JOSHUA 11 - Kathara Bible (BSI)

¹ Tui hi Hazorwui awunga Jabinna kashā eina, ana Madonwui awunga Jobab, kala Shimronwui awunga, kala Achshaphwui awunga,

² kala atungshong phungreiramli kapama awungabing, kala Chinnerothwui azingshong Arabahli kapamabing, kala angakoli kapamabing, kala zingtungshongwui Naphoth-dor,

³ zingsho zingtunwui Canaannaobing, kala Amornaobing, Hitnaobing, Periznaobing, phungreili kapam Jebusnaobing kala Mizpah ngaleiwui Harmon azingli khalei Hivnaobing saikorali rai asuiya.

⁴ Kala athumna raimi saikora khuiphungda, athumwui raimibing, ashang shālak eina, sigui eina siguigari sorkhangasai zanglaga kongwui situi ngayāda rai.

⁵ Kala awungabing hina athumwui raimi saikorali ngarumda Israelli ngarar khavai Merom tara̱pamli rakazipa.

⁶ Kala Prohona Joshuali hānga, “Athumli mangacheelu, akhama hitharan ina athum saikora Israelwui pāngli pitā ngasakra; athumwui siguibingwui pheichinra̱ katatmihaora, kala siguigaribing meili riktāmihaora.”

⁷ Chieina Joshuana awui raimibingli ngasoda kashuirak eina Meromwui tara̱pamli angarara.

⁸ Kala Prohona athumli Israelwui pāngli sangmida athumli sāthata kala Kahaka Sidon eina Misrephoth-maim vāshungda kharomvai; kala zingshoshong Mizpeh tampāk vāshungda kharomvāda athum akhala mataila sāthatserhaowa.

⁹ Kala Prohona Joshuali kakaso athishurda siguibing pheichinra̱ katatmihaida siguigaribingla mei sa̱tāmiserhaowa.

¹⁰ Chitharan Joshuana latungda Hazor ngalei ungkhuiya, kala chiwui awungali raighai eina sāthathaowa; kaja Hazorna wungrambing chiwui akhoka sāsai.

¹¹ Kala athumna chili kapambing saikora raighai eina sāthatserhaowa, kharingyur akhala mataila sāthatserhaowa, kala ana Hazor mei sa̱tāmihaowa.

¹² Awungabing chiwui keinungbing, kala athumwui awungabing, Joshuana khuida, Prohowui rao Mosesna kakaso athishurda athum akhala mataila sāthatserhaowa.

¹³ Kha Joshuana mei sa̱tā kahai Hazor maningla kaphungbingli khanganing keinungbing chi Israelna masa̱tāmimana.

¹⁴ Kala keinung chiwui thongthāng kala sha̱kei saikora Israelwui mibingna ngaponkhui, kha mi saikora athumna raighai eina sāthatserhaowa; kala kharingyur akhala mataimimana.

¹⁵ Prohona awui rao Mosesli kakaso thada, Mosesnala Joshuali chithada kasoi; Prohona Mosesli kaso kahai saikora Joshuana makasā maleimana.

Ngalei Katonga Kakhui

¹⁶ Chieina Joshuana ngalei saikora, kaphungram kala Negeb saikora kala Goshen ngalei saikora, kala angako ngalei, kala Arabah kala Israelwui kaphungram kala chiwui khangakoko ngalei saikora khuiserhaowa

¹⁷ Halak Kaphungwui eina thuilaga Seirshong shangda, Harmon Kaphung azingli khalei Lebanonwui tampāk Baal-gad kaho apam chieina tangda vāshunga. Kala ana chiwui awunga saikorali yuihaida sāthatserhaowa.

¹⁸ Joshuana awungabing chili kasāngkha rai sai.

¹⁹ Gibeonli kapama Hivnaobing maningla Israelwui mibingli chingri khavai keinung akhala maleisalakmana; athumna yuikhuisera.

²⁰ Kaja athumwui wuklung marar khangasak hi Prohowui otsakna, kaja athumna Israelli rai kasā chitharan, Prohona Mosesli kakaso athishurda, athumli lukhamashan maleila kala akhala mataila mutmi ngasakra kaji hi Prohowui khangarāna.

²¹ Kala Joshuana chitharan rāda Hebron, Debir, Anab, kala Judahwui kaphungram kala Israelwui kaphungramli khalei Anakimshi saikora manāthatserhaowa kala Joshuana athumli ngasoda athumwui keinungbing saikora shimānmihaowa.

²² Israel mibingwui ngaleili Anakimnao akhala matai ngasakmana; kha Gaza, Gath kala Ashdod apambing hili kateokha taisai.

²³ Chieina Prohona Mosesli kakaso athishurda, Joshuana ngalei katonga chi yuikhui; kala Joshuana Israelwui shimlui sākhavai shang-shangli yarmi, kala ngalei chi rai masāluila chingrihaowa.