JOSHUA 14 - Kathara Bible (BSI)

Jordan Zingtun Leiret Kakhai

¹ Kala hibing hi pāngmon Eleazar, Nunwui naomayara Joshua kala Israel shangwui avāva̱ ngarāwui shimkhur akhavābingna Canaan ngaleili Israelnaobingli ngayarkhami shimluina.

² Prohona Mosesli kaso kahai athishurda shang chiko kala tangkhai chili kalā yangda shimlui ngayarmi.

³ Kaja Mosesna shang khani laga tangkhaili Jordan lākhavāk ngayarmi; kha Levinaobingli shimlui mamimana.

⁴ Josephwui mibing Manasseh eina Ephraimda shang khani leiya, Levinaobingli shimlui mamimana; kha sompam khavai keinungli kala sha̱keiwui vang seihomphungmang mi.

⁵ Prohona Mosesli kakaso athishurda Israelwui mibingna chithada sai; athumna ngalei chi ngayara.

Calebli Hebron Khami

⁶ Chieina Gilgalli leilakha Judahwui mibingna Joshuali rāda; Keniz Jephunnehwui naomayara Calebna ali hānga, “Prohona Varewui mi Mosesli Kadesh-barneali leilakha iniwui pongli kahāng chi nana thei.

⁷ Prohowui rao Mosesna ili Kadesh-barneawui eina ngalei ara̱yang khavai kachiho atamli I zingkum hangmati kāhairasai; kala ina theikakhui pao chi ali khuiungmi.

⁸ Kha ili khangaso ichināngarāna mibingli malung tatung ngasaka. Chithalala ina Proho Varewui ningkachāng athishurda sai.

⁹ Kala Mosesna chithang khangashit sāda hānga, ‘Nana phei naisang kahai apam chi kachangkhat nawui kala nawui naongarāwui ngasāra, khikhalajila nana Proho iwui Varewui ningkachāng athishurda sāhaira.’

¹⁰ Kala ara yanglu, Prohona Mosesli kahāng chi kum hangmatida phangā kāhaira, atam chitharan Israelwui mibingna lamhāngli zatta leisai kala Prohona khangashit thāda ajala ili ringngasakta lei kala yanglu, ila ara zingkum hangchishatta phangā kāura.

¹¹ I aruila Mosesna kachiho atamli kapang thāda pangda lei, rai atamli yāng leikasā thāda aruila leipapama, kala zatung zatvāshapta lei.

¹² Chieina ara Prohona chitharan hāngkahai thāda kaphungram hi ili milu; kaja Anakimnaobingna athumwui keinungbing ngaveikazakhailaga pamda lei kaji chithang nala shai. Prohona kahāng thāda ana ili ngasomira kala ina athumli kashamshokshapra.”

¹³ Chieina Joshuana ali somiya; kala ana Hebron ngalei chi Jephunnehwui naomayara Calebwui shimlui sākhavai mihaowa.

¹⁴ Chithāda sāda Hebron ngalei chi aja eina tangda Keniznaobingwui Jephunnehwui naomayara Calebwui shimlui sāda lei: khikhalajila ana Israelwui Proho Varewui ningkachāng athishurda sai.

¹⁵ Hebron hi khareli Kiriath-arba hosai; Arba kaho china Anakimbingwui alungli hakmeikap kaja mi sāda leisai; kala ngalei chi rai kasāwui eina khangasām samphanga.