JEREMIAH 5 - Kathara Bible (BSI)

Jerusalemwui Morei

¹ Jerusalem chānreili yongshang yongtāda yanglu, laga chukkhuilu! Kayāngkharei hupvali phāyanglaga, mashun eina kasā mi, khamashung phākazat mi akha leisākha, ina pheomira.

² Athumna, “Prohowui ming singda kahāngna” da hānglala, athumna mingzaiphaphai.

³ O Proho, namikna khamashungwui vang mayangmala? Nana athumli ngaphitmihaira, kha athumna kachot matheimana; nana athumli yummihaira, kha mashungkhui khavai masāmana. Athumna athumwui mai lunghārli makangmei ngasakta, ning mangateingaithuwa.

⁴ Chieina ina hānga, “Athum hiya kachāmabingna, athum ning makhaleibingmānga; kaja athumna Prohowui apong kala Varewui ain matheimana.

⁵ Khangamabingli ina vālaga ahāngra, kaja, athumna Prohowui apongla, Varewui ainla thei.” Kha athum saikora ngaraichāda langkon chi sāteka, kala khara̱ chi sāshathaowa.

⁶ Chiwui vang, khararwui kazingkha̱ akhana athumli sāthatra; siwukwui ramfa akhana shimān ngasakra. Kuirāngna keinungli rimpamda lei, kashoshoka mili akha̱ sāda serkazamhaora; khikhalajila athumwui sākhalāng kachungkhaya, Vareli khalan kahai hakmahālaka.

⁷ “Ina kathāda pheomira? Nanao ngarāna ili malaihaowa, kala vare makhaningbingwui ming eina mingzaihaowa. Athumli thoting eina mizaakha phokaphā ot sāhao, athumna khayorva̱wui shimli ngaheireida apamhaowa.

⁸ Keimathao kahai khamathanga sigui thāda, athum ava̱va̱na khongnai preiva̱li ngasha̱zata.

⁹ Otsakbing hiwui vang athumli ina tandi mamimarala? da Prohona hānga, kala hikathā yurli ina athut mahāngsangngayimala? da Prohona hānga.

¹⁰ Awui ngaherher eina drakhāthei ling kahahai ungshung-vāshungda asākazammihaolu, kha makānmichaohaialu; aphāng thapmiserhaolu, athum chi Prohowui maningmana.

¹¹ Kaja Israel eina Judahwui shimkhurna ili shitkasang maleilakthuwa” da Prohona hānga.

Proho na Israelli Makhamayā

¹² Athumna Proholi minamda matui, kala athumna, “Ana khikha masālakmara, ithumwuitungli makaphāla matāmara, chāmreila, raila marālakmara da hānga.

¹³ Marānbingla masi ngasāhaora, tui chi athumwui lungli maleimana; Athumli chithāda sāra!”

¹⁴ Chiwui vang, saikorawui Prohona hithāda hānga; “Khikhalajila athumna hithāda kahāngwui vang, yanglu, nakhamorli iwui tui mei ngasā ngasakra, mibing hina thing sāda, mei china chuitāhaora.

¹⁵ Yanglu, O Israelwui shimkhur, yur akha katāva̱wui eina ina khuirāra da Prohona hānga. Hi makhangacheia yurna, achālakhawui yurna, aram tui nathum mashāmana, athumna kahāngla nathum bhab matāmara.

¹⁶ Athumwui malākhor chikhur phut kahai thai, kapingpinga mimānga.

¹⁷ Athumna nathumwui heiun rāzā-rāshaimihaora; nathumwui naongalāva̱ kala naomayarabing, seila, yaola, drakhātheila, khaorātheila, kānmihaora. Nathumwui ning horsangda ngaziplak eina sakā kahai keinungbing chi athumwui raighai eina sākazammihaora.”

¹⁸ “Chithālala, chitharan ina nathumli mashimānchao ngasakmara, da Prohona hānga.

¹⁹ Kala nathumwui ngachaili ‘Khiwui vang Prohona ithumli hithāda kasākhala?’ da khangahān tharan, nathumna hithāda hāngra, ‘Nathumwui ngaleili leilakha nathumna ili malaihaida yur khangateiwui varebingli kaphaningwui vang nathumwui lam makhaning apamli nathumna matheikasa athumli otram ngatha̱mira.’”

Varena Awui Mibingli Hāngkhamathin

²⁰ Jacobwui shimkhurli hi phongshoklu, Judahlila hi vaosanglu:

²¹ “Mangkhama̱, ning makazanga mibing, hi nganākhuilu, mik kālala makatheibing, khanā kālala makashābing.

²² Nathum ili mangacheemala? da Prohona hānga; iwui mangāli nathum makathirmala? Ina shamadruwui vang da situi eina makhangacheiya thari sāmi, tara̱na kapheshoklala athumna mayuirarmara; tara̱na ngaphaolala, china makānshokrarmara.

²³ Kha mibing hiya ningnganāda ningli ngakaishitheilaka; athumna ngareithuihaida thuihaowa.

²⁴ ‘Atam athishurda mayo kachāng, māthei kachāng zingrot rokhame, kala mahātwui vang haptātā haimida ithumli yangkhame, Proho ithumwui Vareli ngacheesa’ da athumwui wuklungli mahāngmana.

²⁵ Nathumwui khayonkhamāng china ngareithui khangasakna, kaphā kaho chi nathumwui moreina mathei khangasakna.

²⁶ “Iwui mibingwui alungli makhayā mi zanga; athumna khalen kasangbing thāda rimpama. Athumna vanao khalen sangda mibingli tukkhui.

²⁷ Sopkai vānaona pemting kahai thāda, athumwui shim kachipatna pemtinghai. Chiwui vang athum khangamna kala kashāngna.

²⁸ Athum pangsiriri nganaiyokhaira. Makhayā ot kasāli katang mavaimana; mataisang khavai marānaowui mashun maphaningmimana, khavātabingwui khamashung matheimimana.

²⁹ “Hiwui vang athumli ina tandi mamimarala? Hikatha miyur hili ina athut makhuingayimala? da Prohona hānga.

³⁰ Apam hili khangachee khangachā ot shokhaira:

³¹ marānbingna yonda marānmi, kala pāngmonbingna athum ningsasak eina munga; laga iwui mibingna chi ningchangmeihao! Kha khanaowa kharā tharan nathum khisara̱?”