JEREMIAH 17 - Kathara Bible (BSI)

Judahwui Morei kala Tandi

¹ “Judahwui morei mari kolom eina kapihaida lei, hirāwui aton eina athumwui wuklungwui lungphekli kala athumwui hanphutwui angachili ruksanghaira,

² anao ngarāna khamatek thingpam kachida kala phungrāton kajujui apambingli lāngmeida athumwui hanphut kala Asherimli khorumchinga.

³ Nathumwui lan kala nathumwui sinā lupa saikora nathum moreiwui aman sāda ina nathumwui ramkhai ungshung vāshungda ngaponthui ngasakra.

⁴ Ina mikahai nathumwui shimlui chi nathumwui pangwui eina ngapaithuihaora; kala nathumna makathei ngaleili nathumwui yangkashebingli otram ngatha̱ ngasakra. Kaja iwui malungkhavātlungli mei sākāhaira; chiya mathāhaila chuichingra.”

Chānsam Kateibing

⁵ Prohona hithāda hānga: “Mili chihanlaga awui asā eina zeighai sākhangasaka, Prohowui eina ngareithui kahaia ali khonkashi ngasāranu.

⁶ Mi che siwukwui arongnao kathāna, khamathā kaho kashok matheimara. lamhāngwui thengcheng kahaipambingli, maokthuikapai chirumli okthui ngasakra.

⁷ “Proholi shitkasang mi chi sokhamina; Proho, awui chihān khavaina.

⁸ Ava tara̱pamli lingsang kahaia, angayungbing kongrāra̱li zimkakhui samkaphang, kasā kharā tharan mangacheema, kaja anā timshon timthaiya, kala kazingkakāng atamlila ning makashakmana, kaja chiya athei khamatheila khangasām makhavai thingrong kathāna.

⁹ “Ot saikorawuitungli wuklung zakshimeikapa, kala makhaomeikapa, khipāna chi bhab tāshapkhala?

¹⁰ Proho, Ina ningli kapeoyanga, kala wuklungli tamyanga; mi kachiva̱li awui apongwui thishurda, awui kasāsāwui athei athishurda mikhavaina.”

¹¹ Tiktarenna mapumkakhui nao nganaokakhui chithāda, mashun mazangla shāngkakhui a chikathāna; mirin ngahunpatli athumna ali nothāhaora kala awui athitlam mangkhama̱ ngasai.

¹² Haokaphok eina thuida kajuipamli tekmateilak kahai wungpamkhong chi ithumwui katharapamna.

¹³ O Proho, Israelwui kachihāna, nali horkahaibing maishi ngasakra; nawui eina ngareithui kahaibing chi okathuiwui mishānli yisanghaira; kaja kharing tara̱wui ura̱, Proho chili athumna horhaowa.

Jeremiahna Proho li Khangachon Kapo

¹⁴ O Proho, ili raimilu, chieina I raihaora; Ili huimilu, chieina I kahui samphangra; kaja na iwui masotna.

¹⁵ Athumna ili hānga, yanglu, “Prohowui tui chi kali leikhala? Chi rāranu!”

¹⁶ Makaphā chihorā khavai ina nali marengmana, kalāshāt rākhavai atam ina ningkachāngla maningmana, nana katheina, ikhamorwui eina kashok namangāli leihairasai.

¹⁷ Ili mangachee ngasakmialu; kalākashi atamli na iwui ngayin khavaipamna.

¹⁸ Ili rekakharekbingli maishi ngasaklu, kha ili mamaishi ngasakalu; athumli ning khanang ngasaklu, kha ili ning makhanang ngasakalu, kalāshāt atam chi athumli khuirāmilu; athumli khani shida chotchāngranu!

Sabbath Khamayon

¹⁹ Prohona ili hithāda hānga, “Judahwui awungabingna zangkhavai kala shokkhavai Benjaminwui ngaveili, kala Jerusalemwui ngavei kachida anganinglu,

²⁰ kala hānglu: ‘Prohowui tui nganālu, Judahwui awungabing nathum, Judahli khalei saikora, kala Jerusalemli kapāna saikora, ngavei hieina rākazangabing.

²¹ Prohona hithāda hānga: Nathumwui mirinwui vang nganākazakkhuilu, kala sabbaththang kharita ot maphunglu, lah Jerusalemwui ngaveibing einala maphungzangalu.

²² Shimwui eina sabbaththang ot kharit maphungshokalu, ot akhala masaalu; kha nashāvā ngarāli kaso kahai thāda sabbath hi tharda mayonlu.

²³ Chithālala athum manganāsangmana, lah manāshungmana, kha mashā khavai kala tamkachithei makhuisang khavai ngakaishitingtinghaowa.

²⁴ “‘Kha nathumna iwui tui nganaakha, da Prohona hānga, keinungwui ngaveibing eina sabbaththang ot kharit makhuiraakha, ot masāla sabbath kathar eina mayonakha,

²⁵ Davidwui wungpamkhongli kapam awungabing, siguigarilungli kala siguitungli katonga wungnaobingli, kala Judahwui mibing eina Jerusalemwui mibingli ngasoda ngaveili zangra; kala keinung hili okthuichingra.

²⁶ Kala Judah keinungwui eina mibing, Jerusalem kuimareida khalei apambing, Benjamin ngaleiwui eina, Shephelahwui eina, kaphungramwui eina, Negebwui eina, rikkatā kachigat eina pha̱kaphayāyur tharāzat kachigat, frankincense, kala ningyatchigat Prohowui shimli khuirāserra.

²⁷ Kha nathumna sabbath tharda mayon khavai iwui tui manganaakha, kala Jerusalemwui ngaveili sabbaththang ot kharit phungzangakha, ina ngaveili mei thotlaga Jerusalemwui konung saikora chuitā ngasakra kala sāshimitlala makhuimara.’”