JEREMIAH 41 - Kathara Bible (BSI)

¹ Kachāng kashineli, Elishamawui naomayara Nethaniahna kapharā Ishmael, wungnaowui shimkhurli kapharā kala awungawui otva̱ khamataiya akha sākasā china mi tharā thānlaga Mizpahli Ahikamwui naomayara Gedaliahwuili vai. Athumna Mizpahli phazāngarumda leilakha,

² Nethaniahwui naomayara Ishmaelna thānda athum tharā china Shaphanwui naomayara Ahikamna kapharā Gedaliah, Babylon awungana ngaleiwui lammunga sangkahaia chili raighai eina shātthathaowa.

³ Gedaliahli ngasoda Mizpahli pamkasā Jehudi saikora kala Chaldea raimibingla Ishmaelna shaothatserhaowa.

⁴ Gedaliahli shaothatthang, khipākha matheilakranglakha,

⁵ Shechem, Shiloh kala Samariawui eina mi hangchishat, kachonkakāk ngavai, phasā huikazazamhai, morhā siriplaga, Prohowui shimli tharāzat kachigat kala nganamkaphā otyur riktākhavai rārāsai.

⁶ Nethaniahwui naomayara Ishmaelna chapmamānda Mizpahwui eina athumli shokngaroka. Ana athumli samkaphang eina hānga, “Ahikamwui naomayara Gedaliahli zangyanglu.”

⁷ Athumna keinungli kazang eina Nethaniahwui naomayara Ishmael eina ali khangaso awui mibing china athumli shaothatserhaowa, kala paibung akhali horsanghaowa.

⁸ Kha athumwui ngachaili mi tharāna, “Ithumli masāthathaialu, kaja ithumna mā, napai, thao, kala khuira̱ luili thumhaidalei” da hānga. Chieina ana athum eina athumli ngayurzatkasābingli masāthatthuwa.

⁹ Ishmaelna kathingun horsang khavai paibung chi kahakva̱na; hi Israelwui awunga Baashana rai rākatā atamli ngararkham khavai Awunga Asana chuikakhui paibungna; Nethaniahwui naomayara Ishmaelna paibung chi kathingun eina chipema.

¹⁰ Chiwui thili Mizpahli leikasā mi saikora, awungawui naongalāva̱bing, kala Ahikamwui nao Gedaliahwui pāngli raikānwui kathāna Nebuzaradanna horsangmi kahai mi saikora chi Ishmaelna tukkhuiserhaowa. Kala Nethaniahwui naomayara Ishmaelna athumli tukphungda Ammonbingwui shong vāhaowa.

¹¹ Kha Nethaniahwui naomayara Ishmaelna makaphā kasā ot chi Kareahwui naomayara Johanan kala ali khangayur raimiwui kathānabing china kashā eina,

¹² Nethaniahwui naomayara Ishmaelli ngarar khavai athumwui mi saikora thānphungda vai. Kala Gibeonli khalei ra̱khong kahakawui apam chili angaphankhui.

¹³ Ishmaelna khuiphungkasā mibing china Kareahwui naomayara Johanan kala ali khangaso raimi kathānabing chili kathei eina athumna mathāna.

¹⁴ Chieina Ishmaelna Mizpahwui eina tukphungkasā mibing china Kareahwui naomayara Johananwuili latungsera.

¹⁵ Kha Johananwui eina Nethaniahwui naomayara Ishmaelna mi chishatli ngasoda yāmshokta Ammonnaobingwuili vāhaowa.

¹⁶ Mizpahli Ahikamwui naomayara Gedaliahli shaothat kahaiwui thili Nethaniahwui naomayara Ishmaelna tukkhui kahai—raimibing, sha̱naobing, naoshinaobing, ahongabing Gibeonwui eina khuikhaungbing chi Kareahwui naomayara Johananna thānda raimi kathānabingna saikorali thānungluishita.

¹⁷ Kala athumna Egyptli vākhavai ngaranda Bethlehem ngalemli khalei Geruth Chimhamli angasāmkhui;

¹⁸ kaja Ahikamwui naomayara Gedaliahli Babylon awungana ngalei chiwui khamunga sanghailaga Nethaniahwui naomayara Ishmaelna shaothat kahaiwui vang Chaldeanaobingli ngacheehaowa.