JOBWUI LAIRIK 4 - Kathara Bible (BSI)

Eliphazna Kahāng

¹ Chieina Temanwui Eliphazna ngahānkai:

² Hāngphat hāngraiakha nana malungvātrala? Mahāngsa jilala khipāna kasaikha pampaira?

³ Yanglu, nana kachungkha tamchitheihaira; kala khangazanabingli pang ngasakhaira.

⁴ Phei ngaphok kahaiali nawui tuina khāngkhaningmi, kala khuksao khanganukabingli nana ngatar ngasakmi.

⁵ Kha ara nali rāshunghaoda na makhāngrarthura; nali raza̱haoda nala malung ringhaira.

⁶ Vareli khangachee hi nawui ningkhanganung, kala ningtongda ot kasā nawui kachihān maningmala?

⁷ Ara machukyanglu, khayon makhalei mi kashimānhairala? maningakha mashungrik kahai mili kachili katathaira?

⁸ Inala theikhuihaira, morei ot kasā, kala makaphā khayao athumna chi tākam eina hātkhui.

⁹ Varewui khakkhā eina athum shimāna, kala awui malungkhavātwui kakhangang eina athum shimāna.

¹⁰ Kazingkha̱wui kakhangang, sakashe kazingkha̱wui akhon, kala kazingkha̱naobingwui ahāla tekhaira.

¹¹ Kapanga kazingkha̱ sāshai vāthaida shimānura, kala kazingkha̱ ava̱wui anaobing chaiyānghaira.

¹² Arui tui akha ili ngathum sāda khuirāmi ikhanāna yinyinyāyā shai.

¹³ Mina piphup kahai tharan, ngayāshongwui rākhamahā machuklakha,

¹⁴ khangachee khangachā ili rāda kathirra, kala china iwui ara̱kui saikora nganuk ngasaka.

¹⁵ Manglā akhana imangāchangli yup sāda phanrai, kuihā ngakarrikhaowa.

¹⁶ Rānganingshinghai, kha khizakkhala kaji ina mahāngrarmana. Maong akha imangāchangli runghai; vari eina leilakha, akhon akha hithāda shai,

¹⁷ “Thikapai mina Varewui mangāli mashungshaprala? Kasā akhavāwui mangāli mina tharshaprala?

¹⁸ Ana awui raobingli eina tangda mashitsangrarmana, kala awui kazingraobinglila khangui phena;

¹⁹ chithākha leikhontungli shim sāda, makung akhali paimeida khaningkachupkashapa shimphunga chifatungli kasoma athum kayākha ngazanmeirali?

²⁰ Ngathor eina ngazinwui alungli athumli sākazamhaowa, kala shimānhailala khikha theikhami maleimana.

²¹ Athumwui kachonshim khara̱ sāshatmihaiakha; athum thangkhamei maleila mathimala?”