JOSHUA 13 - Kathara Bible (BSI)

Khuifaki kaji Ngalei

¹ Chitharan Joshua sarshunhaoda; Prohona ali hānga, “Na ara rarhaira, kha khuifaki kaji ngalei kachungkha leifaya.

² Khuifaki kaji ngaleibing chiya; Philistinewui ngalei saikora, kala Gershurwui ngalei saikora,

³ (Egyptwui zingshoshong khalei, Shihor eina thuida atungshong Ekron thari shangshungda, Canaanbing da katheiyur. Ngalei chi Philistine wungnao phangā kaja Gaza, Ashdod, Ashkelon, Gath kala Ekron hibingwui), azingshong Avvimwui ram saikora,

⁴ azingshong Canaan mibingwui ngalei saikora, kala Sidonbingwui ngalei Mearah, kala Aphek tāshungda, Amorwui tharili vāshunga,

⁵ kala Gebalbingwui ngalei, kala Lebanon saikora, zingshoshong, Harmon Kaphungwui azingli khalei Baal-gad eina thuilaga Hamath vāzang khavai,

⁶ phungreiramli kapamabing saikora Lebanon eina thuilaga Misrephoth-maim vāshungda, kala Sidonbing saikora zanga. Ina athumli Israelnaobingwui mangāli kashamshokra; ina nali kakaso athishurda ngalei chi Israelwui shimlui sāda nana yarmimalu.

⁷ Chiwui vang eina ara ngalei hi shang chiko kala Manasseh shang tangkhaili ngayarmihaolu.”

Jordanwui Zingsho Ngalei Yarkatā

⁸ Prohowui rao Mosesna mikahai athishurda Manasseh shang tangkhai, Jordan kānda zingshoshong Reubenbing kala Gadbingna samkaphang shimlui chi hina:

⁹ Arnon tampāk akatangli khalei Aroer tampāk eina haophoklaga, kala alungthungli khalei keinung kala Medebawui kaphung khangani ngalei saikora khuida Dibon vāshunga;

¹⁰ kala Heshbonli mungkasā Amorbingwui awunga, Sihonwui keinungbing saikora Amorbingwui thari vāshunga;

¹¹ kala Gilead, kala Geshurnaobing eina Ma-acathnaobingwui ngalei, kala Harmon Kaphung saikora, kala Bashan eina Salecah vākashung saikora;

¹² Ashtaroth eina Edre-i lungli khamunga, Bashanli khalei Ogwui wungram saikora (amāng Rephaimwui ngachaili taishoka); saikora hi Mosesna yuikhuida kashamshok kahaina.

¹³ Kha Geshurbing, lah Ma-acathnaobingli Israel mibingna makashamshokla athumna aja eina tangda Israelnaobingli ngasopamdalei.

¹⁴ Levi shangli Mosesna shimlui mayarmana; Varena Mosesli kakaso thāda Israelwui Proho Vareli mei eina rikkatā kachigat chi athumwui shimluina.

Reubenli Khayar Leiretbing

¹⁵ Kala Mosesna Reuben shangli athum shimkhurwui athishurda shimlui ngayarmi.

¹⁶ Chieina ashiwui leiret chi Arnon tampākwui akatangli khalei Aroer, kala tampāk alungthungli khalei keinung kala Medeba kaphung khangani saikora mi;

¹⁷ Heshbonla chiwui kaphung khanganili khalei keinung saikorala; Dibon, Bamoth-baal, kala Beth-Baal-meon,

¹⁸ kala Jahaz, kala Kedemoth, Mepha-ath,

¹⁹ kala Kiriathaim, kala Sibmah, kala kaphung khanganili khalei Zereth-shahar,

²⁰ kala Beth-peor, kala Pisgahwui kaphungpheibing, kala Beth-jeshimoth,

²¹ chiya, kaphung khanganiwui keinung saikora, Mosesna yuikakhuiya Heshbonli mungkasa Amorwui awunga Shihon, kala awui wungram saikora, ali ngasoda Median, Evi, kala Rekem kala Zur, Hur, Reba, saikorawui kathānabing Sihonwui wungnaobing, ngalei chili pānkasābing.

²² Marān Beorwui naomayara Balaamla Israelwui mibingna raighai eina sāthat kahai chili zanga.

²³ Kala Reuben mibingwui thari Jordan eina tanga. Reuben shimkhurwui athishurda yarkahai keinungbing kala rambing hina.

Gadli Khayar Leiret

²⁴ Kala Mosesna Gadnaobinglila shangwui athishurda shimlui yartai.

²⁵ Athumwui leiret: Jazer, kala Gileadwui keinung saikora, kala Ammonnaobingwui ngalei tangkhai eina thuida Rabbahwui zingshoshong khalei Aroer,

²⁶ kala Heshbon eina thuida Ramath-mizpeh eina Betonim, kala Mahanaim eina thuida Debirwui thari,

²⁷ kala tampākli khalei Beth-haram, Beth-nimrah, Succoth, kala Zaphon, Heshbonwui awunga Sihonwui wungram taida khaleibing, Jordan eina thariphungda zingshovāk Chinnereth Ngayiwui nemkhamei rākachat Jordanli zingshoshong eina tangda zanga.

²⁸ Hi Gadbingli athumwui shimkhurwui athishurda yarkahai ram, kala keinungbing kala kha̱bing ngasoda mikahaina.

Zingsho Manassehli Khayar Leiret

²⁹ Kala Mosesna Manasseh shang tangkhailila shimlui yartai; chi athumwui shimlakwui athishurda Manasseh tangkhaili yarkatāna.

³⁰ Athumwui lam chi Mahanaim eina thuida Bashanwui awunga Ogna khamunga wungram saikora, Jairwui keinung saikora zangda, Bashanli khalei keinung hangtharuka,

³¹ kala Gilead tangkhai, kala Ashtaroth, kala Edre-i, Bashanli khalei Ogwui wungram; hibing hi Manassehwui naomayara Machirwui ara̱-azā tangkhaili ngayarkhamina.

³² Hibing hi Jerichowui zingshoshong Jordan kānkāda Moabli leilakha Mosesna ngayarkhami shimluibingna.

³³ Kha Mosesna Levi shangli shimlui mayarsangmana; kaja ana athumli ngashit kahai athishurda Israelwui Proho Vare hi athumwui shimluina.