JOBWUI LAIRIK 6 - Kathara Bible (BSI)

Job

¹ Chieina Jobna ngahānkai:

² O iwui malung kharing khān tamsi kaja, kala iwui unshimui saikora khānli heisangyangsi kaja chong!

³ Chithasi kaje shamadruwui situili ritmeira; chiwui vang eina ina matuitā kahai matheimana.

⁴ Kaja Pangshapawui malāthingbing ili ngathānda lei, chibingwui kathiri imanglāna manga; Varewui sāshat china ili rānmithaira.

⁵ Khawo leilakha ram gadhāna khongla, lah seizāt leilakha mukvāna khongkasaila?

⁶ Khalama otli machi masangla shaipaila? lah harra̱wui ahor khangayam khaleila?

⁷ Ikhamor mathuimada chi masāza̱ngaimana, chibing chi ningkakachai kashakazā thāhaowa.

⁸ Oh, iwui pokhangai popaisi kaja, kala iwui ningkachāng chi Varena mayāmisi kaja;

⁹ Varena ili sākazamhaingaiakha, apāng ngarānrāda ili katatmihaosi kaja chong!

¹⁰ Hi iwui ningkhalem khavaina, kachotkachāng hailaklaga masot chigatra, kaja Kathara A chiwui tui ina makhamayā maleimana.

¹¹ Ngarai khavai iwui pangshap kali lei? Kala iwui angarit kali leida, ina khāngpamrakhala?

¹² Iwui yāng lungguiwui pangshap kathāla? maningakha iwui aphi pithrai kathāla?

¹³ I khalatta ngachon khavai khikha maleikachangkhatmana, kala iwui khalalei saikora khuithuiserhaira.

¹⁴ Ngasotnaowui lukhamashan thatkahaia mi chi Pangshapali khangachee makhaleina.

¹⁵ Pālongkhur thāda kala pālongra̱ khalong thāda ichināngarā sāshilaka,

¹⁶ phāmna tākrorda kashining, kala horāmna khalatta ngayinkakhui thai.

¹⁷ Athumna lumkhaung tharan shimānhaowa; kasā atamli apam chiwui eina shimānhaowa.

¹⁸ Ut ashang china vāki kaji shongfawui eina ngareithuihaida; athumna makhaning apamli athihaowa.

¹⁹ Temawui utshang china kapeiya, Shebawui ramkazatbingna chihāna.

²⁰ Athum ngachāngchathaowa, khikhalajila athum ningnganungsai; athumna chili vāda pa̱ngapāhaowa.

²¹ Nathum iwui vang chikathā ngasāhaira; nathumna iwui kachotkachāng theilaga ngachee.

²² Ili lemmet milu chi maningakha nathumwui lan eina iwui vang pheizā sāmilu da ina hānghairala?

²³ Chimaningakha, yangkashewui pāng eina ili ngatangshokmilu, lah singkakharengbingwui pāng eina ili ngatangmilu da hāngla?

²⁴ Tamchitheilu, chieina I kasaikha pamra; ina kathāda nguihaokhala kaji ili theikhui ngasaklu.

²⁵ Mashuntui kayākha pangshap leikhala! Kha nawui kakharar china khi chithei?

²⁶ Ningchotnā kahaia miwui tui masi kathānada nana hāngmachinpairada phaningla?

²⁷ Avāva̱ makhalei naoli eina tangda kalā yanga, kala ngasotnaoli eina tangda leih ngalatngai,

²⁸ kha ara ili khayangrāmilu; kaja ina nathumwui mangāli makapikmara.

²⁹ Ngareirālu, khangui mashokaranu, ina kapona. Ngareirālu, ara iwui khayon makhalei chitheiki jihaira.

³⁰ Imaleli khayon khaleihaola? Iwui khamazapna unshimui matheirarmarala?