JOSHUA 18 - Kathara Bible (BSI)

Taida Khalei Ngalei Khangayar

¹ Chiwui thili Israel yarui ashangva̱ Shilohli ungkazipta chili kazip khavai kachonshim akha sākai; ngalei chi athumna yuikakhuina.

² Israel mibingwui ngachaili athum shang shinili shimlui mangayarmirangsai.

³ Chieina Joshuana Israelwui mibingli hānga, “Navā ngarāwui Proho Varena nathumli mikahai ngalei chi mavākhuila nathum karankha ngapaipamra̱khala?

⁴ Shang kachiva̱wui eina mi kathumrip kapangshokmilu, kala ina athumli chihovāda athumna apam saikora yangkhuida kachichāna khuikhangai apam chi kapikhuilu, laga iwuili ralu.

⁵ Athumna ngalei chi shini sāda ngayarra, Judahwui mibingna azingshong athumwui leiretli kapam chi athumwui sāpapamra, kala Josephwui mibingna atungshong tharili pamra.

⁶ Kala leiret shini sāda ngakai kahai ngalei chiwui apongli nathumna kapikhuilaga ili khuiungmilu; kala ina Proho Varewui mangāli kalā yanglaga mira.

⁷ Levibingna nathumwui alungli shimlui masamphangmara, kaja Prohowui pāngmonpam hi athumwui shimluina; kala Gad kala Reuben kala Manassehwui shang tangkhaina Prohowui rao Mosesna mikahai athishurda zimikshoshong Jordan kānda shimlui samphanghaira.”

⁸ Chieina mibingna athum kachichāwui shongzā zatuwa; kala ngalei chiwui pongli kapikhui khavai kazatabing chili Joshuana kasoi, “Vāda apam saikora yangkhuida ngalei chiwui apongli lairikli kapikhuida ili hanunglu; kala ina Shiloh apam hili Prohowui mangāli kalā yangda ngalei chi nathumli ngayarmira.”

⁹ Chieina mibing china vālaga ngalei chi apam saikora yangkhui keinung shini zangda leiret shini chiwui apongli lairikli kapikhui, kala athumna Shilohwui rāmrahli Joshuali khuiungmi,

¹⁰ chieina Shilohli Joshuana athumwui vang Prohowui mangāli kalā yangmi; kala Joshuana ngalei chi Israelwui mibingli ngayarmi, athum ava̱va̱wui yar misera.

Benjaminli Khayar Leiret

¹¹ Ka̱lā yanglaga Benjamin shangwui vang da shimkhurwui athishurda khayar shimlui chi Judah eina Joseph shangli mikahai chiwui ngachaili ungtai.

¹² Atungshong ashiwui thari Jordan eina haophoka; chiwui eina thuilaga Jericho kaphung arāp shangshumda zingtunvāk khalei kaphungram shanglaga, Beth-aven lamhāng atanga.

¹³ Chiwui eina azingvāk kuitālaga vāshumda Luz ngaheishong (Bethel) vatai, chiwui thili thari chi Khamaze Beth-horonwui azingshong khalei kaphungtung kala Ataroth-addar tāshunga.

¹⁴ Chieina thuida thari chi zingtunshong vākuikhuida azingshong Beth-horonli yangngasungda khalei kaphungram chi vāshungda Judah shangwui keinung akha Kiriath-baal (chiya Kiriath-jearim) eina tanga. Hi zingtunvākwui tharina.

¹⁵ Kala azingvāk Kiriath-jearim ayar eina haophoklaga thari chi Ephronli tai, kala Nephtoah Tara̱wui ura̱ pamli ungtanga;

¹⁶ chiwui thili thari chi Rephaim tampāk atungvāk shangkachata Hinnom naomayarawui tampākli yangkazanga kaphungphei chi tai, laga chiwui eina Jebusnaobingwui kaphung arāp Hinnom tālaga En-rogelvāk tai;

¹⁷ chiwui eina atungshong vāngareikhuida En-shemeshli shanga, chiwui eina Adummimwui shongshan yangkhangasung Geliloth shanga, kala chiwui eina Reubenwui naomayara Bohanwui ngalungpam tāzanga;

¹⁸ kala atungshong Beth-arabatwui kaphung arāp shangda Arabahli tai;

¹⁹ chiwui thili thari chi atungshong Beth-hoglahwui kaphung shangluida Jordan tākhamazingvāk khalei Salt Seawui shamadruphei atungshong atanga: hi azingshongwui tharina.

²⁰ Zingshoshong Jordanna thari sai. Hi Benjamin shangli shimkhurwui athishurda yarkahai thariwui thari kuikhamareina.

²¹ Chitharan Benjamin shangli shimkhurwui athishurda yarkahai keinungbing chiya Jericho, Beth-arabah, Emek-keziz,

²² Beth-arabah, Zemaraim, Bethel,

²³ Avvim, Parah, Ophrah,

²⁴ Chepharammoni, Ophni, Geba— da athumwui kha̱bing eina ngasoda keinung tharāda khanina:

²⁵ Kala Gibeon, Ramah, Be-eroth,

²⁶ Mizpeh, Chephirah, Mozah,

²⁷ Rekem, Irpeel, Taralah,

²⁸ Zela, Ha-eleph, Jebus (chiya Jerusalem), Gibe-ah kala Kiriath-jearim; athumwui kha̱bing eina ngasoda keinung tharāda matina. Hi Benjamin shangli athumwui shimkhurwui athishurda yarkahai shimluina.