JOHN 7 - Kathara Bible (BSI)

Jishu kala Achinangarā

¹ Hiwui thili Jishuna Galileeli yaovai. A Judeali mavāngaithuwa, kaja chili khalei Jihudibingna ali shaothat khavai rimhaowa.

² Chitharan Jihudiwui Tabernacle phanit nganailakhairasai.

³ Chieina Jishuwui agato ngarāna ali hānga, “Nawui sākhangatha̱bingna nana sāda khalei theikhavai hili mapamluila Judeali ungulu,

⁴ kaja khamaho ningkachāngbingna awui otsak ngathumda kasā khangachā maningmana, hikathā hi saga jiakha na khalatta apuk-apagva̱li chitheilu.”

⁵ Achinā ngarā eina tangda ali mashitsangmana.

⁶ Jishuna athumli hānga, “Iwui atam marāranga, kha nathumwui vanga sāpaichinga.

⁷ Okathuina nathumli maningkachairarmana, kha ili ningkachai, kaja chiwui otsakbing chi makaphāna da ina hāngching kajiwui vangna.

⁸ Nathum Phanit chili azanglu, iya mavāfamara kaja iwui atam marāranga.”

⁹ Ana hi hānghailaga ava Galileeli pamsanghaowa.

Jishuna Tabernacle Phanitli Khavā

¹⁰ Agato ngarā vākahaiwui thili Jishuna vai, kha phonglāk eina mazatla ngayinzata.

¹¹ Jihudiwui akhavābingna, “Jishu kali leikhala” da ngathinglaga phāzata.

¹² Mibingna Jishuwui pongli ngazek ngaroka; kaikhana “A kaphā mina” ji, kala kaikhana “Mibingli ana thannguihaira” da hānga.

¹³ Chithālala Jihudiwui akhavābingli ngacheehaoda khipākha awui pongli phonglāk eina mamatuilengmana.

¹⁴ Phanit chi alung zangkahai eina Jishuna khorumshimli zangda tamchithei.

¹⁵ Jihudiwui akhavābingna matakhakhaida hānga, “Mipa hi lairik matamlakla kathada hiyākha theihaokhala?”

¹⁶ Jishuna ngahānkai, “Ina tamkachithei hi iwui eina kashok maningla, ili kashirāta Varewui eina kharāna.

¹⁷ Kachikathāna Varewui ningkachāng chi sāngaida leiakha, ina tamkachithei hi Varewui eina kharākā, I khalattawui sāshap eina khamatuikhala kaji theira.

¹⁸ Khalatawui sāshap eina khamatuia china khalattawui maikhayā phai, kha ali kashirātawui maikhayā kaphā a chi khamashungana kala awuili sākakhaning maleimana,

¹⁹ Mosesna ain khami maningmala? Kha nathum khipākha ain chi mamayonmana. Khiwui vang eina nathumna ili shaothat khavai hotkhanākhala?”

²⁰ Athumna ngahānkai, “Chipee zanghaira, nali khipāna shaothatra jikhala?”

²¹ Jishuna ngahānkai, “Ina matakhak kahai ot akha sai, kala nathum saikora matakhakhai.

²² Mosesna nathumwui naongarāli ahui rimshok khavai kasoi, (kachangkhatpāva Mosesna maningla nawo ngarāna haokaphokna) kala nathumna nanaongarali Sabbath zimiksholi ahui rimshoka.

²³ Moseswui ain makai khavai Sabbath zimiksholi ahui rimshokmiakha ina Sabbaththang kakazā mi akhali raikhamiwui vang khisāda malungvātkhala?

²⁴ Zakmai eina bichar masaalu; kha khamashung eina bichar sālu.”

A Messiahlā?

²⁵ Jerusalemwui mi kaikhana hānga, “Akhavābingna shaothatra kaji mipa chi hi maningmala?

²⁶ Yanglu, ana phonglāk eina matuilala khipānakha awuitungli mahāngmana. Kathānabingla a hi Khrista china da theihaola?

²⁷ Messiah kharā tharan a kachiwui eina rākhala da khipākha matheimara. Kha mipa hi kachiwui eina kharākhala kaji ithum thei.”

²⁸ Jishuna khorumshimli tamchitheida panglāk eina hānga, “Nathum ili theila kala I kachiwui eina kharākhala kaji thei kachangkhatla? Iningsasak eina kharā maningmana, kha ili kashirāta a chi khamashungana. Nathum ali matheiranga.

²⁹ Kha iya ali thei, kaja I awui eina kharāna kala ana ili kashirātna.”

³⁰ Chieina athumna ali tukkhui khavai sai, kha khipānakha ali pāng maparmana, kaja awui atam marārangsai.

³¹ Thālala yaruiwui ngachaili mi kachungkhana ali shitsanga kala athumna hānga, “Messiah kharā tharan mipā hina kasāli lāngmeida sāshaprala?”

Jishuli Tukkhui khavai Khangarān

³² Mibingna Jishuwui maramli kakhalop chi Phariseebingna shai, chieina pāngmon akhokabing eina Phariseebingna Jishuli tukkhui khavai akhavābing chihovai.

³³ Chieina Jishuna hānga, “Ina nathumli kasha̱nakhawui vang ngasopamra, chiwui thili ili kashirātawui ngalemli vahaora.

³⁴ Nathumna ili phālala masamphangluimara; I khaleipamli nathum marārarmara.”

³⁵ Jihudi akhavābing athum eina athum ngazek ngaroka, “A kali vaukida ali maphākhuirarmara kajikhala? Ithumwui mibing chaida khalei Greeknaowui keinungbingli vāda Greeknaobingli atamchitheira kajila?

³⁶ Ana ‘Nathumna phālala ili masamphangluimara kala ina vāki kaji apamli nathum marārarmara’ da kahāng hi khisa-uyi kajikhala?”

Kharinga Tara̱

³⁷ Phanitwui khanaowa kala khamataiyathang Jishuna nganingda panglāk eina hānga, “Kachikathāna ra̱changakha iwuili rāmangkhuilu.

³⁸ Kathara Lairikli hāngkahai thada ‘Kachikathāna ili shitsangakha awui wuklung eina kharing tara̱wui kongra̱ longshokra.’”

³⁹ Hi ali shitkasangbingna samphangki kaji Manglāwui tui kahāngna. Kaja Jishuna tekhamatei eina maringshokrangsāthuda Manglā chi mamirangsai.

Mibing Ning Khangakai

⁴⁰ Mi kachungkha chiwui ngachaili kaikhana tui hi shālaga hānga, “Mipā hi marānlaka.”

⁴¹ Kaikhana hānga, “A Khrista china.” Kha kaikhana “Khrista hi Galileewui eina rāmaraola?

⁴² Kathara lairikli hāngkahai Messiah chi Davidwui shangnaora kala Davidna pamkasa keinung Bethlehemli pharāra” da hanghaili ji.

⁴³ Hithada sāda athumwui ngachaili Jishuwui maramli ning ngakai khangarok shokhaowa.

⁴⁴ Kaikhana Jishuli tukkhuingai, kha khipānakha pāng maparmana.

Jihudi Kathānabingwui Mashitkasang

⁴⁵ Pāngmon akhokabing eina Phariseebingna kachiho akhavābing chi latkhaung tharan, “Khisāda ali matukkhuithukhala?” da ngahāna.

⁴⁶ Mibing china ngahānkai, “Mipā hina khamatui thada khipānakha mamatuilakmana!”

⁴⁷ Chieina Phariseebingna “Nathumlila ana pāngasakhaola?

⁴⁸ Kathāna maningakha Phariseewui ngachaili kachikathā ali shitkasang khaleihairala?

⁴⁹ Kha ain makathei ashangva̱ hili khonshihaira.”

⁵⁰ Jishuli rida asamphang kahaia Nicodemusla chili leisai. Ana athumli hānga,

⁵¹ “Ithumwui ain athishurda mi akhali bichar sālaga khayon matheiranglakha khayon mamipaimana.”

⁵² Chieina athumna ngahānkai, “Nala Galileewui eina kharāla? Kathara Lairik pāyanglu, kachilikha Galileewui eina marān mashoklakmana kaji theira.”

⁵³ Athum ichāchāwui shimli ungserhaowa,