JEREMIAH 45 - Kathara Bible (BSI)

Baruchli Proho wui Ngashitkhami

¹ Judahwui awunga, Josiahwui nao Jehoiakimna mungda khamate kum Jeremiahna hāngtāmamānda tuibing chi lairik akhali kapikakhui tharan Jeremiah marānna Neriahwui naomayara Baruchli kahāng tui china:

² “Israelwui Proho Varena nali kahāngna, O Baruch:

³ Nana hānga, ‘Iyavo I kalākashi! kaja iwui kachotli Prohona kakhanang ngarumsangmihaira; iwui khangahuina I khananghaira kala I khangasām masamphangthura’ da hānga.

⁴ Nana ali hithāda hāngra, Prohona hithāda hānga: Yanglu, ina sakā kahai chi ina pheitāra, kala ina lingsang kahai chi ina phurshokra— chiya, ngalei katonga china.

⁵ Nakhalatta kahaka phākazatla? Maphāzatalu! kaja yanglu, asā khavai saikorawuitungli ina kalākashi khuirāra da Prohona hānga; kha nana kazazatpam saikorali rai mazum sāda nawui mirin ina nali mira.”