judah shangwui ngalei alungthungli zanga.

² Kala athumwui shimlui chiya, Beer-sheba, Sheba, Moladah,

³ Hazar-shual, Balah, Ezem,

⁴ Eltolad, Bethul, Hormah,

⁵ Ziklag, Beth-marcaboth, Hazar-susah,

⁶ Beth-lebaoth, kala Sharuhen— athumwui kha̱bing eina ngasoda keinung tharāda kathumna;

⁷ En-rimmon, Ether, kala Ashan— athumwui kha̱bing eina ngasoda keinung matina;

⁸ kala keinung hili kuimareida khalei kha̱bing Baalath-beer vāshungda, kala Negebwui Ramah vāshungda zangsera. Hi Simeon shangli athumwui shimkhurwui athishurda mikahai shimluina.

⁹ Simeonshi shangwui shimlui Judah shangwui lamli ngakaida zanga; kaja Judah shangwui ngalei hi athumwui vang haknāhaida, chiwui alungthungli Simeon shangli shimlui khami hi Judah yarwui eina khuikashokna.

Zebulunli Khayar Leiret

¹⁰ Ka̱lā kakathuma chi Zebulun shangwui vang shokta athumwui shimkhurwui athishurda yara. Kala athumwui leiret chi Sarid eina tangda shangshunga;

¹¹ chieina chiwui thari chi zingtunvāk vāda, kala Mareal vāshungda kala Dabbeshethli aza̱ya, chiwui Jokne-amwui zingshoshong khalei kong chieina tai.

¹² Sarid eina haophoklaga lakkashong zingshovāk zimik shokkhavaishong Chisloth-taborwui thari vāshunga; chiwui eina Daberath vai, chiwui thili Japhia shangshunga;

¹³ chiwui eina vāshumda zingshovāk vashumlaga zingshoshong Gath-hepherli, kala Eth-kazin kala Rimmon vālaga Neahvāk kuitāhaowa.

¹⁴ Atungshong thari chi Hannathon vākuikhuiya, kala chi Iphtahelwui tampākli ungtanga;

¹⁵ kala Kattath, Nahalal, Shimron, Idalah kala Bethlehem—athumwui kha̱bing eina ngasoda keinung tharāda khanina.

¹⁶ Hi Zebulun shang athumwui shimkhurwui athishurda athumwui shimluina—kha̱bing eina ngasoda keinung tharāda khanina.

Issacharli Khayar Leiret

¹⁷ Ka̱lā khamate chi Issacharwui vang shokta Issachar shangli athumwui shimkhurwui athishurda yara.

¹⁸ Athumwui leiretli Jezreel, Chesulloth, Shunem,

¹⁹ Haphara-im, Shion, Anaharath,

²⁰ Rabbith, Kishion, Ebez,

²¹ Remeth, En-gannim, En-haddah, Beth-pazzez hibing zanga;

²² Thari chi Tabor, Shahazumah, kala Beth-shemesh, hibing vāza̱da Jordan eina tanga—athumwui kha̱bing eina ngasoda keinung tharāda tharukna.

²³ Hi Issachar shangli athumwui shimkhurwui athishurda mikahai athumwui kha̱bing zangda keinungbing china.

Asherli Khayar Leiret

²⁴ Ka̱lā kaphangā chi Asher shangli athumwui shimkhurwui athishurda shoka.

²⁵ Athumwui leiret Helkath, Hali, Beten, Achshaph hibing hina,

²⁶ Allammelech, Amad, kala Mishal zanga; zingtunvāk Carmel kala Shihor-libnath vāza̱da,

²⁷ chiwui thili zingshovāk kuivāda chi Beth-dagonli vai, kala Zebulun eina Iphtahel zingtunshongwui tampāk vāza̱da Beth-emek kala Neiel vāshunga; chiwui thili atung shangshumda Cabul shangshungda,

²⁸ Ebron, Rehob, Hammon, Kanah, kala Khareiya Sidon tāshunga.

²⁹ Chiwui thili thari chi Ramahvāk kuivāda raipan sākahai Tyrewui keinung chi vāshunga; chiwui thili thari chi kuikhuida Hosahli latungda shamadruli atanga; Mahalab, Achzib,

³⁰ Ummah, Aphek kala Rehob zangserda athumwui kha̱bing kala keinung maga̱da khanina.

³¹ Hi Asher shangli athumwui shimkhurwui athishurda yarkahai athumwui kha̱bing kala keinungbing china.

Naphtalili Khayar Leiret

³² Ka̱lā katharuka chi Naphtali shangli athumwui shimkhurwui athishurda shoka.

³³ Kala ashiwui thari Helephwui eina kala Za-anannimwui shirimthingrongwui eina thuilaga Adami-nekeb, Jabneelwui eina tangda Lakkum vāshunga kala Jordan eina tanga;

³⁴ chiwui thili thari chi zingtunshong kuivālaga chiwui eina Aznoth-tabor, Hukkok kala azingshong Zebulun tāza̱laga zingtunvāk Asher vāshunga, kala Jordanwui zingshovāk khalei Judah ungshunga.

³⁵ Raipan sākahai keinungbing chiya Ziddim, Zer, Hammath, Rakkath, Chinnereth,

³⁶ Adamah, Ramah, Hazor,

³⁷ Kedesh, Edre-i, En-hazor,

³⁸ Yiron, Migtal-el, Horem, Beth-anath kala Beth-shemesh—athumwui kha̱bing eina ngasoda keinung tharāda chikona.

³⁹ Hi Naphtali shangli athumwui shimkhurwui athishurda yarkahai athumwui kha̱bing kala keinungbing china.

Danli Khayar Leiret

⁴⁰ Ka̱lā kashine chi Dan shangli athumwui shimkhurwui athishurda shoka.

⁴¹ Kala ashi shimkhurwui leiret Zorah, Eshta-ol, Ir-shemeshbing hina,

⁴² Sha-alabbin, Aijalon, Ithlah,

⁴³ Elon, Timnah, Ekron,

⁴⁴ Eltekeh, Gibbethon, Baalath,

⁴⁵ Jehud, Bene-berak, Gath-rimmon,

⁴⁶ kala Me-jarkon kala Rakkon eina Joppali yangkhangasung leiretbing zanga.

⁴⁷ Danwui mibingna ngalei shimān kahai eina Leshemli kāngarara kala chiwui mibingli raighai eina sathatta yuikakhui eina ngalei chi athumwui sāda pamhaowa kala Lashem maholuila athum avāva̱wui ming Dan hohaowa.

⁴⁸ Hi Dan shangli athumwui shimkhurwui athishurda yarkahai keinungbing eina athumwui kha̱bing china.

Naomeikapta Khayar

⁴⁹ Athumwui shimluiwui vang ngalei ngayarkup kahaiwui thili Israelwui mibingna Nunwui naomayara Joshuali ngalei akha mi.

⁵⁰ Prohona kakaso athishurda athumna awui kapo Timnath-serah kaho Ephraimwui kaphungramli khalei keinung chi mihaowa; kala ana keinung chi sakāluishitta chili pamhaowa.

⁵¹ Hi Pāngmon Eleazar kala Nunwui naomayara Joshua kala Israel shimkhur avāva̱ ngarāwui athishurda mibingwui kathānabingna Shilohli khalei kazip khavai kachonshim khāmongli, Prohowui mangāli kalā yanglaga shimlui ngayarkhami chi hina. Chieina athumna ngalei chi ngayarkuphaowa.