JOBWUI LAIRIK 1 - Kathara Bible (BSI)

Satanna Jobli Chāng Khayang

¹ Uz ngaleili Job hoda mi akha leisai, ava shāt makālak kaja mashungrik kahai, kala Vareli ngacheeda makaphāli makazanga mi akhana.

² Awui nao mayarnao shini kala sha̱nao kathum da leisai.

³ Awui yao thingshini, ut thing kathum, langon kaphunga mukkā shāphangā, kala gadhā ava̱ shāphangā leisai; kala raola kachungkha leisai; chithāda sāda zimikshoshong khalei saikorawui ngachaili a hakmeikapta leisai.

⁴ Anaomayara ngarāna kachichāshi shimli hounglaga ngatak ngatāda zāt khāngngatheichinga; kala azara̱ kathumli phāshak phazā ngarum khavai ahokhuikhui ji.

⁵ Kala athumna morkasong kupkahaiwui thili, Jobna athumli hokhuida tharngasakmichinga, kala ana ngathorthakva̱ ngakarthuilaga athumwui mashing athishurda rikkatāchigat pha̱kaphayā chigatmimi ji; kaja Jobna “Inaomayara ngarāna morei sāhailaga athumwui ningli Vareli khonshi kahaila leipai” da hānga. Jobna chithāda sāchinga.

⁶ Thang zimikshokha hithāda shoka, Varewui naomayarabing Prohowui mangāli akazipsera, kala Satanla athumli ngasovai.

⁷ Chieina Prohona Satanli ngahāna, “Na kachiwui eina kharākhala?” Satanna Proholi ngahānkāda hānga, “Okathuili zatung zatkhavāwui eina, kala chiwui alungli zatshang zatkatāwui eina kharāna.”

⁸ Chieina Prohona Satanli hānga, “Na iwui rao Jobli machukyanghairala, kaja, okathuili shāt makakā; mashungrik kahai, kala Vareli ngacheeda makaphāwui eina ngareikathuiya mi a katha maleimana?”

⁹ Chieina Satanna Proholi ngahānkāda hānga, “Jobna aremali Vareli khangacheela?

¹⁰ Nana ali, awui shimkhurli, kala awui khalalei saikorali kuimareida arāp kachida masākhamhaimala? Nana awui otsakli somi, kala ram hili awui lan mataisangkhangai mataisangmi.

¹¹ Kha arui nawui pāng khāngkāda awui khalalei saikorali saza̱lu, chieina ana nali maingātlak eina khonshira.”

Jobwui Naomayarabing kala Lan Kashimān

¹² Chieina Prohona Satanli hānga, “Yanglu, awui khalalei saikora nawui pangshapli leihaira; kha achangle napāng masāza̱alu.” Chieina Satanna Prohowui eina thuihaowa.

¹³ Thang zimikshokha, ama khararawui shimli anaomayara eina anao ngalāva̱ ngarā phāshak phāzāsai;

¹⁴ kala paome akhana Jobli rāhānga, “Mukvābingna luili seiot sāsai kala chiwui ngalemli gadhābing phāshaipamsai;

¹⁵ chitharan Sabeanaobingna rākaida khuithuiserhaira, kala raobinglila raighai eina sāthatserhaira, pao ungmi khavai imāng ngathikashokna.”

¹⁶ Ana hāngmahungda leilakha khangatei akhala ungrāsai, kala ana hānga, “Varewui mei kazing eina tāda yao saikora kala rao saikora chuithatserhaira; kala pao hi ungmi khavai imāng ngathikashokna.”

¹⁷ Anala hāngmahungda leilakha khangatei akhala ungrasai, kala ana hānga, Chaldeanaobingna ashang kathum sālaga utbingli rākuinamlaga homthuiserhaira, kala raobinglila raighai eina sāthatserhaira; pao hi mikhavai imāng ngathikashokna.

¹⁸ Ana matui mahungda leilakha khangatei akhala ungrāsai, kala ana hānga, “Nanaomayara ngarā kala nanaongalāva̱ ngarā amawui shimli phazā phāshakta leilakha;

¹⁹ yanglu, lamhāngwui eina siphan panglāk eina phanungda shim chiwui achithek matili ungngaphita china naongarābingli tākrorda athum thiserhaira; kala pao hi mikhavai imāng ngathikashokna.”

²⁰ Chieina Jobna ngakarthuida awui khangavai kachon serkhāklaga kui sihaida, ngaleili ngakhumshām zanglaga khoruma.

²¹ Kala ana hānga, “Khamasai eina I ishāva̱wui naopam eina shoka, kala khamasai eina ina hanungra; Prohona mi kala Prohona khuithuihaira; Proho mingli soranu.”

²² Saikora hili Jobna morei masāmana, lah Vareli khanguila maphenmana.