JOBWUI LAIRIK 12 - Kathara Bible (BSI)

Job

¹ Chieina Jobna ngahānkai:

² Ningkhamaong khikha maleimana, mibing chi nathumlaka, thangkhamei nathumli ngasoda thirumra.

³ Kha nathumwui thāda ila theikhuikathei lei; I nathumli mangazanmeimana. Hikathā hi makathei khipā lei?

⁴ I ngasotnaowui ngashimshi khavai sāthuihaira, Vareli ngakaoda ana ngahānkhami, khangaronga, shāt makakā I mana̱shi khavai ngasāhaira.

⁵ Leiyasor kahai miwui ningli khangateiwui kalākashi chi aphei nganaikakhuibingwui vang ngaraipama.

⁶ Khalebingwui pamkhavai chingrihai, kala athumwui vareli pangli hailaga Vareli malungvātkhangasakbing kalā mashimana.

⁷ Kha ramsābingli ngahānyanglu, chieina athumna tamchitheira; kala khamasaili khalei vānaobingli ngahānyanglu, athumna hāngmira.

⁸ Chi maningkha okathuiwui thingnā-ra̱hāli ngahānlu, athumna tamchitheira; kala shamadruwui khaihna nathumli hāngchitheira.

⁹ Ot saikora Prohowui pāngna sākahaina kaji nathumwui ngachaili khipā matheimakhala?

¹⁰ Kharinga kachiva̱wui manglā kala mikumo saikorawui khaksuila awui pāngli leisera.

¹¹ Malena kashakazā khamazap thāda, khanāna tui mashāmala?

¹² Thangkhamei hi khararnaobingwuili lei; kala rarmamānakha theikhuimamāna.

¹³ Vareli thangkhamei eina pangshap lei, awuili hāngkachithei eina theishingkakhui lei.

¹⁴ Ana sakhaihaiakha khipānakha masākārarluimana; ana akhali shungnamhaiakha khipānakha mashomirarmana.

¹⁵ Ana tara̱ khāmhaiakha, thenghaowa; ana chihoakha ngaleitungli phongshilonga.

¹⁶ Yāng eina thangkhamei ali lei; khanguila, nguikhangasakla awuisera.

¹⁷ Ana machinmebingli mahonghat eina thānthui, kala bichar kasābingli mangma̱ ngasaka.

¹⁸ Awungabingwui kakhalap chi ana khalāmi, kala athumwui kashānli shānneira̱ neimi.

¹⁹ Ana pāngmonbingli mahonghat eina thānthuihaowa, kala kapingabingli konglui ngasaka.

²⁰ Shitsangkapai miwui tuimatui ana khuithuimihai, kala ararnaobingwui theishingkakhui pa̱ngapāmihaowa.

²¹ Wungnaobingwuitungli ningkakachai heirormi, kala kapangabingwui shānneira̱ khalāmi.

²² Tangkhamangwui eina ana kathuka phāshoka, kala tangmangting kahai chi horngasaka.

²³ Ana miyurbing hakngasaka, kala shimān ngasaka, ana miyur reisang ngasaka, kala ngahap ngasaka.

²⁴ Okathui mikumowui akhavābingwui eina theishingkakhui ana khuithuihaida, apong makhalei lamhāngli ma̱zat ngasaka.

²⁵ Kahor makhalei tangkhamangli athumna kajupzata, kala khamarip shongzā thāda jakchāngchāng zatngasaka.