JOHN 12 - Kathara Bible (BSI)

Jerusalemli Kakā

¹ Makānkhami Phanit sākida tharukthang vātlakha, Jishuna kathiwui eina ringngasak kahaia Lazaruswui ramli vai.

² Chili athumna Jishuwui ngazin phāzat ngarānhaisai, kala Marthana otram ngatha̱mida Lazarusna Jishuli ngasoda tableli pama.

³ Maryna aman kasaka nganamkaphā thao likli akha khuirāda Jishuwui pheili neomi, kala awui kuisam eina mitmi kala thao chiwui anganamna shim chi pemhaowa.

⁴ Sakhangatha̱bingwui ngachaili ali yorzāki kaje Judasna hānga,

⁵ “Khisāda thao hi lupā shākathum eina yorhailaga kachāmbingli mamithukhala?”

⁶ Ana kahāng hi lukhamashanwui vang maningmana, kha a khalena, ana lupākhao kasinga sāda awuili ungkazang chi ngathumda khuichinga.

⁷ Kha Jishuna hānga, “Aningkhānranu, ili kachizan zimikshowui vang ana haisaranu.

⁸ Nathumna kachāmabingli ngasopamchingra, kha iya nathumli mangasopamluimara.”

Lazarusli Shaothat khavai Kasā

⁹ Jishu Bethanyli leiyada kashā eina Jihudi kachungkha chili vai. Athumna chili khavā chi Jishuwui vangmāng maningla kha kathiwui eina ringlui kahaiya Lazaruslila yangkida khavāna.

¹⁰ Chieina pāngmon akhokabingna Lazaruslila shaothat khavai khangarān sai;

¹¹ kaja awui vang eina Jihudi kachungkha akhavābingli horhaida Jishuli shitsanghaowa.

Jerusalemli Kakā

¹² Kakhanethang Makānkhami phanitli kharā Jihudi kachungkhana Jishu Jerusalemli rārāli kaji shai.

¹³ Chieina athumna khaneinā singlaga Jishuli samphang khavai vai, kala “Hosanna! Prohowui mingli kharā Israelwui Awungali ka̱lā mahairanu” da vaowa.

¹⁴ Jishuna gadhānao akha khuida tonga, hi kathara lairikli hānghaisai:

¹⁵ “Mangacheealu, Zionwui naongalāva̱; yanglu, nawui awunga rārāli, gadhānao akhali tongda!”

¹⁶ Chitharan sākhangatha̱bingna matheisāmana, kha matakhak eina Jishuna ringkhalui tharan kathara tuili hānghaikasā athishurda athumna kasāna kaji phaningkhuinaowa.

¹⁷ Jishuna Lazarusli kathiwui eina ringngasakta chikhurwui eina hokashok tharan chiwui ngalemli leikasābing china khi shokhairakhala kaji kateibingli shākhi sai.

¹⁸ Jishuna matakhak kahai machut sāhaira kaji kashāwui vang mibingna ali samphangkida vai.

¹⁹ Phariseebingna ngazek ngarokta, “Yanglu, ithum ot masāpaithura, okathui katonga ali shurthuihaira.” da hānga.

Greekwui Mi Kaikhana Jishuli Kaphā

²⁰ Phanitwui atamli Jerusalemli khorumkida khavābingwui ngachaili Greek kaikhala zanga.

²¹ Athumna Galileeli khalei Bethsaidawui mi Philipli ahānga, “Ojā, ithum Jishuli theingai.”

²² Philipna Andrewli ahānga, kala ani khanina Jishuli ahānga,

²³ kala Jishuna anili ngahānkai, “Miwui Naomayarana tekhamatei samphangki kaji atam ara rāhaira.

²⁴ Kachangkhat eina ina nathumli kahāngna, māngumna ngaleilungli tāzangda mathiakha chithada leichinga, kha thihaiakha māngum kachungkha mathei ngasaka.

²⁵ Kachikathāna awui mirinli leishiakha chi shimānra, kha okathui hili awui mirinli mashivāmakha chi katang mavaila leisāra.

²⁶ Kachikathāna ili otram ngatha̱miakha, a ili shurphalungra kala I khalei chili iwui raola sāda leira, ili otram ngatha̱khame mi chili iwui Avāna maiyā ngasakra.

Jishuna Awui Kathiwui pongli Khamatui

²⁷ “Ara imanglā khananglakhaira, ina khi hāngra? ‘Avā, ili kakanmilu’ jirala? Maningmana, kharin hiwui vang I atam hili kharāna.

²⁸ Avā naming tekmateimeiranu.” Chieina kazingramwui eina akhon akha vaorai, “Ina tekmatei ngasakhaira, kala tekmatei ngasakluishitra.”

²⁹ Chili nganingkasā yaruina akhon chi shāda kaikhana hānga, “Kazingraona ali chān khangazekna.”

³⁰ Kha Jishuna athumli hānga, “Kahāng hi iwui vang maningmana, nathumwui vangna.

³¹ Ara apuk-apagva̱li bichar sāki kaji atamna; kala apuk-apagva̱wui akhavāli khuishokhaora;

³² ili okathuiwui eina khangkakā tharan, mi saikorali iwui ngalemli ngakhunrāra.”

³³ Ana hi kahāng hi a khithit eina thirakhala kaji kahāngna.

³⁴ Yaruina ngahānluishita, “Ithumwui ainli Khrista mathilakmara da hanghai. Kathada miwui Naomayarali khangkāra da hāngpaira? Miwui Naomayara hi khipākhala?”

³⁵ Jishuna athumli hānga, “Kahor chi nathumwuili kashakha leifara. Kahor chi leilakha zatlu, chithākha tangkhamangna nali mangaphankhuimara, tangkhamangli kazata china kachishong varakhala kaji matheimana.

³⁶ Kahor chi leilakha chili shitsanglu, chieina nathum kahorwui naongarā ngasāpaira.” Jishuna hi hānghailaga athumwui eina ngathumthuihaowa.

Mibingwui Mashitkasang

³⁷ Jishuna machut kachungkha athumwui miktāli sahailala athumna ali mashitsangmana.

³⁸ Hi Isaiah maranna hāngkahai ungkashungna: “Proho, ithumwui pao khipāna shitsangkhala? Prohona khipāli awui pangshap chitheikhala?”

³⁹ Chiwui vang eina athumna mashitsangkhararna, kaja Isaiahna hithada hānglui:

⁴⁰ “Varena athumli mik ngapeo ngasakhaira, kala athummwui ning makang ngasakhaira, chieina athumwui mikna matheimara, kala athumwui ningna mamajukmara, kala athumli raimi khavai ili mangareiungngaimara.”

⁴¹ Isaiahna tekhamatei hi katheiwui vang kala awui pongli khamatuiwui vang hi kahāngna.

⁴² Chithālala Jihudiwui kathāna kachungkhana Jishuli shitsanga, kha Phariseebingna khorumshimwui eina khuishokhaipaishina da phonglāk eina athum mamatuilengmana.

⁴³ Athumna Varewui kasopale mikumowui kaso ningchāngmeihaowa.

Jishuwui Tuina Bichar Kasā

⁴⁴ Jishuna panglāk eina hānga, “Kachikathāna ili shitsangakha, imāngli shitkasang maningla ili kashirāta chilila shitkasangna.

⁴⁵ Kachikathāna ili theiakha ili kashirāta chilila katheina.

⁴⁶ Ina apuk-apagva̱li kharā hi kahor thada kharāna, chi eina ili shitkasanga mi kachiva̱ tangkhamangli maleimara.

⁴⁷ Kachikathāna iwui tui shālaga makhuisangsālala, ina ali bichar masāmana; kachiwui vangkhala kaja ina apuk-apagali bichar sākhavai maningla huikhui khavai kharāna.

⁴⁸ Ili mamayāmada iwui tui makhuisangakha ali bichar sākhavai akha lei; ina hāngkahai tui china khanaowa zimiksholi awui bicharwo ngasāra.

⁴⁹ Kaja ina I khalattawui sāshap eina khamatui maningmana; ili kachihoa Avā khalattana khi hāngra kala khi matuira kaji kaso kahaina.

⁵⁰ Kala awui ningkhami china katang makhavai kharing khuirai kaji ina thei. Chieina ina kahāng hi Avāna kakasowui athishurda kasāna.”