JOHN 15 - Kathara Bible (BSI)

Drakhārong Akachanga Jishu

¹ “I akachanga drakhārong china kala iwui Avāna drakhārong sākhamathaana.

² Athei makhamathei iwui aphāng kachiva̱ ana yortāhai, kala athei khamathei aphāng kachiva̱li chungmei mathei khavai sāmathāmi.

³ Ina nathumli tamchithei kahai tui chieina nathumli tharngasakhaira.

⁴ Ili zanglu, chieina ina nathumli zangra. Aphāngna arongli maleiakha athei mamatheipaimana, chi tākam eina nathumna ili maleiakha athei mamatheipaimana.

⁵ “Ina drakhārongna, kala nathumna aphāngbingna. Iwuili khaleia kala ina awuili khalei, a chi athei tarakha khamatheia china, kaja I mazangla nathumna khikha masararmana.

⁶ Kachikathāna ili mazangakha aphāng katheng thada katatkhui, kala kazipkhuilaga meili horsangda chuitā ngasaka.

⁷ Nathumna ili zangda iwui tuila nathumli leiakha, nathumna ningkachāng kapopo chi samphangra.

⁸ Hithada nathumwui athei tarākha khamathei china iwui Avāwui tekhamatei phongshoka, kala china nathum iwui sākhangatha̱bingna da chithei.

⁹ Avāna ili leikashi thada ina nathumli leishilāka, iwui leikashili zanglu.

¹⁰ Nathumna iwui ningkhami mayonakha, ina iwui Avāwui ningkhami mayonda awui leikashili khalei thada nathumla iwui leikashili leira.

¹¹ “Ina nathumli kahāng hi iwui ringkaphā chi nathumli leikhavai kala nathumwui ringkaphā chi kāshungchao khavai kasāna.

¹² Hi iwui ningkhamina, ina nathumli leikashi thada nathum akha eina akha leishi ngaroklu.

¹³ Ngasotnaobingwui vang manglā chihokhami hili lāngda hakkhamei leikashi maleimana.

¹⁴ Ina kakaso chi nathumna saakha, nathum iwui ngasotnaona.

¹⁵ Ina nathumli rao maholuimana, kachiwui vangkhala kaja akhavāna khi salikhala kaji raona matheimana. Ina nathumli ngasotnao hoi, kachiwui vangkhala kaja ina iwui Avāwui eina shākakhui saikora nathumli hāngserhaira.

¹⁶ Nathumna ili kapangkakhui maningmana, kha vāda athei mathei khavai kala athei chi mashimān khavai ina nathumli kapangkakhuina kala kachipamna; chieina nathumna iming singda kapo saikora Avāna mira.

¹⁷ Hi iwui ningkhamina; akha eina akha leishi ngaroklu.

Okathuina Ningkakachai

¹⁸ “Apuk-apagvana nathumli ningkachaiakha, ili rida ningkachai kahaina kaji phaningunglu.

¹⁹ Nathumna apug-apagvawui ngasakha, apuk-apagva̱na awui chili leishira; kha ina nathumli apuk-apagva̱wui eina kapangkhuihaoda nathum apuk-apagva̱wui maningmana, chiwui vang eina apuk-apagva̱na nathumli ningkachai.

²⁰ Ina hāngkahai chi phaningunglu, ‘Raona akhavāli mahakmeimana.’ Athumna ili rekharekakha nathumlila rekharekphalungra; iwui tui khuisangakha nathumwuila khuisangphalungra.

²¹ Kha iwui vang eina athumna nathumli saikora hi sāra, kachiwui vangkhala kaja athumna ili kashirāta chili matheimana.

²² Ina athumli marātamchitheisāsi kaja athum morei kasā matheisāmara, kha ara athum moreiwui eina mayāmshokrarmara.

²³ Ili ningkakachaiya china iwui Avālila ningkachai.

²⁴ Khangateina masālakrang kaja ot chi athumwui mangāli masāchitheisāsi kaja athum moreili tātunghaira kaji matheisāmara; kha ara athumna iwui otsak theilaga ilila iwui Avālila ningkachaihaira.

²⁵ Chithālala hi shokphalungra, kaja ainli kapi kahai ‘Khi ngalangkha maleila athumna ili ningkachaihaira’ kaji hi ungshung khavaina.

²⁶ Kha Avāwui eina kashoka khamashungwui Manglā, Avāva̱wui eina ina nathumli chihorāki kaji Machinme kharā tharan, ana iwui vang shākhi mira;

²⁷ kala nathumla shākhina, kachiwui vangkhala kaja haokaphokwui eina nathum ili ngasora kahaina.