JEREMIAH 47 - Kathara Bible (BSI)

Philistinenaobingwui pongli Proho wui Pao

¹ Pharaohna Gazali masāshimitranglakha, Philistinewui pongli Prohowui tui chi Jeremiah marānli hānga.

² “Prohona hithāda hānga: Yanglu, atungshongwui eina kongra̱ reishokhaira, kala panglak eina phongshilongra; china ngalei chili pānda khaleibing, keinung kala chili kapambinglila phonghaora. Mibingna chapra, kala ram chili pānda khalei saikorana chapngachāra.

³ Awui siguibingwui ashona kakathangkhon shāda, awui siguigariwui kangkhonna ngarungning kahai chi shālaga, avāva̱ ngarāna anaomayarali makapeiungmana, athumwui pāng ngazanlakhaowa,

⁴ khikhalajila Philistine saikora sāshimān khavai, ngachonkhamebingli Tyre kala Sidonwui eina katat khavai kasā zimiksho chi ungshungki kajiwui vangna. Kaja, shamadrupheili khalei Caphtorwui shākkahai Philistineli Prohona sākhayangmihaira.

⁵ Ngaikhok kahai Gazawuitungli rāhaira, Ashkelonla shimānhaira. O Anakimwui shākkahaibing nathum khalatta karankha shātkazampamfarakhala?

⁶ Iyavo, Prohowui raighai! Karankhafara va̱rihapkida? Khalatta ahonli sanghaida kasaikha ngasāmkhuilu!

⁷ Prohona kasohailaga, kathāda va̱rihaphaipaira? Ashkelonli kala shamadrupheili khalei athumli ngasung khavai ana ngaran kahaina.”