JOHN 18 - Kathara Bible (BSI)

Jishuli Tukkakhui

¹ Jishuna seihā sāchanghailaga sākhangatha̱bingli ngasoda Kidron tampākli khavā tharan yāmgui akha leisāda athumna chili azanga.

² Apam chi Jishuli yorkazāpa Judasnala thei, kaja Jishuna awui sākhangatha̱bingli kachungkha shida apam chili samphanga.

³ Chieina Judasna thānda shipaila, pāngmon akhokabingna kachiho kathāna kaikhala kala Phariseebingla zangda zeighai ngahāla, thaomeila singlaga yāmgui chili vai.

⁴ Jishuna shokki kaji theiserhaoda, athumwui mangāli shokngahāna, “Nathum khipāli kaphākhala?”

⁵ Athumna, “Nazarethwui Jishuli kaphāna” da ngahānkai. Jishuna, “Chi ina” da hānga. Ali yorkazāpa Judasla athumli nganingrumsai.

⁶ Ana “Chi ina” da kahāng eina sa̱na̱ungda ngaleili kongluizanga.

⁷ Jishuna athumli ngahānluishita, “Nathum khipāli kaphākhala?” Athumna “Nazarethwui Jishuli kaphāna” da hānga.

⁸ Jishuna hānga, “Chi ina, da nathumli ina hānghaira.”

⁹ Jishuna kahāng hi ana hānghaikasā “Nana ili mikahai athum akhala mashimānmana” kaji chi ungshung ngasak khavai kahāngna.

¹⁰ Simon Peterna raighai akha singsāda chi sutkhuilaga pāngmon khareiwui rao akhawui khanā yāvāk yortāmihaowa. Raopā chiwui aming Malchus hoi.

¹¹ Jishuna Peterli hānga, “Nawui raighai chi ahonli sanghaolu. Avāna ili mikahai tengkot chi I mamangmarala?”

Jishuli Annaswui Mangāli Khuikakā

¹² Chieina shipai akhavāna thānda raimibing kala Jihudiwui kathānabing china Jishuli tukkhuilaga khalaphaowa.

¹³ Kala athumna rimeikapta Annas kaja chikum pāngmon kharei sākasā Caiaphaswui awovāwuili khuivai.

¹⁴ Jihudibingli, mi katongawui vang mi akhali thikhangasakna phāmeiya da hāngkhamachinpa chi Caiaphasna.

Peterna Jishuli Makhamayā

¹⁵ Simon Peterna Jishuli shurvai, sākhangatha̱ khangatei akhala shurvai. Sākhangatha̱ akhapā chi pāngmon khareili mathālak eina theimasuihaida ana Jishuli ngasoda pāngmon khareiwui kārotli zanga.

¹⁶ Kha Peterva kayāngli khamongwui ngalemli nganinghaowa. Chieina pāngmon khareili theikhamasuia sākhangatha̱ china shoklaga khamong khāmayonva̱ chili shokhānglaga Peterlila alungvāk khuizanga.

¹⁷ Khamong khāmayonva̱ china Peterli hānga, “Nala mipā chiwui sākhangatha̱ akha maningmala?” Peterna “Maningmana” da ngahānkai.

¹⁸ Siknāhaida raobing eina khamayonbingna mei sālaga kuimareida meili tikpama. Peterla athumli ngasoda meili vāpama.

Pāngmon Khareina Jishuli Khangahān

¹⁹ Pāngmon kharei china Jishuli awui sākhangatha̱ eina awui tamkachitheiwui pongli ngahāna.

²⁰ Jishuna ngahānkai, “Ina apuk-apagva̱li phonglāk eina hāngchinga; Jihudi katongana rākakazip synagogue kala khorumshimli tamchitheichinga; ina ngathumda kahāng khikha maleilakmana.

²¹ Chieina khisāda ili khangahānkhala? Ina athumli khi hāngkhala kaji kashābingli ngahānlu; ina khi hāngkhala kaji athumna thei.”

²² Jishuna hi hāngkahai eina ngalemli khalei otshina akhana apāng eina ali shaoda hānga, “Pāngmon khareili nana hithada ngahānkāla?”

²³ Jishuna ngahānkai, “Ina nguida hānghaira jiakha khangui chi hānglu, kha ina kahāng chi mashunga jiakha khisāda ili kashaokhala?”

²⁴ Chieina khalaphailaga Annasna ali pāngmon kharei Caiaphaswuili chihovāhaowa.

Peterna Jishuli Mamayākhalui

²⁵ Chitharan Peterna chili nganingda meili tikpamsai. Chieina athumna hānga, “Na mipā chiwui sākhangatha̱ akha maningmala?” Kha Peterna mamayāmada “Maningmana” da ngahānkai.

²⁶ Peterna khanā yortāmi kahaipawui athei-asā kashoka pāngmon khareiwui rao akhana hānga, “Yāmgui chili ali ngasozatkasā ina matheimala?”

²⁷ Peterna, “Maningmana” da ngahānkai, kala chichangli harvā khonguwa.

Pilatewui Mangāli Khuikakā

²⁸ Chiwui thili ngathorthakva athumna Caiaphaswui shimwui eina kārotli shimenvai. Jihudibingna kārotli mazangmana, kachiwui vangkhala kaja athum khalatta masāmakhaohaila Makānkhami zātkhānli zangkhavaina.

²⁹ Chieina Pilatena ayarli athumli shoksamphangda hānga, “Nathumna mipa hili kaphen khi leikhala?”

³⁰ Athumna ngahānkai, “Mipa hina yom ot masāsāsi kaja nawuili makhuirāmara.”

³¹ Pilatena athumli hānga, “Chithākha ali khuithuiulu, kala nathumwui ain athishurda bichar asālu.” Jihudibingna ngahānkai, “Ithumwui vanga khipālikha shaothat khavai ainna mamayāmana.”

³² Jishuna kachikathā mithit eina thira̱khala da ana hāngkahai chi ungshung khavai hi kashokna.

³³ Pilatena kārotli zangluishitlaga Jishuli hokhuida hānga, “Na Jihudiwui Awunga chila?”

³⁴ Jishuna ngahānkai, “Hi naning eina kahāngka, khangateina iwuipongli hāngmida kahāngkhala?”

³⁵ Pilatena ngahānkai, “I Jihudinaona da phaningla? Nali nawui mibing kala pāngmon akhokabingna iwuili chihokharāna, nana khi sāhaokhala?”

³⁶ Jishuna hānga, “Iwui wungmung hi apuk-apagva̱wui maningmana; iwui wungmung hi apuk-apagva̱wui sāsāsi kaja ili Jihudibingwui pāngli mahorsang khavai iwui kashurabingna ngararhairara; kha iwui wungmung apuk-apagva̱wui eina maningmana.”

³⁷ Pilatena ali hānga, “Thakha na awunga akharali!” Jishuna ngahānkai, “I awungana kaji hi nana hāngda lei. Ili hiwui vang kapharāna, kala hiwui vang khamashung chili shākhi mikhavai I apuk-apagva̱li kharāna. Khamashunga mi kachivana iwui tui khuisanga.”

³⁸ Pilatena, “Khamashung chi khikhala?” da ngahāna. Chi hānghailaga Pilatena shoklaga Jihudibingli hānga, “Ina awuili khayon khikhala masamphangmana.

Jishuli Shāothat khavai Tuitak

³⁹ Kha nathumwui zatkhanāwui athishurda Makānkhami phanitli phātop kazanga mi akhali ina chihomiphalungra; Jihudiwui Awunga hili chihomilu jila?”

⁴⁰ Athumna panglāk eina vaoluishita, “Mipa hi maningmana; kha Barabbaslina!” (Barabbas hi pha̱ma̱kashao mina).