JOBWUI LAIRIK 10 - Kathara Bible (BSI)

¹ Iwui mirin sānshunhaira; iwui mamayākhangai phonglāk eina hāngra; iwui ningkakhā eina ina hāngra.

² Ili khayon mamialu, da Vareli hāngra; ili nana khiwui vang khangarukkhala chitheimilu.

³ Napāngna sākahai ot chili rekakharek, ningkakachai hi phāya jilā kala makaphā makhayāwui arah kasāli ningyāng ungla?

⁴ Na phasā kakā miwui mik phonla? Mina kathei thāda nana theila?

⁵ Nawui okthot mikumowui thālā, maningakha nawui zingkum mikumowui zingkum thāhaoda,

⁶ iwui khayonkhamāng kala morei phāshang-phākatālā,

⁷ I mayonmana kaji nana theilala napāngwui eina ngatangmikashap khipākha malei kajila?

⁸ Napāngna ili sema kala sākhui, laga ara nana ili shimān khavai sāluihaira.

⁹ Nana ili leikhon eina sākhui kaji phaningungmilu; laga ili chifa ngasā ngasakluiki kajila?

¹⁰ Nana seina̱ thāda ili maheishokmalā, kala makhan thāda mashungkhuimala?

¹¹ Nana ili ahui kala aphi eina farormi, kala ili ara̱kui eina anonānli ngasun ngasaka.

¹² Nana ili manglā eina makhangachei leishāt mihaira, kala nawui yangkhamina imanglā mayonmi.

¹³ Chithālala hibing hi nawui ningli ngathumhai, hi nawui sākhangaina da ina thei.

¹⁴ Ina morei saakha, nana machuttithai, kala iwui khayon chi mapheomimana.

¹⁵ Ina maphaakha ili ringkashi ngasāranu! Ina mashungda leisālala, ikui makhāngkārarmana; kaja I maikashina pemhaoda kachotkachāngmāngli yanghaowa.

¹⁶ Kala I khalatta masochikatakha, kazingkha̱ thāda nana ili kharoma, kala iwuitungli matakhak kahai sākashi sālui;

¹⁷ nana iwuitungli shākhi kadhadhar phāsanga, kala iwuitungli nawui malungkhavāt mataisang ngasaka; kala nana iwuitungli ngarar khavai raimi kadhar phāsanga.

¹⁸ Khisāda nana ili naopamwui eina shokngasaksākhala? Khipānakha matheiranglakha mathihaisākapai.

¹⁹ I maleisālak kaji thāda; naopamwui eina chikhurli khuivāhaisāsi kaja phālakra.

²⁰ I hunkhamāng okthuiki kaji maningmala? I kateokha ringphākhui khavai iningkhānhaoga,

²¹ ina maungluiki kaji pam chili, tangkhamanga ram, kathiwui khaya̱li ina mavāranglakha, ringphakhuiga,

²² tangkhamanga pa̱khangapā apam, kahorla tangkhamang kathā ram chili.