JEREMIAH 20 - Kathara Bible (BSI)

Pāngmon Pashhurli Khonkashi

¹ Chitharan Immerwui naomayara pāngmon Pashhur, Prohowui shimli khalei otva̱ saikorawui akhavā china Jeremiahwui khamarān tuibing chi shai.

² Chieina Pashhurna marān Jeremiahli shaolaga Proho shimwui Benjamin Ngavei atoli khalei narkhavai shimli haihaowa.

³ Akhama kathā narshimwui eina kachiho chitharan Jeremiahna Pashhurli hānga, “Nali Prohona Pashhur mahomana, kha ayar kachida Khangacheeya da hoi.

⁴ Kaja Prohona hithāda hānga: Yanglu, na khalatta kala nawui ngasotnao saikorana ngachee khavai ina sāmira da hānga. Athumna yangkashibingwui raighai eina kathi chi namik eina theira. Kala Judahnao saikorali Babylon awungawui pāngli horsangmira; ana athumli Babylonli khuiungda chili raighai eina shātthatra.

⁵ Chili lāngda keinungwui lan, tongkakhui saikora, aman kasasak ot, kala Judah awungabingwui lan saikora yangkashibingwui pāngli horsangmida athumna shimān ngasakra, ngaponkhuihaora, kala Babylonli khuitāserhaora.

⁶ Pashhur nala, nashi shimli khalei saikora tukthuihaora, Babylonli khuivāserhaora, chili nathum thisangra; nala, kala nana minamda marānkhame ngasotabinglila chili chifaserra.”

⁷ O Proho, na kapikhaira, ili kapikhaira; na ili pangmeiya, chieina nana yuihaira. Mina langpongda mana̱shinganao khavai sathuihaowa, mi kachiva̱na ili mana̱shidalei.

⁸ Kaja ina matuikachida, ina vaoya, “Khangashao kala sākashimān!” da ina vaoshoka. Kaja Prohowui tui chiwui vang ili langpongda zeikhanganao kala mana̱kashi ngasāhaira.

⁹ “Awui ming ina masingmara, lah awui ming singda mahangluimara,” jiakha, iningli mei kachui thāda ara̱-arā vāshunga, kala chi singkapam I makhāngrarmana, I mararmana.

¹⁰ Kaja ngathumda tarākha khangazek ina shai. Kuimareida khangachee lei! “Ali mashātalu! Ithum ali mashātsa!” da iwui theikhamasui ngasotnaobingna hānga, I kongkhalui ngashānpama. “Ali minampailapai, chithākha ithumna ali yuishapra, chithākha ithumna ali athut khuipaira.”

¹¹ Kha Proho, rai kapinga thāda iwui ngalemli ngasozatta lei; chiwui vang ili rekakharekbing athum phei ngaphokta ili mayuirarmara. Athum maishilākhaora; kaja athum mayuithukmara. Athumwui katang makhavai khayā khamalā chi mamalairarlakmara.

¹² O saikorawui Proho, khamashungli tamkhayanga, wuklung kala ningla katheiya, athumwuitungli nawui athut kakhui ili theingasakmilu, kaja nali iwui ngalang chi ina horsangchao kahaina.

¹³ Proholi laa sāda Proholi sochikatlu! Kaja makaphā kasābingwui pāng eina khavātabingwui mirin kanshokmihaira.

¹⁴ Ili pharāthang zimiksho chi khonkashi ngasaranu! Ishāva̱na ili pharāthang chi sokhami mangasaaranu!

¹⁵ Ishāvāli “Nali naomayara akha pharāmihaira” da chānpao hangkhamepa chi kalākashi ngasaranu,

¹⁶ Mipa chi, Prohona lukhamashan maleila horkahai keinung kathā ngasāranu; Ngathor kakhanangkhon shāranu, kala ngashun raikhon shāranu,

¹⁷ khikhalajila ili naopamli ana masāthathaithuwa; achāva ishāva̱ iwui chikhur ngasāda awui naopam reikhamatai ngasāchingra.

¹⁸ Kakhanang malung kharing theida kakhayak lungli pamkhavai naopamwui eina I khisāda rāhaokhala?