JOHN 13 - Kathara Bible (BSI)

Sākhangatha̱bingwui Phei Pheokhami

¹ Makānkhami phanit sākida thangkha vātlakha, Jishuna apuk-apagva̱li pākhailaga Avāva̱wuili vāki kaji atam rāhaira kaji kathei tharan, apuk-apagva̱li khalei mibingli leishihaoda, khanao eina tangdala ana leishi.

² Kala ngazin phazātwui atamli, Jishuli yorza khavai Simon Iscariotwui naomayara Judaswui wuklungli chipee zangkahai tharan,

³ Jishuna, Avāva̱na ot saikora awui pāngli horsangmihaira, kala a Varewui eina kharāna kala Varewuili vāluihaora kaji theida,

⁴ ana phazātwui eina ngakarthuida, awui kachon raitāhailaga towel akha kashānli neikhui.

⁵ Kala khongsaili tara̱ heisangda sākhangatha̱bingwui phei pheophokuwa kala awui kashānli neikahai towel chieina mitmi.

⁶ Jishuna Simon Peterwuili kharā eina Simonna hānga, “Proho, nana iwui phei pheomirala?”

⁷ Jishuna ngahānkai, “Ina khi sākhala kaji na arui bhap matāmara kha naoda bhap tānaora.”

⁸ Peterna hānga, “Nana iphei mapheopailakmara.” Jishuna ngahānkai, “Ina naphei mapheomiakha na ili khangarum maleimana.”

⁹ Simon Peterna ngahānkai, “Chithākha Proho, ipheimāng maningla ipāng eina ikuila pheomilu!”

¹⁰ Jishuna ngahānkai, “Ra̱vai kahai mina aphei maningla khangatei pheokhavai maleimana, a tharsera, kala na tharda lei, kha nathum kachiva tharser majimana.”

¹¹ Kaja Jishuna ali khipāna hatrakhala kaji theida “Nathum katonga tharser majimana” da kahāngna.

¹² Jishuna athumwui phei pheomihailaga awui kachon ngavaikhuida pamluishita, kala “Ina arui nathumli sākhami hiwui kakhalat theila?” da ngahāna.

¹³ “Nathumna ili Ojā kala Proho da hoi, chi mashunga, kaja I chilaka.

¹⁴ Nathumwui Proho kala ojana phei pheokhami chithada nathumla akha eina akha pheomi ngarokphalungra.

¹⁵ Nathumnala chithada sākhavai tamkachitheina.

¹⁶ Kachangkhat eina ina nathumli kahāngna, raona akhavāli mahakmeimana, paophungmena kashivātali mahakmeimana.

¹⁷ Ara khamashung hi nathum theihaira; nathumna hiwui athishurda saakha kayākha ringkaphā ngasārakhala!

¹⁸ “Ina nathum saikorawui pongli kahāng maningmana, ina kapangkhui kahaibing chili ina thei; kathara tuili hāngkahai, ‘Ili phazākhangaruma a china ili mamayāmana’ kaji hi ungshung khavaina.

¹⁹ Hi mashokranglakha nathumli ina kahāngna, chieina kashok tharan nathumna A chi ina da shitsangra.

²⁰ Kachangkhat ina nathumli kahāngna, kala ili khamayā chi ili kashirāta chili khamayāna.”

Jishuna Ali Hatki kaji Hāngkhamarān

²¹ Tui hi hānghailaga, Jishuna ningli saza̱lak eina hāngphata, “Kachangkhat eina ina nathumli kahāngna, nathumwui ngachaili akhana ili yorzāra.”

²² Chieina sākhangatha̱bing akha eina akha ningmaongtong eina khipākhala da yangkāngaroka.

²³ Jishuna leikashia sākhangatha̱ akha awui ngalemli pamsai.

²⁴ Simon Peterna ali “Khipākhala” da ngahān ngasaka.

²⁵ Chieina ana Jishuwuivāk shaivāda hānga, “Proho, chi khipākhala?”

²⁶ Jishuna ngahānkai, “Ina khamui tengkotli rurkhuilaga miki kajipa china;” chieina ana khamuitang akha rurkhuilaga Simon Iscariotwui naomayara Judasli mihaowa.

²⁷ Judasna khamui chi khuikhaleoda awuili satan zanghaowa. Jishuna ali hānga, “Nana sāki kaji chi thākta saulu.”

²⁸ Table kuimareida kapama mi khipānakha Jishuna ali kahāng chi bhap matārarmana.

²⁹ Judasna lupākhao singhaoda zātkhānwui vang ali kahāng-eili, kachāmabingli kateokha mikhavai kahāng-eili da sākhangatha̱bingna phaninga.

³⁰ Judasna khamui chi khuilaga hengsāda shokhaowa. Chi ngayāhairasai.

Ningkhami Kadhara

³¹ Judas thuikahaiwui thili Jishuna hānga, “Ara miwui Naomayarawui tekhamatei phonghaira, kala awui eina Varewui tekhamatei phonghaira.

³² Varewui tekhamatei chi awui eina phongmiakha; Varena a khalattawui alungli miwui Naomayaralila makahatlakla tekkmatei ngasakra.

³³ Inao ngarā, ina nathumli kasāngkha mangasopamluimara. Khaleilaga nathumna ili phāra, kha ina Jihudiwui akhavābingli kahāng chi nathumlila kahāngna kaja ina vāki kaji chile nathum marārarmara.

³⁴ Chieina ina nathumli ningkhami kadhar khamina kaja nathum akha eina akha leishi ngaroklu, ina nathumli leikashi thada nathum akha eina akha leishi ngarokphalungra.

³⁵ Nathum akhana akhali leikashi leiakha nathum iwui sākhangatha̱bingna kaji saikorana theira.”

Peterwui Makhamayā Jishuna Hāngkhamarān

³⁶ Simon Peterna “Proho, na kali vaurakhala?” da ngahāna. Jishuna ngahānkai, “Ina vāki kaji chili ara nathum mashurrārarluimara. Kha naoda shurrānaora.”

³⁷ Peterna ngahāna, “Proho, khisāda I mashurthukmarakhala? I nawui vang thishapra.”

³⁸ Jishuna ngahānkai, “Na kachangkhat iwui vang thishapralā? Kachangkhat eina ina nali kahāngna, harvā makhongranglakha nana ili matheimana da kathum shida hatra.”