JEREMIAH 7 - Kathara Bible (BSI)

Jeremiahna Khorumshimli Pao Hākashok

¹ Prohowui eina Jeremiahli rākahānga tui:

² “Prohowui shim zangkhavaiwui ngaveili anganingda tui hi vaomalānda hānglu, Proholi khorumkida ngavei hili kānkazanga Judahwui mi saikora Prohowui tui nganālu.

³ Nathumwui shongpong kala otsak mashungkhuilu, chithākha ina nathumli apam hili somngasakra da saikorawui Proho Israelwui Varena hithāda hānga.

⁴ ‘Hi Prohowui khorumshimna, Prohowui khorumshimna, Prohowui khorumshimna’ da mikhanam tuili makhuisanglu.

⁵ “Kaja nathumwui apong kala otsak kachangkhatta nathumna mashungkhuihaiakha, kachangkhatta akha eina akha mashun eina sangarokchaoakha,

⁶ kha̱minaoli, avāva̱ makhaleibingli kala ra̱meinaoli marekharekakha; lah apam hili khayon makhaleibingwui ashee matā ngasakakha, nathum khalattali masāza̱ khavai kala nathum khalatta machot khavai vare khangateili mashurakha,

⁷ achālakha nashāvā ngarāli ina metchang kahai ngalei, apam hili nathumli sompam ngasakra.

⁸ “Yanglu, nathumna aremali kakapik tuili shitsanga.

⁹ Nathumna leeda, mi sathatta, phophāda, mingzaiphāphāda, Baalli nganamkaphā riktāda kala nathumna makathei vare khangatateili shuralaga,

¹⁰ kala chiwui thili iwui mangāli iwui ming eina kahoa shim hili ungnganingda, ‘Ithumli huimihaira’ da hānglaga, ningkakachai ot saikora hi sachingfarala?

¹¹ Iwui ming eina kahoa shim hi nathumwui mikyanli khalebingwui shim sathuihaola? Yanglu, hi I khalattana theikahaina da Prohona hānga.

¹² Iwui mingli rida sompam khangasak Shilohli arui ayanglu, Israel iwui mibingna makhayā ot kasāwui vang ina chili khisākhala?

¹³ Ara nathumna saikora hi sāhaokada, da Prohona hānga, kala ina latlui latluida hānglala nathumna mashā, kala ina nathumli holala, nathumna mangahuithuda,

¹⁴ chiwui vang iming eina kahoa shim, nathumna shitkasanga, kala nathumli kala nashāvā ngarāli mikahai apam chili, Shilohli kasā thāda sāmira.

¹⁵ Ina nathumwui nachinā Ephraimwui naothei saikorali horser kahai thada nathumlila iwui mikyanwui eina horshokserhaora.

Mibingwui Kahāng Makhanganā

¹⁶ “Kha nava, mibing hiwui vang seihā masālakalu, kala chaptala seihā masālakalu, ili kapola mapoalu, kaja ina nathumli mashāmimana.

¹⁷ Judahwui keinungli kala Jerusalemwui chānreili athumna khi sālikhala kaji nathum matheimala?

¹⁸ Naongarāna thing phākhui, avāva̱ ngarāna mei sai, preiva̱bingna kazing philāva̱wui vang khamui nai; kala ili malung thuida malungvāt khavai athumna vare khangateili ra̱kharek kharektai.

¹⁹ Athumna malungthui khangasak hi ilila? da Prohona hānga. Hi athumna athum khalattawui pa̱ngapā khavai maningmala?

²⁰ Chiwui vang eina Proho VAREna hithāda hānga: Yanglu, iwui malungkhavāt kala malungkathui apam hiwuitungli milila, sālila, luiwui thinglila, ngaleiwui theishirailila heirorra, china chuida khamit mavaimara.”

²¹ Saikorawui Proho, Israelwui Varena hithāda hānga: “Nathumwui rikkatā kachigat pha̱kaphayāli ngarumsangda sā chi shailu.

²² Kaja Egyptwui eina thānkashok chitharan, navā ngarāli hikathā sākhavai ina mahānglakmana, rikkatā kachigat eina pha̱kaphayā ponglila kakasola makasomana.

²³ Kha, ‘Iwui khon nganālu, chieina I nathumwui Vare sāra, kala nathum iwui mibing sāra; kala ina kakaso apong saikorali zatta nathum kalā mahaimeira’ da ina kasoi.

²⁴ Kha athumna iwui kahāng manganāmana, khanāla manāshungmana, kha athum khalattawui theikakhuili zata, kala athumwui zakkashi wuklung eina ngakaishitingtingda, mangāshong mavāla sa̱na̱unga.

²⁵ Nashāvā ngarāna Egypt ngaleiwui eina shokthang eina thuilaga aja eina tangda, iwui rao marānbingli machatlakla thangkachida chihovai;

²⁶ chithālala athumna ali manganāsangmana, khanāla manāshung mana, ngakaikashili akachang sāhaowa. Avāva̱ ngarāli athumna zakshimeida sai.”

²⁷ “Chiwui vang nana athumli tui saikora hi hāngra, kha athumna nali manganāsangmara. Nana athumli hora kha athumna nali mangahānkāmara.

²⁸ Kala nana, athumwui Vare Prohowui khon makhanganā yur chi hina, hāngkachitheila makhuisangmana; khamashung shimānhaira. Chiwui pongli khangazek eina tangdala maleiluimana.”

Hinnom Leiwukli Morei Kasā

²⁹ “Nathum sam chichāpkhuilaga horhaolu, khangai kajuili achaplu, kaja Prohowui malungkathuiwui thot hili ana khalanhaira kala horhaira.

³⁰ “Kaja Judahwui naomayarabingna iwui mikyanli makaphā sāhaira, da Prohona hānga; kala iwui ming eina kahoa shim chi sākhamāng khavai athumwui ningkakachai ot kazipa.

³¹ Athumwui naomayara kala ngalāva̱bing meili riktā khavai, Hinnomwui naomayarawui tampākli khalei Tophethli khorum khavai sakai; chi ina makasomana, kaphaningla maphaningmana.

³² Chiwui vang eina yanglu, apam chili Topheth maholuiki kaji, kala Hinnomwui naomayarawui tampākla maholuiki, kha Shaokathatwui tampāk hoki kaji atam chi rārāli: kaja athumna Tophethli chifara, apam khangatei maleimana, da Prohona hānga.

³³ Kala mibing hiwui kathingun chi yongkazata vānaowui vang kala ngaleiwui sayurwui vang kashakazā ngasāra; athumli khipānakha makashamrarmara.

³⁴ Ina Judah keinungbingwui kala Jerusalem chānreiwui eina ringkaphā khamathānkhonbing, shakzāki kaji mayara eina ngalāva̱wui akhonbing chi ngasām ngasakhaora; kaja lam chi ramcho ngasakhaora.