JOHN 4 - Kathara Bible (BSI)

Jishu eina Samariawui Sha̱nao

¹ Johnwuili lāngda kashura kachungkhali Jishuna ra̱hikmi kaji Phariseebingna kashā eina,

² (Kachangkhat Jishu a khalattana ra̱hikkhami maningla awui sākhangatha̱bingna kasāna)

³ ana Judeawui eina Galileeli latunga.

⁴ Shongfa chi Samariawui eina ngaruivāki kajina.

⁵ Chieina Jacobna anaomayara Josephli khami tampāk chiwui ngalemli khalei Sychar kaho Samariawui keinungli ana vai.

⁶ Jacobwui ra̱khong chi chili lei, kala Jishuna ram zatta chothaoda ra̱khong chiwui ayarli apamkhui, chi pung katharuka maikhawui atamlina.

⁷ Apam chili Samariawui sha̱nao akha tara̱ rātārasai. Jishuna ali hānga, “Ili tara̱ khamimanglu.”

⁸ Chitharan awui sākhangatha̱bing keinungli kashakazā alothuihairasai.

⁹ Samariawui sha̱nao china hānga, “Nava Jihudinaona kala iya Samarianaona, kathada Samariawui sha̱nao ili tara̱ pokhala?” Kaja Jihudibingna Samarianaoli ot mangaronmana.

¹⁰ Jishuna ali ngahānkai, “Nana Varewui lemmet chi theisāsi kaja kala ‘Ili tara̱ khamimanglu’ da kapopa hi khipākhala da theisi kaja nana ali poda ana nali kharinga tara̱ chi mihaira̱ra.”

¹¹ Sha̱naopava̱ china hānga, “Amei, nava tara̱ sokkhui khavaila makhuiphung, kala ra̱khongna hiyākha thuklaga nana kachiwui eina kharinga tara̱ chi khuimirakhala?

¹² Ishawo Jacobli na reimeila? Ana ithumli ra̱khong hi khamina, kala ala awui naongarābingla kala sha̱keibingla hi mangkasāna.”

¹³ Jishuna hānga, “Tara̱ hi khamanga mi kachiva̱ ra̱changluishitra,

¹⁴ kha ina miki kaji tara̱ chi khamanga a chi mara̱changluimara. Ina miki kaji tara̱ chiva awuili katang makhavai kharing wurkashoka ura ngasāhaora.”

¹⁵ Sha̱naopava̱ china hānga, “Amei, ina mara̱changlui khavai kala apam hili tara̱ marātālui khavai tara̱ chi ili khamilu.”

¹⁶ Jishuna hānga, “Nagaharali unghokhuilaga hili rālu.”

¹⁷ Sha̱naopava̱ china ngahānkai, “I igahara maleimana.” Jishuna ali hānga, “Nana nagahara maleimana da kahāng chi mashunga.

¹⁸ Kaja na mayar phangāli ngakumhaira, kala arui pamrumda khaleipa hila nagahara maningmana. Na mashungda hāngda lei.”

¹⁹ Sha̱nao china hānga, “Amei, na marān akhana da ina thei.”

²⁰ “Ishawo ngarāna phungrei hili khoruma, kha nathum Jihudibingna khorum khangayi apam chi Jerusalemna da hānga.”

²¹ Jishuna hānga, “He sha̱nao, ili shitsanglu. Avāva̱ chili mibingna kaphung hilila, Jerusalemlila makhorumluiki kaji atam chi rārāli.

²² Nathum Samarianaona khipāli khokharumkhala da matheimana, kha Jihudi ithumna khipāli khokharumkhala da thei, kaja huikhame hi Jihudiwui eina rai.

²³ Khamashung eina khokharumabingna Avāva̱li manglā kala khamashung eina khorumki kaji atam chi rārāli, chi arui hina, kaja Avāva̱na ali chithada khorum ngasakngai.

²⁴ Vare hiya Manglāna, chieina ali khokharumbingna manglā kala khamashung eina khorumphalungra.”

²⁵ Sha̱nao china hānga, “Messiah (Khristala kaho) chi rāra da ina thei. Ana kharā tharan ot saikora ithumli ana hāngchitheira.”

²⁶ Jishuna ali hānga, “Nali ngazekta khalei I hi a laka.”

²⁷ Chichangli sākhangatha̱bing rārāsai. Ana sha̱naoli khangazek chi athum matakhakhaowa, kha khipānakha “Na khi ningkachangkhala?” lah “Khisāda sha̱nao chili khangazekkhala?” da mahāngmana.

²⁸ Chieina sha̱nao china awui tara̱ham haihailaga keinungli latungda mibingli hānga,

²⁹ “Rāyanglu, ina sākahai saikora hāngmishapa mi akha lei, hi Khrista chiralā?”

³⁰ Athumna keinungwui eina rāda Jishuli samphanga.

³¹ Athum rāmahungda leilakha sākhangatha̱bingna Jishuli, “Ojā, phazākhuifalu” da hānga,

³² kha Jishuna athumli hānga, “Nathumna makathei kashakazā ina zāki kaji lei.”

³³ Chieina athum akha eina akha, “Kachikathāna ali kashakazā khuiungmihairala?” da ngazek ngaroka.

³⁴ Kha Jishuna hānga, “Ili kashirātawui ningkachāng ot kasā kala chi ungshung khangasak chi iwui kashakazāna.

³⁵ Nathumna, ‘Kachāng mati vātfaya, chiwui thili māhā rāra’ da mahāngmala? Ina nathumli kahāngna, namik kapeikāda ngashānyanglu, mā chi hātkhavai minhaira.

³⁶ Kahāta china langhai samphanga kala katang makhavai mirinwui heiun kazipkhui, chieina khayaoa eina kahāta ringpharumra.

³⁷ Chānjam hi mashunglaka, ‘Akhana yaowa, akhana hātkhui.’

³⁸ Nathumna mavākasang lui chi nathum hātkhui khavai ina nathumli kashivātna, khangateina vāsangmihaira, nathuma thada hātki kajimaya.”

³⁹ Kala sha̱naopava̱ china “Ina sākahai saikora chi ana hāngmihaira” da shākhi khamiwui vang Samarianao kachungkha Jishuli shitsanghaowa.

⁴⁰ Kala athumna Jishuwuili rāda ngasāmsangmi khavai poi, chieina ana khanithang pamsanga.

⁴¹ Awui tui shālaga apam chiwui mi kachungkha ali shitsanghaowa.

⁴² Athumna sha̱naopava̱ chili hānga, “Nana kahāng chiwui vangmāng ithumna shitkasang maningmana, kha ithum khalattana awui tui shāhaira kala a hi okathuiwui Huikhamelaka da ithumna theihaira.”

Jishuna Akhavā Akhawui Naoli Raikhami

⁴³ Khanithangwui thili Jishuna Galileeli vāhaowa.

⁴⁴ Jishu a khalattana, marān kaho hili awui ramli khayākashi mangachāmana da hāngphata.

⁴⁵ Jishuna Galileeli kharā tharan chiwui mibingna mathānthathup eina rāsamphanga kaja athumna phanitli Jerusalem kakā tharan Jishuna kasāsā saikora theihairasai.

⁴⁶ Chiwui thili Jishuna Galileeli khalei Cana, tara̱ eina drakhāra̱ onkhangasakpam chili latunga. Chitharan Capernaumli akhavā akhawui nao kazāda leisai.

⁴⁷ Mipā china Jishu Judeawui eina Galileeli rāhaira kaji kashā eina thinanai khalei awui naomayarali raimi khavai apoi.

⁴⁸ Chieina Jishuna ali hānga, “Nathum hiya machut kala matakhak kahai otsak matheiranglakha eina tangda mashitsangmana.”

⁴⁹ Akhavāpa china hānga, “Inao mathiranglakha kharāmilu”

⁵⁰ Jishuna hānga, “Ungulu, nanao ringra.” Mipa china Jishuna kahāng shitsangda latunghaowa.

⁵¹ Ana shim maungshungranglakha awui raobingna pao khuirada hānga, “Nanao kakazā phāhaira.”

⁵² Chieina ana atam katharān phāhaokhala da khangahān eina athumna ngahānkai, “Ayā ngashun pung akha katā tharan kakharur vānhaowa.”

⁵³ Chieina a khalattala kala ashi shimkhur katongala shitsanghaowa.

⁵⁴ Jishuna Judeawui eina Galileeli kharā tharan machut kachithei hina kakhanena.